Igbiighi 18 - Ạḍinya Iigbia

Iiḍighi ariil ạrikia rꞌạbuo kꞌaLivai

¹ Ọmoogh-we phọ ạḅeni Eeron mọ, “Nạ rꞌạnmuny phọ ạna rꞌạbuo kꞌaLivai kụ kẹmoogh ọliom esi ạtorobo apum dị ạḍua esi oḍighi ịsiphe Ogbogo Ạdol phọ ạmi; kụ ọlo nạ rꞌạnmuny phọ ạna bịn kụ ketool ghan ịkaraph loor esi ịko ariil ạrikia.

² Sịghe bụo eghun phọ aLivai bumor phọ ạna ạpham arumom ẹrol dị bịdi rꞌạna rꞌạnmuny phọ ạna ọḅophoghi oḍighi ghan oḍighi sịphe Ogbogo phọ. Bịdi orelhenaan ghan nyịna sidom.

³ Bịdi kọdaph ghan ịlo ạna kụ oḍighinom, kụ oḍighi ghan oomo ạraraar ịsiphe Ogbogo phọ. Bịdi kútu ghan ụubeeph ẹpe oomo ạraraar Ạdol Iigbia phọ; ḅịle kẹn bịdi kútu ụubeeph enmeny ạrikia phọ, ọbo bịdi rꞌạna kemugh ghan bọ.

⁴ Bịdi rꞌạna ịḅophoghan ni eḍighi ghan oḍighi ịsiphe Ogbogo phọ, kụ ọlo bụno awe nyịna kútu utuman.

⁵ Nạ rꞌạnmuny phọ ạna bịn kụ keḍighi yogh ghan iiḍighi ịsiphe Ạdol Iigbia phọ rꞌiiḍighi ịsiphe enmeny ạrikia phọ, ọbo mị kạkagham ghan bọ kẹn we phọ Ịzirel ologhi.

⁶ Mị mạgbatan bụo eghun phọ aLivai bumor phọ ạna ạsighe sịphe ogbo awe phọ Ịzirel, ạngaani bịdi nyịna. Ọḅogh bịdi ụngo ịmi ọbo bịdi oḍighi iiḍighi ạbidi sịphe Ogbogo phọ.

⁷ Kụ nạ rꞌạnmuny phọ ạna, ịmaar ẹpham iiḍighi oyil ạrikia phọ. Oomo ịpe eru bọ ịlo ịsiphe enmeny ạrikia phọ rꞌịlo ịsiphe Ẹphan phọ kụ esi dị nyina keḍighi ghan oḍighi. Mị mạngo nyịna oḍighi oyil ạrikia phọ. Kụ ooruen lọ aḍuraan ạabeeph sịphe phọ pọ ikiigh ghan nyọdi.”

Abin ạmuo ariil ạrikia phọ

⁸ Ọmoogh-we phọ ạḅeni Eeron mọ, “Mị mạngo nyịna tọrobo ịyaar lọ oseere oḍighinom ịyaar aghuḍum ẹlo ạmi, oomo phọ ạraraar phọ ịpe ọosa bọ eḍighi iigbia esi awe phọ Ịzirel. Mụen kụ abin phọ mị mịngo bọ inyina, nyịna rꞌạnmuny phọ ạna kꞌagee-pọ.

⁹ Esi oomo ạraraar phọ ịpe eḍighi bọ iboom iigbia phọ, ịpe nịan phọ úguom bọ, ịphen phọ ịlo ạna: tọrobo ịyaar aghuḍum ẹlo ạbidi, rꞌạtorobo ịyaar aghuḍum ịbiakpa, rꞌịyaar aghuḍum lọ bịdi oḍighi ẹlo ịkaraph, rꞌịyaar aghuḍum apum lọ bịdi oḍighi ụngo ịmi eḍighi ghan iigbia esi ạna rꞌạnmuny phọ ạna.

