Igbiighi 17 - Ạḍinya Iigbia

Ịkpara phọ Eeron

¹ Ọmoogh-we phọ ạḅeni Mozis mọ,

² “Ḅẹni bụo ạrumhu arughunughun awe phọ Ịzirel mọ ọsighe ḍioph rꞌịyal ịkpara oruomonaan nyịna, oye oye eniin eniin, kụ ạge ghan ḍien eghun sịphe ịkpara phọ ọdi.

³ Kụ ạge ḍien Eeron sịphe ịkpara phọ ẹpe aLivai; tọrobo uwo ẹmhu ịkpara ẹlo ọdi.

⁴ Kụ ạsighe aru asereghi sịphe Ogbogo Ạdol phọ ạmi esomanan Igbe Ịyo phọ. Mị rꞌạna keezuanaan ghan sịphe.

⁵ Ịkpara oye phọ ọpo mị kạsaḅar bọ kesi ọmiigh. Ịduon kụ ẹdi mị kasophe oomo ịgum mọ awe phọ Ịzirel rọgumom ghan bọ nyịna.”

⁶ Kụ aMozis ạghaagh ạḅeni we phọ Ịzirel, kụ oomo ạbuo ạrumhu phọ ạbidi ọngooghi nyọdi ḍioph rꞌịyal ịkpara phọ, ọdaph bụo eghun rꞌeghun kꞌạburude phọ ạbidi, kụ ịkpara ẹpe Eeron ẹrolan rꞌạbidi sịphe.

⁷ AMozis ạsighe ịkpara phọ asereghi risigh Ọmoogh-we phọ sịphe Ogbogo phọ esomanan Igbe Ịyo phọ.

⁸ Kụ rẹḅaal kụ aMozis ạghi aḍigh sịphe Ogbogo phọ, kụ, ịkpara ẹpe Eeron ẹlo eghun kꞌaLivai mesi ọmiigh. Mẹmoogh ḍịnya eemanam emuumogh iimuma kẹrara, kụ emuum ọmeenyeen dị mạḅaal.

⁹ Kụ aMozis aakoroghi ịkpara phọ ạsighiogh risigh Ọmoogh-we phọ kụ ạsighe aruomonaan oomo awe phọ Ịzirel, kụ bịdi ọnmanaghian ophogh kụ uwo ịkpara ọdi ạsighe ghan ịkpara ọdi.

¹⁰ Kụ Ọmoogh-we phọ ạḅeni Mozis mọ, “Ḅulemi ịkpara phọ ẹpe Eeron aseere sịphe esomanan Igbe Ịyo phọ. Seere pạ eḍighi eḍeenaan esi ạbuo ịgbagharan phọ, eḍighi ịdi oomo ịgum mọ ạbidi kesophoghian esi ạmi ọbo bịdi komuughu ghan bọ.”

¹¹ AMozis ạdaph ịpe Ọmoogh-we phọ ạḅeni bọ nyọdi kụ ạtuugh aḍighi.

¹² Kụ awe phọ Ịzirel ọḅeni Mozis mọ, “Yoor mophe, yoor moguul, oomo phọ ayoor moguul omuneen.

¹³ Eḍighi ịyaar dị oye lọ aḍuraan ạabeeph sịphe Ogbogo phọ kamugh, pọ oomo phọ ayira komuughu.”