Igbiighi 11 - Ạḍinya Iigbia

Esi dị oghol mọ aTabera

¹ Iru ẹteeny mem dị awe phọ Ịzirel omiigh ogum ophoghom Ọmoogh-we phọ ịlo ịminimiin ạbidi. Mem dị Ọmoogh-we phọ ạnaghan bọ ịgum mọ ạbidi iphin ni ologhi ọdi, bịn ạnian eemor sịphe ogbo phọ ạbidi kụ ele oniin ạga arugbogo phọ.

² Kụ awe phọ Ịzirel omoghi ophoghom Mozis ọloghonaan ạḍighaagh kụ ọdi ạaḅereghi Ọmoogh-we phọ kụ ạnian phọ eḍim.

³ Kụ oghol ḍien esi phọ mọ aTabera, ịdi eḍighi bọ ịsiphe kụ ẹdi ạnian phọ kꞌỌmoogh-we phọ eemor bọ ogbo ạbidi.

AMozis ạson oḍualdi abuḍiemiom

⁴ Buniin aruuruen urelhian ni we Ịzirel. Bịdi ụmoogh ịkaraph ạruuphua iphulupul ẹnam kụ awe phọ Ịzirel ọḅile kẹn omoghi kụ ọḅem ghan mọ, “Ạnhian kụ kụngo bọ iyoor ịnam dị yoor kọba?

⁵ Yoor ụutughian ni ina phọ yoor ạany ghan bọ oopho ẹpe Ijipt, rꞌakukumba, rꞌạḍigho, rꞌịikiripha, rꞌayo, rꞌagalik phọ olhe ghan bọ.

⁶ Kụ nyịidipho inyaam ayoor memuneen; rꞌịyaar olhe ílho mun emuton mạna phọ ọphon ḍio etum ḍio!”

⁷ (Ạmana phọ ạghigh ẹbam eemuma ẹḅaal kụ ekelele.

^8-9 Mem adulhe lọ ooto rasoor sịphe arugbogo phọ bịn ạmana phọ mạdaph rameleghu. Ḍịroor kụ awe phọ ọghi ghan ookoroghi, ọgbe mꞌoghum otene aflaur kụ ọsa oḍighi yogh ịpeḅere iiḅoghoḍi dị ẹdugh ịdipho ạbred lọ oḍighinom mụnum-ọliv.)

¹⁰ AMozis ạnaghan dị oomo aweye romoghi yogh kụ ọmeregha sita eḍighom arugbogo phọ ạbidi; kụ ẹghagh ologhi Ọmoogh-we phọ iboom, kụ Mozis ị́ḅeeraan.

¹¹ Kụ aMozis apuru Ọmoogh-we phọ mọ, “Uḍighi ika kụ nạ ruḍighi bọ ịmi otelhedom mọ ạna ịkaraph dị eleeny ịduon? Kụ nạ ighirigiir ịmina ụ́nma bọ? Kụ nạ ạsighe dool oomo awe phọ ạbuen ạḅam ẹmhu ạmi?

¹² Mị kụ ụmar bọ oomo awe phọ ạbuen ḍụghum? Mị kụ ụmoogh bịdi? Kụ nạ rụḅeni ghan bọ ịmi mọ mị uḅerion bịdi ugbororian rụgbo ạmi ịdipho oobia raḅeton ghan bọ nmụny lọ rạmaam, ụki usiemi ẹpe ade phọ nạ aghunya bọ ạngo bụrude phọ ạbidi?

¹³ Mịna kạki ẹghen kụ ạmoogh bọ iphulupul ịnam dị kẹkasian oomo aḍita awe phọ ạbuen phọ rumoghiom ghan bọ ịmi mọ mịna ụngo bụno ịyaar olhe?

¹⁴ Ogina ạmi kátue átool oomo aḍita awe phọ ạbuen. Adool phọ ipel ịmi loor.

¹⁵ Ịphen kụ eru ịdi nạ kuḍighi ịmi, pọ mọogh ọnma ighirigiir ughiigh ịmi egina amem, ọbo mị kạkparaghan ghan bọ dọl ạagia phọ ạḍien.”

¹⁶ Ọmoogh-we phọ ạḅeni Mozis mọ, “Uukpomoghinaan ịmi oḍualdi ikumoor awe phọ Ịzirel, bụphe nạ alegheri bọ mọ bịdi kụ ikumoor awe dị ropogh ghan we phọ. Sịghe bịdi aru Ogbogo Ạdol phọ ạmi phọ kụ ạḅeni bịdi mọ ọmeregha sịphe phọ ịigaany ạna.

¹⁷ Mị kasoor sịphe phọ kụ ạḅaanaan nyịna, kụ mị ạsighiogh iniin aruwaloor phọ mị mạngo bọ nyịna adoghoḍi loor ạbidi. Kụ bịdi kọloghonaan nyịna ḍịghaagh ọpham awe phọ ạbuen, ọbo adool phọ kéḍighi mun ḍịo ogina ạna bịn.

¹⁸ Nyịidipho ḅẹni we phọ mọ, ‘Iselemian siloor anyina kụ, ẹteeny iḍue, nyina kẹmoogh iphulupul ịnam ịlo ạa. Ọmoogh-we phọ mạnaghan dị nyina remoghi kụ kẹḅem mọ ọbo nyina ẹmoogh ịnam ạa, kụ mọ ạdol phọ anyina ịnighe ẹpe Ijipt. Kụ iḍighi kụ Ọmoogh-we phọ kịngo inyina ịnam dị nyina kẹba.

