Hosia 3 - Ạḍinya Iigbia

AHosia rꞌoliom-ẹmha ạnir

¹ Ọmoogh-we phọ ụḅeni ni ịmi mọ, “Ḅịle ni ạghi aḍeenaan ẹphomoghian phọ ạna oliom ẹmha ạnir phọ rꞌọyuga phọ ọdi. Pọmoghian nyọdi ịduon mị ạphomoghian bọ ni we phọ Ịzirel, ghạlamo ịduon bịdi okiton bọ iloghi ạbidi ropogh ịnon ạrumugh kụ ẹḅeeraan bọ bịdi ọngo ịgbaghaḍineen ịsaraghi rụmugh dị ọkaaghi.”

² Kụ mị ụkpe ḍioph rꞌoogh ipoḍi asilva rꞌoniin okuron rꞌooghdi igbogh ịtoom ẹemor ịbiakpa abali otene ẹmhu ọdi.

³ Mị ụḅeni ni nyọdi mọ esi amem dị kebia iboom ọdi kukori ni ịmi kụ ẹmha kále ḅịle kátelhe yogh; kụ mem mọ ạmuen mị kakori ni nyọdi.

⁴ Ịduon ẹdi awe phọ Ịzirel kọtol ebia dị bụdaam ḅịle rꞌabuḍiemiom kọ́moogh, dị ạrikia ḅịle rꞌạroko asighiigh kẹ́tol, ịkaaghineen ạrumugh ḅịle rꞌigbudu ịmiin kẹ́tol.

⁵ Kụ amem ketu ni dị awe phọ Ịzirel kọḅile okiton kụ opogh Ọmoogh-we Ẹnaan phọ ạbidi rꞌọnyo ẹemara ẹemara aDevid ọdaam mọ ạbidi. Pọ kụ amem dị bịdi kọlogh eghuan Ọmoogh-we phọ kụ ọboor ịma aruunmo ọdi.