Igbiighi 20 - Ạḍinya Iigbia

Ịdi emite Kades

¹ Ọḅel ụnwanyu ạlha phọ oomo ookpomoghan phọ Ịzirel uruughi ẹpe Ẹdala aZin, kụ odoghoḍi rugbogo sịphe Kades. Sịphe kụ ẹdi ạMiriam amugh kụ oḍi.

² Kụ ạmuum ọ́rol ẹpe phọ, kụ awe phọ ookpomoghan ozuom Mozis rꞌEeron.

³ Kụ ọwa sighiton esi aMozis mọ, “Kpạripe ghụn ọbo yoor momuughu aani ịdipho abumor phọ ayoor omuughu bọ egbodo Ọmoogh-we phọ.

⁴ Eeghe kụ iḍighi kụ nạ ạsighe bọ ḍita awe phọ Ọmoogh-we phọ arumom ẹphen ẹdala phọ mọ yoor omuughu sịen, yoor rꞌạsinam mọ ayoor?

⁵ Esi ika kụ ẹdi nạ ụsighe bọ iyoor ẹpe Ijipt, ạsighe arumom ẹkaraph esi dị rꞌịyaar kéḍum. Ịbiakpa ílho, iimuma ílho, ireeny avain ílho, arukpetughe ílho, rꞌạmuum ọphughol kẹn ólho?”

⁶ Kụ aMozis rꞌEeron ọḍua sịphe ogbo aḍita awe phọ, ọghi ọmeera ọnhu-aḍibuo Ogbogo phọ, kụ okpuḍian kụ okaram sighisigh ude kụ ạḍinmananmana ạḍiḅaal eegu Ọmoogh-we phọ emite esoorom bịdi.

⁷ Kụ Ọmoogh-we phọ ạḅeni Mozis mọ,

⁸ “Sịghe ịkpara phọ edi bọ ghisigh Igbe Ịyo phọ, kụ aakpomoghi oomo aḍita awe phọ, nạ rꞌEeron umor phọ ạna. Sịphe bịdi rọmiin bọ, kạaph ạḅeni ḍighiigh dị edi pạ, bịn ạmuum kamite ni. Ịduon kụ ịdi nạ kamitiom mụum dị awe phọ rꞌịnam mọ ạbidi kọpughol.”

⁹ Kụ aMozis ạghi ạsighe ịkpara phọ, ịdipho Ọmoogh-we phọ mạto bọ ạḅeni nyọdi.

¹⁰ AMozis rꞌEeron ookpomoghi ḍita phọ ạbidi sịphe aḍighiigh phọ, kụ aMozis ạḅem mọ, “Ịnaghan, nyina ạbuo ịgbagharan, yoor komitiom mụum sịen aḍighiigh phọ ịngo inyina ḍụghum?”

¹¹ Kụ aMozis aphoophe ḍịghaagh ọdi rꞌịkpara phọ ạghiom ạnyu, kụ ạgurom ḍighiigh phọ ịyal amem, bịn ạmuum akilogh loor aḍighiigh phọ amite amuza, dị awe phọ rꞌịnam mọ ạbidi ọphughol.

¹² Ọmoogh-we phọ ạḅaam Mozis rꞌEeron kụ ạḅem mọ, “Ịdi eḍighi bọ nyina ị́moogh omeeraam dị ạbugh ọmiin ịikpo iigbia ạmi igbo awe phọ Ịzirel, nyina kéḍiemiom we phọ ạbuen esi de phọ mị ạngo bọ bịdi.”

¹³ Ịphen imite ẹpe ạrumuum mọ aMeriba, esi phọ awe phọ Ịzirel ụwa bọ Ọmoogh-we phọ sighiton kụ ọdi aḍeenaan bịdi mọ ọno oye iigbia.

