Hosia 5 - Ạḍinya Iigbia

¹ “Ịnaghan ịphen phọ, nyina ariil ạrikia phọ! Iler rụru, weye Ịzirel! Ịnaghan, nyina ọto kꞌọdaam mọ. Nyina ẹkpe oogbo ghan iiḅi ịiruen — ịduon phọ ịiruen kịteeny aani bọ inyina. Nyina meten ḍiphil ẹpe Mizpa, ọseki dị oler Eegum aTabor,

² ooni dị ạkel ude ẹpe ẹmha Akasia kụ mị kạliom oomo anyina.

³ Mị alegheri ni ịyaar dị Ịzirel eru — ọdi kátue ạbooghian dị mị kạ́miin. Ọdi ọ́moogh ọmeeraam, kụ awe ọdi ụ́kpe ooseeny ạmi.”

AHosia ạpur rụru ạbidi esi ịiḅereghi ịkaaghineen ạraraar

⁴ Ịkaraph phọ awe phọ moḍighi yogh bọ ekikima bịdi oḅula kꞌẸnaan ạbidi. Ọmeeraam aruru mạmoogh ịnyaam esi ạbidi kụ bịdi ụ́meeraam mun Ọmoogh-we phọ.

⁵ Ophoophe aloor phọ awe phọ Ịzirel mamoghinaan bịdi ạkiom ạnyu. Ịkaraph phọ ạbidi eḍighi ịdi bịdi okpetaan omeel, kụ awe aJuda omeelan rꞌạbidi.

⁶ Bịdi ọsighe iyool-ịga rꞌạsinam ạbidi kụ ọphighironom ẹkia ọngo Ọmoogh-we phọ, kụ bịdi sụo ụ́moogh. Bịdi nyọdi kọ́miin loor esi dị ọdi mạwile bịdi.

⁷ Bịdi moghel Ọmoogh-we phọ; ạnmuny ạbidi kạ́buo ọdi. Loor ẹmhu ịphen phọ, nyịidipho kọnuun ni opiemi bịdi.

Ẹgham aJuda rꞌỊzirel

⁸ Ipula rụkuodu ẹgham mọ sịphe Gibia! Ikar rẹdeneneeny phọ sịphe Rama! Ipophe ḍịolho ẹgham mọ sịphe Bẹt Aven! Ọghi ee ẹgham, weye ạBenjamin.

⁹ Aḍio ạmalhiom retu ni, kụ Ịzirel kepe ni. We phọ Ịzirel, ịphen phọ kẹkar ri emite!

¹⁰ Ọmoogh-we phọ ạḅem mọ, “Repin ologhi ạmi loor esi dị abuḍiemiom mọ aJuda mozuom Ịzirel kụ omi de ḍịghaagh ọdi. Kụ iḍighi kụ mị kaakuom ịminimiin bịdi ịdipho ạmuum-aḍigho.

¹¹ Awe Ịzirel rọmiinom ịkpiloghom, ade dị ẹkar eḍighi ḍịo ạbidi mekpetenaan bịdi, loor esi dị bịdi ụghi ghan ni ọwa ọloghonaan ạḍighaagh rạghaagh ạbuphe ụ́moogh bọ ịyaar ọngo.

¹² Mị kạsighe oogulaan atuomaan Ịzirel kụ ophiemi kạteeny we phọ aJuda.

¹³ “Mem dị Ịzirel aloghoma ịdi aloor phọ ọdi ị́nighe kụ aJuda ạmiin riisi dị oḍighi yogh nyọdi, kụ Ịzirel ạghi ẹpe Asiria ạteeny ogbogh ọdaam mọ ọloghonaan ạḍighaagh, kụ ọdi órue ógbulogh riisi phọ óokonom bịdi.

¹⁴ Mị kazuom ni we phọ Ịzirel rꞌaJuda ịdipho ạnam-dịka. Mị rꞌaloor kạpanyi bịdi ịpherepe kụ ạbile bịdi sịphe. Mem dị mị ạghogh bịdi ạsighe, rꞌoye kátue ạpel bịdi.

¹⁵ “Mị kạḅitonaan ni we phọ ạmi tụtu bịdi mọmiinom ịminighan loor ịkaraph phọ ạbidi kụ otu ọwa ghan ạmi. Iini esi ọmiinom ạbidi, bịdi kụwa ni ịmi.”