Igbiighi 16 - Ạḍinya Iigbia

AKora, aDatan rꞌAbiram otuphe

^1-2 AKora ọony phọ Izhar ọlo ọto aKohat sịphe eghun phọ aLivai ạḅaar ri esi aMozis. Kụ ịraar awe bụo eghun aRuben, aDatan rꞌAbiram ạnmuny phọ Eliab, rꞌOn ọony phọ aPelet, ḅịle ra 250 ikpolom awe dị omitiom ḍien, bụo ạrumhu ịsiphe aḍita awe phọ Ịzirel,

³ ookpomoghan ọḅoph ọnhu ozuom Mozis rꞌEeron kụ ọḅeni bịdi mọ, “Nyina melhoghoma ẹpughan. Oomo aḍita ookpomoghan Ọmoogh-we kụ ạmoogh kụ Ọmoogh-we phọ odianan rꞌoomo ayira. Uḍighi ika, Mozis, kụ nạ aphoophe bọ loor ạna apuemi oomo aḍita awe Ọmoogh-we phọ?”

⁴ Mem dị aMozis ạnaghan bọ ịphen phọ kụ dị akpuḍian ezuemi kụ ạaḅereghi.

⁵ Kụ ọdi ạḅeni Kora rꞌaḍita otul phọ ọdi mọ, “Ḍịroor iḍue, Ọmoogh-we phọ kiḍeenaan ni inyina bụlo oḍighi bụo ọdi. Ọdi kaḍighi ịdi ọpo ọdi kụ mạsaḅar bọ atuman nyọdi.

⁶ Iḍighi ịduon. Nạ aKora rꞌaḍita otul phọ ạna ịki ẹsighe ịnyoki.

⁷ Ḍịroor iḍue, ịsighe ịkeeghi, ẹlhogh imoom iiḅu rꞌịnsens esumughi ologhi, kụ ẹpham ẹmeeraam egbodo Ọmoogh-we phọ, kụ ọdi kaḍeenaan oye phọ ọpo ọdi mạsaḅar bọ agananami mọ oye iigbia. Nyina ạnmuny phọ aLivai, nyina kụ ạbudi mephophe loor ẹphughan.”

⁸ AMozis ạḅeni Kora mọ, “Ịnaghan, nyina ạbuo kꞌaLivai.

⁹ Nyina regbi ghan mọ ọony ẹnum ịyaar ri esi anyina, ịdipho Ẹnaan phọ Ịzirel mịgbatan bọ inyina ẹsighe sịphe aḍita awe phọ Ịzirel, miḍuruma inyina elhoghoma, dị nyina keḍighi oḍighi phọ ọdi sịphe Ogbogo Ọmoogh-we phọ, ẹmeera egbodo awe phọ kụ ekumu bịdi?

¹⁰ Ọdi mameera mọ nyina rꞌạbueri phọ ạbuo aLivai ọmoogh eghuan phọ ẹphen. Kụ nyina rẹwa aani ghan ọsighe kẹn ạgada bụpinyon rịkia phọ ḍụghum?

¹¹ Esi ika kụ ẹdi aḍita otul phọ ạna rꞌạna meekpomoghan bọ ezuom Ọmoogh-we phọ? Mem lọ nyina rẹgumom kephoghom Eeron, ẹkar eḍighi eḍeenaan mọ nyina rẹḅaar ẹmhu esi Ọmoogh-we phọ.”

¹² Kụ aMozis arom mọ ọghi ọmagh Datan rꞌAbiram ạnmuny phọ Eliab, kụ bịdi ọḅem mọ, “Yoor rótu.

¹³ Kẹ́gbaanyan ịduon nạ mụsighe bọ iyoor ạḍuanam ẹpe ade phọ Ijipt, ade dị ạmamaam ạnam mọ rꞌẹnuum aḍiowo phọ rekilogh bọ, ọze ayoor sịen ẹdala phọ. Nạ kạtol ghan ọtooghi ạraraar ọngo ayoor?

¹⁴ Ịdi etum pạ, nạ iyoor ụ́sighe iyoor úrumom de ẹetool rꞌọninom, de dị ạmamaam ạnam rꞌẹnuum aḍiowo rekilogh. Kẹn, nạ iyoor ụ́ngo rere rꞌiizo ịghol dị ketu ẹmoogh ẹlo ayoor. Kụ nyịidipho nạ rạwa ookeleghi ayoor. Yoor rótu.”

¹⁵ Kụ ẹghagh ologhi aMozis, kụ aMozis ạḅeni Ọmoogh-we phọ mọ, “Kạ́boor inmo lọ awe phọ ạbuen orumom. Mị ọnyo ạbidi ịkaraph kőḍighi. Mị kọ̋sighe kẹn rꞌeniin ẹnam adool ạbidi.”

