Igbiighi 13 - Ạḍinya Iigbia

Ạbuo iḅiligha phọ

¹ Ọmoogh-we phọ ạḅeni Mozis mọ,

² “Tom we bịdi ọghi oḅiligha de phọ aKenan, ḍịphe mị rạngo bọ nmụny Ịzirel. Sịghe sịphe ọkuruḅaka ạburude phọ ạbidi eghun eghun oniin oye ọlo rạki rạki ni rꞌẹmhu ọdi.”

³ AMozis ạdaph ịpe Ọmoogh-we phọ ạto bọ ạḅeni nyọdi sịphe Ẹdala ạParan kụ arom bịdi. Oomo ạbuphe ọdi arom bọ ạbuo ạrumhu sịphe ạnmuny phọ Ịzirel.

^4-15 Ịphen kụ asiḍien ạbuphe ọdi arom bọ. Eghun Uw-ẹmhu Ruben Samua ọony phọ aZakur Sịmion Safat ọony phọ aHori Juda Kẹleb ọony phọ aJefune Ịsaka Igal ọony phọ ạJosef Ifraim Hosia ọony phọ ạNon Bẹnjamin Palti ọony phọ aRafu Zẹbiulon Gạdiel ọony phọ aSodi Mạnase Gadi ọony phọ aSusi Dạn Ạmiel ọony phọ aGemali Ạser Setur ọony phọ ạMaikel Nạftalai Nabi ọony phọ aVofsi Gạd Gẹyel ọony phọ aMaki

Eghun Uw-ẹmhu

¹⁶ Ịphen kụ asiḍien awe phọ ạbuphe aMozis arom bọ mọ ọghi oḅiligha de phọ. Kụ aMozis aghol Hosia ọony phọ ạNon mọ aJosua.

¹⁷ AMozis arom bịdi mọ ọghi oḅiligha de phọ aKenan kụ ạḅeni bịdi mọ, “Ịki ẹpe eekuna aNegeb esi ẹteeny roogbolom mọ,

¹⁸ ẹnmanaghian ẹmiin ọdo ịpe ade phọ ẹrol bọ, mụghumo awe phọ ạbuphe orugh bọ ọmoogh ni ịikpo mụghumo ụ́moogh.

¹⁹ Ịwa elegheri mụghumo awe oḍiza ni, mꞌúḍiza; mụghumo ade phọ ạbidi orugh bọ ẹnighe ni, mꞌị́nighe; mụghumo awe phọ otugh iphoghoghoony ạramha, mụghumo okpeki ni;

²⁰ rꞌọdo ịlo ade phọ ẹrol, mụghumo ade phọ ọosaar ri, mụghumo ẹnama, mụghumo ireeny edi ni sịphe ade phọ mꞌílo. Ịmaar ẹphama iḅiom mọ anyina; ekori ẹpham iimuma ịsiphe ade phọ ẹpham erigheel.” Iḍighi mem dị ịḅel iimuma avain mẹḅaalogh.

²¹ Kụ bịdi ọghi oḅiligha de phọ, omiigh sịphe Ẹdala aZin osi Rehob ọtol ropogh Eḍighom ạHamat.

²² Kụ bịdi ọghi ạga esoorom mọ, kụ ọghi osi Hẹbron. Ẹpe kụ ẹdi Ahiman, aSesai rꞌaTalmai, ạnmuny phọ Anak orugh bọ. (Mọlhogh Hẹbron oḍual ạsia eten, kụ ogbi ọlogh Zoan ẹpe Ijipt.)

²³ Kụ bịdi ọghi osi Eḍiiny aEskol, kụ bịdi osoph ọla ọosa rꞌẹezugh iimuma kụ ọsighe ọkolom ạale kụ ịyal ạbidi ọgban. Bịdi ọkuughi ekpetughe rꞌạfig.

²⁴ Kụ ughol esi phọ ịsiphe phọ mọ Eḍiiny aEskol, loor esi dị ịsiphe phọ kụ esi phọ awe phọ Ịzirel osoph bọ eezugh iimuma phọ.

²⁵ Bịdi ọrol bọ inyadi aḍughul-otu oḅiligha ade phọ kụ origheel.

²⁶ Bịdi ọghi ọteeny Mozis, Eeron rꞌoomo aḍita awe phọ Ịzirel, sịphe Ẹdala ạParan, sịphe Kades, kụ bịdi ọghaaph ịpe bịdi ọmiin bọ ọḅeni bịdi rꞌoomo awe phọ, kụ oḍeenaan bịdi iimuma ade phọ.

²⁷ Kụ bịdi ọḅeni Mozis mọ, “Yoor urelhe yogh de phọ nạ urom bọ iyoor ọghi oḅiligha phọ. Ade phọ, ade ẹetool rꞌọninom. Pọrono iniin iimuma ekpisi phọ.

²⁸ Awe phọ orugh bọ ẹpe ade phọ awe ịikpo. Odoghoḍi ni rạmha phọ ạbidi ọkuami, kụ ạramha phọ ạbidi ẹbughogh. Omuton ịphen phọ, yoor ụmiin ni ọto Anak ẹpe phọ.

²⁹ Bụo Ạmalekait otughogh ni ẹpe ade phọ aNegeb. Bụo ạHitait, bụo aJebusait rꞌạbuo Ạmorait otughogh ẹpe aroogbolom mọ. Kụ aKenanait phọ otughogh ọgbal Ọphiiny aMeditarenian rꞌoogbom Ọphiiny ạJodan.”

³⁰ ẠKeleb ạphoomi ni iloghi awe phọ rọgumom bọ kophoghom Mozis, kụ ạḅem mọ, “Ụgua ozuom nyịidipho ọghi ọsighe de phọ. Yira ọmoogh ịikpo dị ẹmanam ọkpar opu ọsighenom.”

³¹ Kụ awe phọ rꞌọdi ọghi bọ ọḅem mọ, “Eeye, yira ụ́man ọghi ozuom awe phọ, ịdi eḍighi bọ bịdi ọmoogh ịikpo upu iyira.”

³² Kụ bịdi ọgba ọkpe sịphe ogbo awe phọ Ịzirel ịlo ade phọ bịdi ọghi bọ iḅiligha phọ kụ ọḅem mọ, “Ade phọ ạḍiphe ítue ímitiom eḍien dị ẹmanam ookonomom awe phọ orugh bọ sịphe kụ oomo awe phọ yoor ọmiin bọ ẹpe phọ ikakara awe.

³³ Yoor ụmiin kẹn ni ẹpe phọ ịgbagara arephelegbe phọ, ạnmuny phọ Anak; yoor uloghoma dị oghom ịdipho asuogh-aben, kụ ịduon kẹn kụ ịdi yoor ọrol esi ạbidi.”