Hosia 14 - Ạḍinya Iigbia

Ịdi aHosia amoghiom Ịzirel

¹ Weye Ịzirel, iḅula esi Ọmoogh-we Ẹnaan phọ anyina. Ịkaraph anyina meḍighi ịdi nyina mekpetaan emeel.

² Iḅula esi Ọmoogh-we phọ; ẹrol dị ịiḅereghi phọ ịphen eḍighi ẹkia dị nyina ẹphighiron ẹngo nyọdi: “Sạr oomo ịkaraph ayoor ạwile, ạnaghanan ịiḅereghi phọ ayoor, kụ yoor kooseeny ni nyịna ịdipho yoor moguanaan bọ.

³ Asiria kótue ụphel iyoor kụ ịnam-ạsu ẹgham kétue iikpereghi iyoor. Yoor kọ́ḅeni mun ịkaaghineen ạrumugh mọ bịdi kụ Ẹnaan ayoor. Ọmoogh-we, nạ bịn kụ raḍeenaan ghan ọnma ighirigiir bụnyigo ạnmuny.”

Ọmoogh-we phọ aguanaan ọngo akumoom aghuḍum weye Ịzirel

⁴ Ọmoogh-we phọ ạḅem mọ, “Mị kaḅulemi ni we phọ ạmi loor ạmi. Mị kạpomoghian bịdi rꞌoomo ologhi ạmi. Mị kạ́kagham mun bịdi ologhi.

⁵ Esi awe phọ Ịzirel mị kạkigh ịdipho ọlophia dị aakuom ḍịgharaghar ade. Bịdi koonmenan ịdipho ạsifalaway; ạsini ạbidi kẹkpaph ude agey ịdipho ireeny phọ ạLebanon.

⁶ Bịdi kọtol rꞌakumoom aghuḍum, kụ ọnighe ịdipho ireeny ọliv. Bịdi kopur ịma eḍu ịdipho ọsaga phọ ạLebanon.

⁷ Bịdi kọḅile ni ọtol ọnhu-aḍibuo ạmi. Bịdi kopoph ịdipho ịizupha oghoony kụ omuum iimuma ịdipho ozo ireeny avain. Bịdi komitiom ḍien ịdipho amiim.

⁸ Awe phọ Ịzirel kọ́moogh mun ịyaar oḍighinom ịkaaghineen ạrumugh. Mị kạnaghanan ni ịiḅereghi phọ ạbidi kụ ạmaar ạpam bịdi. Ịdipho oreeny dị ọnam rákeel ghan kụ ịdi mị kakoph bịdi; Oomo ạḍiseph ạbidi kẹḍua esi ạmi kụ emite.”

Ekureriom mọ

⁹ Ạbulo ọmoogh ologhi ọnaghanan ịpe ọge bọ sịen, kụ bịdi ọnaghanam ḍụghum. Areten Ọmoogh-we phọ eeleeny ni, kụ awe aruukuan rọdaphan ghan kụ kọrol, abuḍighinom ịkaraph okpetaan ghan romeel loor esi dị bịdi okel reten phọ ọdi.