¹⁶ AMozis ạḅeni Kora mọ, “Iḍue nạ rꞌaḍita otul phọ ạna itu ẹmeregha risigh Ọmoogh-we phọ. Eeron kẹn kạtol li sịphe.

¹⁷ Tọrobo ọnyo anyina lọ ratu ạpham ghan ọkeeghi, ạlogh ịnsens adoghoḍi ologhi. Tọrobo oye ạpham ghan ọkeeghi phọ ọdi ạmeeraam risigh Ọmoogh-we phọ. Nạ rꞌEeron ẹpham rẹepe ịlo anyina.”

¹⁸ Kụ tọrobo oye ạsighe nịan ạlogh ologhi ọkeeghi phọ ọdi, ạlogh iiḅu ịnsens ologhi, kụ ạmereghaam sịphe ọnhu-aḍibuo Ogbogo phọ, esi dị aMozis rꞌEeron.

¹⁹ Kụ aKora aakpomoghi oomo aḍita otul phọ ọdi rọwa bọ bịdi sighiton, sịphe ọnhu-aḍibuo Ogbogo phọ, kụ ạḍinmananmana ạḍiḅaal eegu phọ Ọmoogh-we phọ emite eganana esi oomo awe phọ ạbidi.

²⁰ Kụ Ọmoogh-we phọ ạḅeni Mozis rꞌEeron mọ,

²¹ “Ịgbatanaan ḍita awe phọ ạbuen. Mị kapiemi ni bịdi mọony ẹnum amem.”

²² Kụ aMozis rꞌEeron okpuḍian ezuemi kụ ọḅem mọ, “Ẹnaan, nạ kụ azin oomo aghuḍum, kạ́tuan ịkaraph dị oniin oye aḍighi bịn ạghagham ologhi oomo ookpomoghan phọ ayoor.”

²³ Kụ Ọmoogh-we phọ ạḅeni Mozis mọ,

²⁴ “Ḅẹni we phọ mọ bịdi ọḍuaghu sịphe arugbogo phọ aKora rꞌaDatan rꞌAbiram.”

²⁵ Kụ aMozis rꞌikumoor awe phọ Ịzirel ọghi ọteeny Datan rꞌAbiram.

²⁶ Kụ ọdi ạghaaph ạḅeni ookpomoghan phọ mọ, “Iseseeny, mị rịiḅereghi ni inyina ịmeera ẹkelan rugbogo awe ạsipioghom mọ ạbuen, kụ kẹḅogh ịyaar lọ eḍighi ẹlo ạbidi, ọbo kọtuan ghan bọ sịpioghom mọ ạbidi iphiemi inyina.”

²⁷ Kụ bịdi ọḍuaghu sịphe arugbogo phọ aKora, Datan rꞌAbiram. ADatan rꞌAbiram momite kụ ọmeera ọnhu-aḍibuo ogbogo phọ ạbidi, rꞌạnmariir, rꞌạnmuny rꞌịbam ạnmuny phọ ạbidi.

²⁸ Pọ kụ amem dị aMozis ạḅem mọ, “Pụruku nyina kelegheri mọ Ọmoogh-we phọ kụ urom ịmi mọ mị uḍighi oomo iiḍighi phọ ịphen. Mị bịn ụ́sighe rꞌịnyaam ạmi kụ raḍighinom.

²⁹ Eru mạar dị awe phọ ạbuen omugh ḍuugh phọ ạḍiphe ạbunon awe romugh ghan bọ; pọ Ọmoogh-we phọ kụ ịmi úrom.

³⁰ Eru mạar dị Ọmoogh-we phọ aḍighi ịyaar dị kọ̋naghan ghan kụ ade phọ ephoghogho ẹminogh bịdi, kụ bịdi oogborion osumughu sịphe ooni phọ rꞌaruphua phọ ạbidi, pọ nyina kelegheri mọ awe phọ ạbuen phọ uufolomi Ọmoogh-we phọ.”

³¹ Kụ dị rọghaaph rọmadan ọghaaph phọ bịn ade phọ aDatan rꞌAbiram ọmeera bọ eruphaan

³² ẹmin bịdi rꞌọto ạbidi; kụ ẹḅaram oomo ạbumatuan aKora rꞌoomo aruphua phọ ạbidi.

³³ Bịdi rꞌoomo ọto kꞌạbidi osumughu ologhi ooni phọ imoom, kụ ade phọ eekpereghiom bịdi kụ bịdi ophe.