¹⁰ Ịsiphe ẹphan phọ eḍighi bọ dọl iigbia kụ esi dị nạ kạtol ghan kụ ale ghan. Ilephiri ạnmuny bịn kole aani ni. Eḍighi iigbia esi ạna.

¹¹ “Ịphen kẹn ịlo ạna: ịyaar aghuḍum lọ bịdi oḍighi ẹlo obio giph ọngo, rꞌoomo ạrikia iiwopha awe phọ Ịzirel. Ịphen phọ mị mạngo nyịna rꞌalephiri ạnmuny phọ rꞌạnmanyaan phọ ạna. Bịdi kụ ụmoogh; kẹtol li kꞌagee-pọ. Tọrobo ọlo aseleman sịphe kꞌạna ale ni.

¹² “Mị mạngaani nyịna oomo amugeny ạmunum mọ, rꞌamugeny amiim mọ, rꞌịgbieneen ịbiakpa phọ, rꞌịḅel iimuma phọ ịpe bịdi ọngo bọ Ọmoogh-we phọ.

¹³ Tọrobo ịḅel ịphalaḅaal iimuma phọ ịsiphe ade phọ kọsighe bọ oḍighinom ịyaar aghuḍum ụngo ịmi, mị mạngo nyịna. Tọrobo ọlo aseleman sịphe kꞌạna ale ni.

¹⁴ “Tọrobo ịyaar lọ mẹsighe loor ọdi ẹkuom sịphe Ịzirel, pọ ẹlo ạna.

¹⁵ “Tọrobo ịyaar lọ ẹphur eghughuron oghun ẹmaria oomo ịpe iphulupul phọ, ịpe bịdi ọsighe bọ oruom Ọmoogh-we phọ, mꞌoye mꞌẹnam, pọ ịlo ạna. Kụ eru ẹḅel ẹmaria oye, pọ kori ni ạtagharan; ẹḅel ẹmaria ẹnam lọ ị́ḅaal, pọ tạgharan ni.

¹⁶ Bụphe nạ kạtagharan bọ pọ ạbulo mọman oniin ụnwanyu. Dạph ịpe nạ kagbi bọ mọ ẹman ni ikpoki oogh ipoḍi asilva; ọdaph ọkaraghi aḍiigbu ipoḍi asilva ịsiphe Ạdol Iigbia phọ.

¹⁷ Kụ ọḅel ọony ạnam mꞌọḅel ọony oyool-ọga mꞌọlo ạtu-ọga, kạ́tagharan. Iigbia ni. Sịghe ghan ịḅaal ạbidi kụ asereghi ghan enmeny ạrikia phọ, kụ ạsighe ghan ẹnuum mọ ạbidi ạkpooniom nịan, ịdipho ịyaar aghuḍum lọ oguom nịan ephur eeḅi eḍu esi Ọmoogh-we phọ.

¹⁸ Iphulupul phọ ịdipho ẹmi phọ ẹpe ọgbanyanaan bọ rꞌọgbo elhiom mọ ịlo ạna.

¹⁹ “Oomo ạrikia ịlo obio giph phọ, rꞌạraraar iigbia phọ awe phọ Ịzirel ọsighe oḍighinom ịyaar aghuḍum ọngo Ọmoogh-we phọ, mị mạngaani nyịna rꞌạnmuny ạna rꞌạnmanyaan ạna. Ọphon phọ ologh dị kạtol kꞌagee-pọ. Ịphen phọ ịyo aboph dị Ọmoogh-we phọ rꞌạna meghiran dị kẹtol kꞌagee-pọ.”

²⁰ Ọmoogh-we phọ ạḅeni Eeron mọ, “Nạ kále ghan erua sịphe ade phọ ạbidi; ḅịle kẹn, nạ kápin ghan bin sịphe ogbo phọ ạbidi. Mị kụ abin ạna rꞌerua ạna, sịphe ogbo awe phọ Ịzirel.”

