Hosia 4 - Ạḍinya Iigbia

Ologh Ọmoogh-we phọ aweye Ịzirel osoor bọ

¹ Ọmoogh-we phọ ạmoogh ni ọkpalhagham awe phọ odi bọ sịen ade phọ ạḍien. Iler rụru ịpe ọdi rạkaaph bọ: “Ọmeeraam ḅịle rꞌẹphomoghian ílho sịen ade phọ ạḍien, ḅịle awe phọ ịmi ụ́sighe mọ Ẹnaan.

² Bịdi roguanaan ghan ruguan dị réḍighi ghan ekol; bịdi rọgba ghan ọkpe, ọko enu, rꞌimi, ọḅile olhe ẹmha. Ạsipioghom eepaany kụ rꞌọze aweye.

³ Kụ iḍighi kụ ade phọ kẹkaraghar, ḅịle tọrobo ịyaar lọ edi sịphe kemugh ni. Oomo ịnam rꞌịnun ghạlamo rꞌina kemuughu ni.”

Ọmoogh-we phọ ạkpalham riil ạrikia phọ

⁴ Ọmoogh-we phọ ạḅem mọ, “Oye kụ́kpalham we phọ ḅịle kụ́ḅaam bịdi rꞌẹekpara ẹḍogh — ịḍagha ạmi ịkpaariom inyina ariil ạrikia phọ.

⁵ Ḍughul rꞌootaany nyina reekpeteghaan ghan, kụ ariil phọ rꞌanyina ọgbaranaan ólho. Mị kapiemi ni Ịzirel, onhiin phọ anyina.

⁶ Awe phọ ạmi kọmiin ekureriom loor esi dị bịdi ịmi ụ́logh elegh. Nyina ariil ạrikia phọ ímeera íphogh ịmi, kụ moghel ịtughemi phọ ạmi, kụ ịdipho kụ ịdi mị mighel inyina kụ kạ́sighe mun nmụny anyina mọ ariil ạrikia ạmi.

⁷ “Ịdipho nyina ariil ạrikia phọ eḍiza bọ, ịdipho kụ ẹdi ạsipioghom anyina esi ạmi eḍiza, kụ ịduon kụ ẹdi mị kakiton eghuan anyina atene roofola.

⁸ Esi ịkaraph awe phọ ạmi kụ ẹdi nyina ẹmoogh ẹelha, kụ ịdipho kụ ẹdi nyina ẹwa mọ bịdi oḍighi ghan ịkaraph dị epu ịphen.

⁹ Kuniin phọ ạghelhe phọ kụ kịteeny inyina ịdipho awe phọ. Mị kịlhiom inyina kụ aḍighi ịdi nyina kẹkpe sịpioghom mọ anyina.

¹⁰ Nyina kele ni bin ẹkia phọ anyina, kụ ọkoony kisiph ghan ni inyina. Nyina keeseeny ghan ni rụmugh ẹnuum ade phọ, kụ nmụny nyina kẹ́moogh loor esi dị nyina mẹḍua loor ạmi ọdaph ịnon ạrumugh.”

Ọmoogh-we phọ atonyon ịiḅereghi aruru

¹¹ Ọmoogh-we phọ ạḅem mọ, “Ịpughol amiim, mugbaany rꞌamumoom, rạsighiogh rupul ịitughian awe phọ ạmi!

¹² Bịdi rọlom ghan olegheri ịlo ạaghian loor ekulha ạḍipe! Oreeny kụ rạḅeni bịdi ịlo bịdi ọwa olegheri. Bịdi mụwile ịmi. Mụdi ạnir dị maḍighi ọlo erelhe, bịdi mọḅogh siloor ạbidi ọngo ịnon ạrumugh.

¹³ Riisi iigbia ọkar ạnyu aruugum, bịdi rọpinyon ghan rịkia, kụ ạnyu aroogbolom bịdi rọsuughi ghan ịnsens zin iipopha ạsiogh dị eevughuman, loor esi dị uba phọ ạnighe! “Loor ịduon phọ, ạnmanyaan anyina moḍighi reepheeny ḅịle ạnmariir dị ạnmuny phọ anyina mophinogh rolhe ghan ẹmha.

¹⁴ Kụ ọlo mị kạ́liom bịdi esi ịphen phọ loor esi dị nyina rꞌaloor retelhian ghan nmạriir arubughotu kụ nyina rꞌạbidi rẹpinyon ghan rịkia kẹngo ruru. Ịdipho aḍidogh phọ ẹḅem bọ, ‘Eelhe dị iloghi ílho kepe ni.’

¹⁵ “Ghạlamo nyina awe Ịzirel ịmi ị́meeraam, aJuda kụ́tol aani ịduon anyina. Kéeseeny ghan ẹpe Gịlgal mꞌẹpe Bẹt Aven. Ḅịle kẹn, kékunyian ghan ẹpe phọ esi aḍien Ẹnaan phọ edi ghan bọ bịn.

¹⁶ Awe phọ Ịzirel ọḅaar ẹmhu ịdipho ẹnam adool. Ika kụ ẹdi mị kạngo bịdi eḍien ịdipho iyool-ịga dị edi loor ạroogho?

¹⁷ Ịkaaneen ạraraar mẹpoghoron iloghi awe phọ Ịzirel. Imeera bịdi ọrolom dọl ḍịo ạbidi.

¹⁸ Mem dị mọphughol muboom amiim, bịn ologhi mạḅaal orelhe ipesi. Aroofola kụ mẹḅeeraan epu rughuenian.

¹⁹ Kọsighe ni bịdi ọḍuanam ịdipho oghim, kụ umugholoor asiph bịdi ịdi eḍighi bọ bịdi ụphinyon ghan rịkia ọngo ruru.