³⁴ Oomo awe phọ Ịzirel bụphe ọrol bọ okoom bịdi rọnaghan bọ emoghi phọ ạbidi bịn oghiil osumughu. Bịdi ọlo, “Ikiil! Ade phọ kiikpereghiom iyira.”

³⁵ Kụ ạnian ẹḍua ẹpe kꞌỌmoogh-we phọ emite, kụ ele 250 awe phọ ọpham bọ ịnsens phọ orumom ọsuughi.

Ịkeeghi phọ

³⁶ Kụ Ọmoogh-we phọ ạḅeni Mozis mọ,

³⁷ “Ḅẹni Ẹliazar ọony phọ Eeron oyil ạrikia phọ mọ ọdi asonogh ịkeeghi enaba phọ sịphe ạnian phọ ọsu bọ we phọ kụ ạawalami iiḅu phọ, ịdi eḍighi bọ ịkeeghi phọ meḍighi ni iigbia.

³⁸ Mọpham bọ ịkeeghi phọ otumom risigh ạmi mọ eḍighi iigbia. Kụ iḍighi, ịsighe ịkeeghi awe ạsipioghom mọ ạbuen ọze bọ, ẹgurogh ẹpaḅarami ịyaar okpereghiom enmeny ạrikia phọ. Ịkeeghi phọ ịphen keḍighi ni eḍeenaan esi awe phọ Ịzirel.”

³⁹ Ẹliazar oyil ạrikia phọ ạsighe ịkeeghi phọ kụ oobum oḍighi ịyaar okpereghiom enmeny ạrikia phọ.

⁴⁰ Ịphen phọ eḍighi ọphur ạruru we phọ Ịzirel mọ oye lọ útu oyil ạrikia dị ạḍua ọkuruḅaka Eeron kụ amite kụ́ki ghan ụubeeph egbodo Ọmoogh-we phọ ọsuughi ịnsens, ọbo ọdi kape ghan bọ ịdipho aKora rꞌotul phọ ọdi ophe bọ. Oomo ịphen phọ uḍighi ẹdaphan ịpe Ọmoogh-we phọ arom bọ Mozis mọ ạḅeni Ẹliazar.

Eeron ạpel we phọ

⁴¹ Rẹḅaal bịn, oomo ookpomoghan phọ ọghi ọgumom Mozis rꞌEeron kụ ọḅeni ghan mọ, “Nyina mẹze buniin awe phọ Ọmoogh-we phọ.”

⁴² Kụ oomo aḍita awe phọ ạbidi ookpomoghan kụ rọkagham ologhi Mozis rꞌEeron, kụ okiton opogh ẹpe Ogbogo phọ, bịn ọmiin ọotu dị aakpereghiom, kụ ạḍinmananmana ạḍiḅaal eegu phọ Ọmoogh-we phọ emite egaan.

⁴³ Kụ aMozis rꞌEeron onyeene kụ ọmeera sịphe esomanan Ogbogo phọ.

⁴⁴ Kụ Ọmoogh-we phọ ạghaaph ạḅeni Mozis mọ,

⁴⁵ “Mẹera ạkelan ogbo aḍita phọ ạbidi. Mị kapiemi bịdi mọony ẹnum amem.” Kụ ịyal phọ ạbidi omeleghu ezuemi.

⁴⁶ Kụ aMozis ạḅeni Eeron mọ, “Sịghe ọkeeghi phọ ạna ạlogh imoom iiḅu sịphe enmeny ạrikia phọ asumughi ologhi, ạḅam ịnsens ạnyu iiḅu phọ kụ aagborion ạghi ẹpe aḍita awe phọ odi bọ awoph bịdi ạasa, ịdi eḍighi bọ Ọmoogh-we phọ rạkagham bịdi ologhi kụ ẹepoph memiigh.”

⁴⁷ Kụ Eeron ạdaph ịpe aMozis ạḅeni bọ nyọdi, kụ aghiil ạghi ẹpe aḍita awe phọ odi bọ. Mem dị ọdi ạmiin mọ ẹepoph memiigh oḍighi yogh awe phọ. Kụ ọdi ạḅam ịnsens phọ ạnyu iiḅu phọ, kụ awoph we phọ ạasa.

⁴⁸ Ịphen kụ isophe ẹepoph phọ kụ ọdi ạmeera ogbo ạbudi odi rꞌạbudi momuughu.

⁴⁹ Bụdi ẹepoph phọ ẹze ọman bọ 14,700 awe, ụ́loghom bụphe ọtuan bọ ọgbaragbara phọ aKora kụ omugh bọ.

⁵⁰ Mem mọ ọpo ẹepoph phọ mẹḍua, Eeron aḅula ạghi ạteeny Mozis sịphe esomanan Ogbogo phọ.