Abin mụo ạbuo kꞌaLivai phọ

²¹ Ọmoogh-we phọ ạghaaph ạḅeni mọ, “Mị mạngaani bụo kꞌaLivai phọ muniin abin esi aḍioph phọ asibin oomo ạraraar phọ ạnmuny phọ Ịzirel ụngaani ghan bọ ịmi. Mụen phọ aruunmo ạbidi ịlo oḍighi phọ bịdi roḍighi ghan bọ sịphe Ogbogo Ạdol phọ ạmi.

²² Emiigh rodon kụ ẹghiom risigh, awe phọ Ịzirel kúḍuraan ghan mun ụubeeph sịphe Ogbogo phọ, ọbo bịdi kotool ghan bọ ịkaraph bịn omuughu.

²³ Bụo kꞌaLivai phọ bịn kụ koḍighi ghan iiḍighi ịsiphe Ogbogo phọ. Bịdi kụ kotool ghan ịkaraph ạbidi. Ọphon phọ ologh dị kạtol oghiil atum oghiil sịphe ọto ạna: bịdi rꞌawe phọ Ịzirel kúlian rurua.

²⁴ Muniin abin sịphe aḍioph abin phọ awe phọ Ịzirel ọsighe bọ oḍighinom ịyaar aghuḍum ịlo obio giph ọngo Ọmoogh-we phọ, mị mạngaani bụo kꞌaLivai phọ eḍighi erua ạbidi. Kụ iḍighi kụ mị ạtu bọ ạḅeni bịdi rꞌawe phọ Ịzirel kúlian rurua.”

Muniin abin phọ ạbuo kꞌaLivai kopin ghan sịphe aḍioph phọ

²⁵ Ọmoogh-we phọ ạḅeni Mozis

²⁶ mọ ạḅeni bụo kꞌaLivai phọ mọ, “Mem lọ nyina ạar we phọ Ịzirel muniin abin sịphe aḍioph phọ mụphe mị ịngaani bọ inyina eḍighi erua phọ anyina, ịsighe ghan eḍighinom ịyaar aghuḍum obio giph ẹngo Ọmoogh-we phọ, muniin abin esi aḍioph phọ.

²⁷ Kụ ịyaar aghuḍum obio giph phọ ẹphen ogbiom ni mọ ẹlo anyina, ịdipho ịbiakpa lọ ẹḍua sịphe ạsigba ịbiakpa phọ rꞌịdipho ịlo ẹḍua sịphe roḍighi bọ miim kụ emite.

²⁸ Ikori ghan kẹn ẹsighe oomo asibin phọ esi aḍioph abin phọ awe phọ Ịzirel ịngo bọ inyina, eḍighinom ghan ịyaar aghuḍum obio giph ẹngo Ọmoogh-we phọ, ẹngo Eeron oyil ạrikia phọ.

²⁹ Sịphe oomo ạraraar phọ ịpe ịngaani bọ inyina, ịsighe oomo igey ariisi phọ ịpe ẹnighe bọ, eḍighinom ịyaar obio giph.

³⁰ Mem lọ nyina mẹsighe oomo igey ariisi phọ ịpe ẹnighe bọ eḍighinom ịyaar obio giph phọ, igbiom mọ ịpe esugha bọ ịlo ạbuo kꞌaLivai phọ eḍighi ẹloghonaan esi ạsigba ịbiakpa phọ rꞌịsiphe amiim mọ.

³¹ Tọl li tọro esi bịn ale, nạ rꞌọto kꞌạna, esi úgbi, ịdi eḍighi bọ mụen phọ aruunmo ạna ịlo oḍighi phọ nạ raḍighi ghan bọ sịphe Ogbogo phọ.

³² Kụ kọ́tuan esi ịphen phọ bịn nạ atool ịkaraph, mem dị nạ ạsighe igey ạraraar ạphighironom ẹkia oḅio ogiph. Kụ ẹlo nạ ạphue rạraar iigbia phọ Ịzirel, nạ kamugh.”