Ọdaam mọ Idom akikima mọ Ịzirel oten

¹⁴ AMozis ạrol sịphe Kades kụ arom dom ạghiom ọdaam mọ Idom mọ, “Adom mọ ạḍien ẹḍua kꞌabumor phọ ạna, arughunughun phọ Ịzirel. Nạ alegheri ni oomo ịminimiin phọ yoor mọmiinom bọ;

¹⁵ ịdi ạburude phọ ayoor ọghi ẹpe Ijipt ekpisi dị yoor ọrol ịbadibadi ạsia kụ awe Ijipt phọ ụmiine bọ iyoor rꞌạburude phọ ayoor.

¹⁶ Kụ yoor omoghiom Ọmoogh-we phọ, kụ ọdi ạnaghan emoghi phọ ayoor, kụ arom ọokpaany ọdi dị aru ụsighe iyoor amitiom ạḍuanam ẹpe Ijipt. Nyịidipho yoor odi Kades, ẹmha dị ẹkuan ọku rꞌeelhe phọ ạna.

¹⁷ Seseeny, yoor rọoḅereghi ni nyịna, meera ni mọ yoor oten aani de phọ ạna; yoor rꞌịnam mọ ayoor kókiton oḍigh iizo phọ ạna, mꞌiizo ịghol phọ ạna, ḅịle kẹn yoor mụum asighuḍia phọ ạna kọ́pughol. Yoor kọtol oḅodo ọdaam mọ; yoor rọ́gbatanu ḍịghaagh elhiom, mọ ạḍighaagh ekeeny, tụtu yoor otenom eelhe phọ ạna.”

¹⁸ Kụ bụo Idom ọḅeni bịdi mọ, “Yoor úmeera dị nyina kẹḅeeny de ayoor. Nyina ẹdaari ẹda, yoor komite kụ ịziom inyina.”

¹⁹ Awe phọ Ịzirel ọḅeni nyọdi mọ, “Yoor kotelhe ẹpe oḅodo phọ, kụ eḍighi dị yoor mꞌạsinam mọ ayoor ẹphughol mụum anyina, pọ yoor kọkpe ni. Yoor kotelhe ni rꞌẹwoor. Yoor rạraar anyina rọ́pue; yoor kọkoloma ni bịn ọḅeeny.”

²⁰ Awe Idom ọḅile ọḅem, “Yoor úmeera.” Kụ bịdi omiteghu ịlo ozuom awe Ịzirel rꞌạḍiikpara ạḍighaagh.

²¹ Loor esi dị Idom úmeera ọngo Ịzirel eepoogh ọḅeeny eelhe phọ ạbidi, awe Ịzirel uḅula ni kụ okiton ẹnon eten kụ ọghi.

Aḍuugh phọ Eeron

²² Oomo aḍita awe phọ Ịzirel ụḍua Kades ọghi osi Eegum aHor,

²³ eekuna ọku ade phọ Idom. Sịphe Ọmoogh-we phọ ạḅeni Mozis rꞌEeron mọ,

²⁴ “Eeron káḍigh ẹpe ade phọ mị ạngo bọ we phọ Ịzirel; ọdi kamugh ni ịdi eḍighi bọ ọdi ịmi ụ́naghanan ẹpe ạrumuum mọ aMeriba.

²⁵ Pạm Eeron rꞌẸliazar ọony phọ ọdi, ạsiinyom Eegum aHor,

²⁶ kụ sịphe phọ ạkporion rụsuoma oyil ạrikia phọ Eeron ạkpologhi Ẹliazar ọony phọ ọdi. Eeron kamugh sịphe.”

²⁷ AMozis ạtuugh ịpe Ọmoogh-we phọ mạḅeni bọ nyọdi aḍighi. Bịdi ọghi ọsiiny Eegum aHor risigh oomo awe phọ Ịzirel,

²⁸ kụ aMozis ạkporion rụsuoma phọ Eeron kụ ạkpologhi Ẹliazar ọony phọ Eeron. Sịphe ạnyu eegum mọ Eeron amugh, kụ aMozis rꞌẸliazar osoor.

²⁹ Oomo ookpomoghan awe phọ ọnaghan mọ Eeron mamugh, kụ oomo phọ ạbidi ọrol esi ọto ịraardi aḍughul-otu.