Igbiighi 21 - Ạḍinya Iigbia

Ọkpar opu eelhe aKenan

¹ Arad ọdaam mọ aKenan arugh bọ ẹpe ạḍighaagh esoorom ade phọ aKenan ạnaghan mọ ạnmuny phọ Ịzirel okiton eten Atarim kụ rotu, ọdi ạghi azuom ẹgham bịdi asiphi buniin ạḍuanam.

² Kụ Ịzirel aguanaan Ọmoogh-we phọ kụ ạḅem mọ, “Eru mạar dị nạ kụloghonaan ḍịghaagh iyoor ọkpar opu awe phọ ạbuen, pọ yoor kọḅogh bịdi rꞌạramha phọ ạbidi ọngo nyịna kụ opiemi.”

³ Ọmoogh-we phọ ạnaghan ẹḍogh phọ Ịzirel, kụ ạḅogh we aKenan phọ ạngo; kụ bịdi oogulemi bịdi kpel kpel rꞌạramha phọ ạbidi, kụ oghol esi phọ ḍien mọ aHoma.

Ẹkaraph-ịyaar dị ọlemom enaba

⁴ Awe phọ Ịzirel ụḍua sịphe Eegum aHor kụ ọdaph eten dị rẹki Ọphiiny Igbilha phọ, ọbo bịdi koḍigh ghan bọ de phọ Idom; kụ ẹpe eten awe útue mun ụ́kparam

⁵ bịn ọgumom Ọmoogh-we phọ rꞌaMozis mọ, “Esi ika kụ ẹdi nyina ẹtu bọ ịsighe iyoor ẹpe Ijipt emitiom ẹḍuanam, ịlo yoor oru omuughu ẹphen ẹdala phọ? Eḍien ílho, ạmuum ólho. Yoor kótue mun ọtolom eḍien ọmiinom mọ ẹphen.”

⁶ Kụ Ọmoogh-we phọ arom ịigama ạrakaraph-ịyaar kụ eru elhomi we phọ Ịzirel kụ ịbadi awe phọ Ịzirel omuughu.

⁷ Awe phọ ọghi ọteeny Mozis kụ ọḅeni nyọdi mọ, “Yoor mọpioman ni oḍighi ịkaraph. Ịpe yoor ọḅeni bọ Ọmoogh-we phọ rꞌạna ị́nighe. Nyịidipho yoor rọlom mọ Ọmoogh-we phọ ạsighiogh rạkaraph ịyaar phọ ịphen.” Kụ aMozis ạaḅereghinaan we phọ.

⁸ Ọmoogh-we phọ ạḅeni Mozis mọ, “Kạ ẹkaraph-ịyaar lọ rẹgam ghan ạsighe ạḅam ạnyu ọkolom, kụ tọrobo oye lọ ẹkaraph-ịyaar phọ melhom, pọ ọdi aphogh ghan, bịn dị kámugh.”

⁹ Kụ aMozis ạka ẹkaraph-ịyaar enaba kụ ạsighe ạḅam ạnyu ọkolom. Kụ tọrobo oye lọ melhom dị aphogh ẹkaraph-ịyaar enaba phọ ẹrol bọ ẹpe ạnyu ọkolom mọ bịn aḍum.

Ọḍua Eegum aHor kụ osi Eḍiiny ạMoabait

¹⁰ Ạnmuny phọ Ịzirel ụḍua sịphe phọ omiigh erelhe, osi Obot, kụ odoghoḍi rugbogo.

¹¹ Mem dị bịdi ọḍua sịphe Obot, bịdi ụghi osi Iye Abarim kụ orugh sịphe ẹdala phọ ọtol ropogh eelhe ạbuo ạMoabait, ẹpe erumuḍio phọ remite ghan bọ.

¹² Ọḍua sịphe kụ ọghi osi Eḍiiny ạZered kụ orugh sịphe.

¹³ Sịphe kụ ẹdi bịdi oḅetenu ọghi osi ạga ephunom Ọphiiny Anon, kụ odoghoḍi rugbogo ẹpe ẹdala phọ ẹghi bọ esi ọku eelhe ạbuo Ạmorait. Anon kụ ọku eelhe ạbuo ạMoabait rꞌeelhe ạbuo Ạmorait.

¹⁴ (Ạḍinya ạraagham mọ Ọmoogh-we phọ ẹkaaph ịlo ẹmha aWaheb rꞌighool phọ ọdi ẹpe Sufa. Ẹkaaph kẹn ịlo Ọphiiny Anon

¹⁵ rꞌariḍiiny phọ ekpululu bọ ẹghi esi ẹmha Ar dị rẹki ọku eelhe ạMoabait.)

¹⁶ Kụ bịdi ọḍua sịphe ọghi osi Beer: ịsiphe kụ esi phọ aghuḍia phọ Ọmoogh-we phọ ạḅeni bọ Mozis mọ aakpomoghi oomo awe phọ, mọ ọno kạngo bịdi mụum.

