Hosia 8 - Ạḍinya Iigbia

Ọmoogh-we phọ akol ooseeny ịkaaghineen ạrumugh atonyon Ịzirel

¹ Ọmoogh-we phọ ạḅem mọ, “Pula eeḍue phọ! Ạbumulogh-ḍien rosoor ghan de phọ ạmi ịdipho aruga. Awe ạmi moogbonyon ịyo phọ mị aghiran bọ rꞌạbidi kụ mọḅaar ẹmhu esi ịtughemi phọ ạmi.

² Ghạlamo ịduon bịdi rụmagh bọ ịmi mọ Ẹnaan ạbidi kụ ọḅem mọ bụno awe ạmi kụ bụno ulegheri ịmi phọ,

³ bịdi moghel igey phọ. Loor ịphen phọ ạbumulogh-ḍien ạbidi koporogh ni bịdi.

⁴ “Awe ạmi ọsaḅar bụdaam, kụ bịdi ọdaamian siloor. Bịdi ọma buḍiemiom, dị mị úmeeraam. Bịdi ọsighe silva rꞌagol ạbidi kụ ọkaaghi rụmugh — ịlo ophiemiom aloor ạbidi.

⁵ Mị akel ḍilephiri ạnam agol phọ awe ẹmha phọ aSameria rooseeny ghan bọ. Mị ạmooghom ni bịdi ọghagh ologhi. Kꞌapuramem kụ bịdi ọbileghi ooseeny ghan ịkaaghineen ạrumugh phọ?

⁶ Oye ẹmaar ọnyo Ịzirel kụ ạlhem bọ mọony aghuḍuul phọ, kụ kẹ́naan rꞌẹnum. Aḍilephiri ạnam agol phọ rooseeny ghan bọ ẹpe Sameria kootughuḍi ni eten ịpherepe!

⁷ Mem dị bịdi ọzuph ookuugh, bịdi kobugha oghim! Ozo ịbiakpa dị ị́karaghar kémuum iimuma. Kụ ghạlamo emuum ni, aruuruen phọ kụ kole ọman.

⁸ Ịzirel mẹghigh oomo ịpheri phọ areelhe kụ meeph mụdi aguugh dị aḅomaan.

⁹ Ọḅaar ẹmhu ịdipho ịnam adool dị eḍien ụ́ngo, awe phọ Ịzirel rotelhe ghan ḍịo ạbidi. Bịdi mọghi ọwa ọloghonaan ạḍighaagh esi Asiria, kụ mọkpe ịnon areelhe mọ ọmaar ọpham bịdi.

¹⁰ Kụ nyịidipho mị kaakpomoghi bịdi kụ ạliom bịdi. Kébia bịdi kokironaan esi eephina, mem dị ogbogh ọdaam Asiria amiigh ọkpiloghom ạbidi.

¹¹ “Ọnhu arenmeny ạrikia dị awe phọ Ịzirel odoghoḍi ịlo ootol ịkaraph, ịdipho kụ ọnhu ariisi dị bịdi ọmoogh oḍighi ịkaraph.

¹² Mị ụgeeghinaan we phọ ịtughemi dị kótue ogbi, kụ bịdi okel mọ eḍighi imoom.

¹³ Bịdi ọpighiron ẹkia ụngo ịmi, kụ ạany iphulupul ịnam mọ. Kụ mị Ọmoogh-we phọ, bịdi ịmi ụ́ḅeeraan kụ nyịidipho mị kạatughian ni ịkaraph ạbidi ạlhiom bịdi; mị kaḅulemi bịdi ẹpe Ijipt!

¹⁴ “Awe phọ Ịzirel mọlhoghoḍi igbogh aruutu, kụ bịdi mowula Ọlemia phọ ạbidi. Awe phọ aJuda mọlhoghoḍi rạmha dị oghoony. Kụ ọlo mị katom ni nịan dị kele igbogh aruutu rꞌạramha phọ ạbidi.”