Hosia 7 - Ạḍinya Iigbia

¹ “Tọrobo amem lọ mị rạwa ookonom awe phọ ạmi Ịzirel kụ ọḅile ọngo ạbidi ghuḍum, oomo ịdi mị rạmiin ghan ẹkaraph eḍighinom ịyaar ạbidi. Oniin raagbegheḍiom nyoniin, bịdi rọgur ghan otu koḍigh omi, bịdi rozirion ghan rạraar awe reten ẹmha phọ.

² Amem ílho ọotughian mọ mị kạatughian ni oomo ịkaraph phọ ịphen; kụ ịkaraph ạbidi ekoom bịdi, kụ mị kạbile dị mị kạ́miin.”

Ẹkaraph ezue sịphe ogiga ọdaam mọ

³ Ọmoogh-we phọ ạḅem mọ, “Awe, loor ịkaraph aruuzue ạbidi, rookeleghi ghan ọdaam mọ rꞌawe ịtooghi phọ ọdi.

⁴ Bịdi oḍighi we iḅoroghom ẹmhu rꞌegbaghara. Ạmulogh-ḍien ạbidi rada ghan ịdipho ạnian dị edi ologhi ọvin dị ọpophoghiom mọ úgir tụtu ẹteeny mem dị kodoghoḍi rọḅol phọ.

⁵ Ḍio areephegh oghueni ọdaam mọ, bịdi uḍighi ịdi amiim aghiigh ọdaam mọ rꞌạbuo ịtooghi phọ ọdi kụ ọyegheyeghe.

⁶ Ii, bịdi ọnu mụdi ọvin rꞌịkaraph aruuzue phọ ạbidi. Oomo aḍughul ophin ologhi phọ ạbidi ada, kụ ḍịroor bịn amiigh oomor rꞌanem ạnian.

⁷ “Esi ogbogh ophin ologhi phọ ạbidi, bịdi ụze ni bụdaam mọ ạbidi. Rọze bụdaam mọ ạbidi oniin atum nyoniin, kụ rꞌoye ụuḅereghi ịmi ọloghonaan ạḍighaagh.”

Ịzirel rꞌịpheri phọ areelhe phọ

⁸ Ọmoogh-we phọ ạḅem mọ, “Awe phọ Ịzirel ọkigh eeḅoghoḍi ạbred dị ụ́kar úbilha. Bịdi oḍuom ologhi reelhe phọ ekoom bọ bịdi

⁹ kụ úlegheri mọ oḍuom ologhi aruuruen maphiemi ni ịnyaam ạbidi. Ariiḍio ạbidi megbem, kụ bịdi úlegheri.

¹⁰ Ophoophe aloor phọ awe phọ Ịzirel mabi bịdi ạkiom ghisigh. Ghạlamo ịdipho ạraraar memiteghu bọ ni, bịdi kőḅula esi ạmi Ẹnaan phọ ạbidi Ọmoogh-we phọ.

¹¹ Ịzirel rạwalawala ịlo ẹḅeeraan mụdi oghiil ọkurughozo; awe ọdi opuru Ijipt ọloghonaan ạḍighaagh kụ ogbi ọghi aani ọteeny Asiria!

¹² Kụ mị kaler ọseki kụ asiphi bịdi mụdi ịnun mem dị bịdi rotelhe yogh. Mị kạliom ni bịdi esi ịpe bịdi moḍighi yogh bọ.

¹³ “Bịdi mophe! Bịdi mụwile ịmi kụ ọḅaar ẹmhu esi ạmi. Kopiemi ni bịdi. Mị ụwa ni ọphel ạbidi, kụ ooseeny phọ ạbidi esi ạmi eḍighi reekeleghi.

¹⁴ Bịdi ịmi ụ́uḅereghi rꞌoomo ologhi; kpạripe bịdi oḅololo ude kụ ọlooghi ịdipho awe dị Ẹnaan úlegheri roḍighi ghan bọ. Mem lọ bịdi ọoḅereghi ọmoogh ịbiakpa rꞌamiim, bịdi obenegha siloor ịdipho awe dị Ẹnaan úlegheri roḍighi ghan bọ. Pọ eeghe awe ọḅaar ẹmhu bịdi phọ!

¹⁵ Ghạlamo ịduon mị kụ aakonom bọ bịdi kụ ạngo ịnyaam, bịdi ụmoogh ni ẹkaraph ezue esi ạmi.

¹⁶ Bịdi rọḍua ghan loor ạmi kọghi ooseeny ẹmugh dị ịikpo ị́moogh. Bịdi awe dị ologhi kőḍuom ịdipho ạkumugh dị akula. Loor esi dị abuḍiemiom ạbidi rọkaaph ghan rꞌophoophe aloor, bịdi komugh ḍuugh ekperenom, kụ awe phọ Ijipt ọmilogh.”