¹⁷ Kụ ạnmuny Ịzirel ọmoogh ḍụor phọ ạḍien, “Sighuḍia, imiteghom mụum anyina; Kụ yoor kọsephom rꞌạḍuor —

¹⁸ Aghuḍia dị ịkpana ạnmuny kụ uguph Ḅịle rꞌikpolom awe phọ Ịzirel kụ ụḅol, Oguphom ịkpara ạraalha Rꞌireeny ạbidi.” Kụ bịdi ọḍua sịphe ẹdala phọ ọghi osi Matana.

¹⁹ Kụ ọḍua Matana ọghi osi Nạhaliel, ọghi osi Bamot.

²⁰ Ọḍua Bamot kụ ọghi ẹpe ade phọ eḍiinyaan bọ ẹpe eelhe ạMoabait phọ, ude Eegum aPisga dị ropogh de ịisaar phọ.

Ọkpar opu ạbudaam aSihon rꞌạOg

²¹ Kụ awe Ịzirel orom dom ọghiom Sihon ọdaam mọ Ạmorait mọ,

²² “Seseeny meera ni yoor oten aani de phọ ạna. Yoor rꞌịnam mọ ayoor kọ́gbatanu oḍigh iizo phọ ạna, mꞌiizo ịghol phọ ạna; ḅịle kẹn yoor mụum asighuḍia phọ ạna kọ́pughol. Yoor kọtol oḅodo ọdaam mọ tụtu yoor otenom eelhe phọ ạna.”

²³ Kụ aSihon ómeera mọ awe phọ Ịzirel ọḅeeny eelhe phọ ọdi, kụ aakpomoghi oomo awe phọ ọdi, ạghimom Jahaz ẹpe ẹdala phọ, kụ azuom ẹgham we phọ Ịzirel.

²⁴ Kụ awe Ịzirel ọsighe ẹdume elhool ẹgham oghiighom nyọdi, kụ ọsighe de phọ ọdi, emiigh kꞌịsiphe Anon osi Jạbok ẹpe ephunom mọ. Ịduon phọ pọ mosiom Amonait loor esi dị aJazer kụ ọku phọ ạbidi.

²⁵ Ịduon kụ ẹdi awe phọ Ịzirel ọsighiogh oomo ạramha phọ ịphen kụ orughogh oomo ạramha Ạmorait phọ, ọḅaram Hesbon rꞌịnon arikpisi.

²⁶ AHesbon kụ ẹkpana ẹmha aSihon ọdaam mọ Ạmorait. Ọdi kụ eenan bọ rꞌọḅel ọdaam mọ ạMoab, kụ ạsighiogh oomo arere phọ ọdi, ẹghi esiemi ẹpe Anon.

²⁷ Bụphe ọsighe bọ sidogh kụ rọmoorom ghan bọ sụor, ọḅem ghan mọ, “Itu ọghi ẹpe Hesbon, egbogh ẹmha aSihon ọdaam mọ! Yoor rọwa ọmiin dị moselemi ẹrol ḍigbaany ạdol.

²⁸ Amem ịrol dị sịen egbogh ẹmha phọ Hesbon; awe ẹgham aSihon unyeene mụdi ạnian ophiemi ẹmha phọ Ar ẹpe eelhe phọ ạMoab, rꞌikpolom awe phọ ạraaḅaraph phọ Anon.

²⁹ Ẹtol ika nụun esi anyina, we Mọab! Nyina awe phọ rọoḅereghi ghan bọ eru Kemos kụ mophiemi! Eru phọ memeera mọ ạnmuny phọ ọdi oḍighi ruuruen dị royeela, mọ aSihon ọdaam mọ Ạmorait asiphi nmạnyaan phọ ọdi.

³⁰ Kụ nyịidipho ẹemara ẹemara ạbidi mophiemi, emiigh kꞌẹpe Hesbon kụ esi Dibon. Yoor mophiemi bịdi, emiigh Nasim kụ esi Nofa, etuman Medeba.”

³¹ Ịzirel kụ morugh ẹpe eelhe ạbuo Ạmorait.

³² AMozis arom mọ ọghi oḅiligha Jazer, kụ bịdi ọsighe rạmha lọ ekoom, ophorogh bụo Ạmorait phọ ọrol bọ ẹpe.

³³ Kụ awe Ịzirel okiton kụ orelhe eten dị ẹghi Bạsan, kụ Ọdaam Ọg ạBasan ạghi azuom bịdi ẹgham ẹpe Edrei.

³⁴ Ọmoogh-we phọ ạḅeni Mozis mọ, “Kákiilaan nyọdi. Mị mạḅogh nyọdi rꞌoomo awe phọ ọdi rꞌade phọ ọdi ạngo nyịna. Tụugh ịpe nạ aḍighi bọ Sihon ọdaam mọ Ạmorait arugh bọ ẹpe Hesbon aḍighi aani nyọdi.”

³⁵ Kụ bịdi oghiigh nyọdi, ọze oomo ạnmuny phọ ọdi, rꞌawe phọ ọdi, ósugheeny rꞌoye. Kụ bịdi orugh de phọ ọdi.