¹⁹ Nyina kẹba ni káḍiniin aḍughul-otu mꞌesi ịyal aḍughul-otu, mꞌesi oogh aḍughul-otu, mꞌesi aḍioph aḍughul-otu, mꞌesi ịyaldi aḍughul-otu,

²⁰ kụ keḍighi okpom ụnwanyu, tụtu ẹteeny mem dị kẹḍuaghu izon anyina kụ emiteghu, tụtu eḍigh isa esi anyina, ikia inyina, ịdi eḍighi bọ nyina mẹḅitonaan Ọmoogh-we phọ odi bọ rꞌanyina, kụ ẹḅile emoghiom nyọdi mọ ọbo nyina mị́ḍua ẹpe Ijipt.’”

²¹ Kụ aMozis ạḅeni Ọmoogh-we phọ mọ, “Awe phọ ạbuen ọḅaram rꞌạmi ogbi bọ ọman bọ 600,000 awe dị rotelhe ghan owol ade, kụ nạ mạḅem mọ nạ kạngo bịdi ịnam dị ẹmanam okpom ụnwanyu?

²² Kụ ọze oomo iyool-ịga phọ rꞌạsinam mọ kụ ọngo bịdi kụ kẹper ri bịdi ḍụghum? Kụ ookpomoghi oomo ina ọphiiny phọ ọngo bịdi, kẹper ri bịdi?”

²³ Kụ Ọmoogh-we phọ apuru Mozis mọ, “Ạḍighaagh phọ Ọmoogh-we phọ mekper ḍụghum? Kébia nạ kạmiin ni mụghumo ikpo ọnhu ọghaaph phọ ạmi keḍighi ni ịne mụghumo kị́ne.”

²⁴ AMozis ạghi ạḅeni we phọ ịpe Ọmoogh-we phọ ạḅeni bọ nyọdi, kụ ọdi aakpomoghi oḍualdi ikumoor awe phọ Ịzirel kụ asereghi bịdi akoom Ogbogo phọ.

²⁵ Kụ Ọmoogh-we phọ asoor ude sịphe ologhi ọotu phọ, kụ ạrol ạḅaanaan nyọdi. Ọdi ạsighiogh iniin aruwaloor phọ ọdi ạngo bọ Mozis, kụ adoghoḍi loor oḍualdi ikumoor awe phọ, kụ mem dị aruwaloor phọ eḍiku bọ loor ạbidi, kụ bịdi omiigh ọlooghi ịlo ariil, kụ íbia.

²⁶ Ịyal ạbuno sịphe oḍualdi ikumoor awe phọ, Ẹldad rꞌaMedad, ụrol li sịphe arugbogo phọ kụ ụ́ki aani ẹpe Ogbogo phọ. Uwaloor phọ aḍiku aani loor ạbidi, kụ bịdi omiigh ọlooghi ịdipho ariil.

²⁷ Onyugheel ọony aghiil ạghi ạḅeni Mozis ịpe Ẹldad rꞌaMedad roḍighi bọ.

²⁸ Kụ aJosua ọony phọ ạNon, ọpo ạloghonaan ghan bọ ḍịghaagh Mozis kꞌamem ugheel, ạḅa kụ ạḅeni Mozis mọ, “Ọde-otu ạmi, kikima bịdi.”

²⁹ Kụ aMozis apuru nyọdi mọ, “Nạ ụtuan ịmi kụ rạkagh bọ ologhi? Kịḅeeraan ghụn ni ịmi dị Ọmoogh-we phọ ạsighe uwaloor phọ ọdi adoghoḍi loor oomo awe kụ bịdi ọlooghi ịlo ariil!”

³⁰ AMozis rꞌikumoor awe phọ Ịzirel oḅula ẹpe arugbogo phọ.

Ọmoogh-we phọ ạngo ghan ḍita ịnun

³¹ Ekperenom bịn Ọmoogh-we phọ aseere ookuugh, dị arumom ruukumude dị ẹḍua ọphiiny dị ẹpheeph esi dị eesulom ude. Bịdi iikpomoghan ni ude ekoom arugbogo phọ ịbadi itobi tọrobo ọogaany, ekpologhan ruḅum pạ ade phọ, dị ẹman oniin akuḅu.

³² Awe phọ ọrol ghan oomo aḍio phọ rꞌaḍughul phọ osiphi ghan aruukumude. Oye ọ́rol dị aakoroghi ịdi eghom esoorom oniin ọonir igbogh ịtoom ẹemor. Bịdi ọdeeghi okoom oomo arugbogo phọ mọ ẹgharaghar.

³³ Kụ ịnam mọ edi ni ịnhu ạbidi rọtaal, ẹpanaghian rạlhaal ạbidi, kụ ẹghagh ologhi Ọmoogh-we phọ; kụ ạghagham we phọ Ịzirel ologhi. Kụ Ọmoogh-we phọ ạsighe ẹzegh dị ẹmanam kụ ạliomom bịdi.

³⁴ Ọtuan ịdipho phọ kụ oghol esi phọ mọ aKibrot Hataava, ịdi eḍighi bọ ịsiphe phọ kụ ẹdi bịdi oḍiighi bọ bụo ịkaraph ạruuphua.

³⁵ Awe phọ ọḍua sịphe Kibrot Hataava ọghi osi ẹpe Hazerot; kụ ọrol sịphe Hazerot.