Hosia 11 - Ạḍinya Iigbia

Ẹphomoghian Ẹnaan esi aweye ọḅaar ẹmhu phọ ọdi

¹ Ọmoogh-we phọ rạḅem ghan mọ, “Mem dị Ịzirel aḍighi ọbumoony, mị ụphomoghian nyọdi kụ ạmagh nyọdi ạsighe sịphe eelhe phọ Ijipt ịdipho ọony ạmi.

² Kụ mị ạkuami rạmagh, ọdi akiil ghan ghụn rụkelan bịn ịmi. Awe phọ ạmi ọpinyon rịkia rọngo ghan Baal; bịdi rọsuughinaan ghan ịnsens ịkaaghineen ạrumugh.

³ Ghạlamo ịduon phọ ni mị kụ ọpo ạtughemi bọ Ịzirel ịlo orelhe. Mị uḅeton weye phọ ạmi rạghaagh ạmi, kụ bịdi úloghoma mọ mị ụpham ni bịdi.

⁴ Mị aḍur bịdi ạloghomaam loor ạmi rꞌạḍiḅeeraan rꞌẹphomoghian. Mị ạkpaph bịdi aphoophe kụ ạpham bịdi ạkpaariom rukpo ạmi; mị azuman ạteeny bịdi kụ ạngo bịdi eḍien.

⁵ “Bịdi úmeera úḅula esi ạmi. Kụ iḍighi kụ bịdi koḅula ni ẹpe Ijipt, kụ Asiria kụ kọda bịdi.

⁶ Ẹgham keḅoorogh ni rạmha ạbidi kụ ebunughi rughuugh ạrunhu-aḍibuo phọ. Kepiemi we phọ ạmi loor esi dị bịdi roḍighi ghan ịlo bịdi ọḅem mọ ịpe kụ igey.

⁷ Bịdi ọlogh ẹmhu ọḍua esi ạmi kụ úmeera uḅula. Bịdi komoghi omitiom loor ạdol ạrebene phọ bịdi kọtol bọ, kụ rꞌoye kạ́tagharan bịdi.

⁸ “Ika kụ ẹdi mị kịḅitonaan inyina, we Ịzirel? Ika kụ ẹdi mị kighel inyina? Mị kạkar ri iphiemi inyina ịdipho mị aphiemi bọ Adma ḍụghum, ḅịle, ịmiine inyina ịdipho mị ạmiine bọ Zeboyim? Ologhi ạmi kámeera mị aḍighi! Ẹphomoghian ạmi esi anyina ẹemor ẹpughan.

⁹ Mị kị́lhiom inyina rꞌophin ologhi ạmi; mị kápiemi mun Ịzirel. Ịdi eḍighi bọ mị Ẹnaan kóye. Mị, Oye Aghuḍuul phọ, mị odianaan rꞌanyina. Mị kátumom esi anyina rꞌophin ologhi.

¹⁰ “Awe ạmi kụdaph ni ịmi mem dị mị ạmaphaan mụdi ạnam-dịka risigh ạbumulogh-ḍien ạbidi. Bịdi koogborion kụ ọḍua ẹpe erumuḍio phọ remeel ghan bọ otu esi ạmi.

¹¹ Bịdi kọḍua ẹpe Ijipt kụ otu fiam mụdi ịnun, kụ ọḍua Asiria otu, mụdi arukuru-ghọzo. Mị kạḅile ni aḅulemi bịdi ruutu ạbidi. Mị Ọmoogh-we phọ mạḅem.”

Moghel weye Ịzirel rꞌaJuda

¹² Ọmoogh-we phọ ạḅem mọ, “Awe phọ Ịzirel mukoom ịmi rꞌọkpe rꞌiikeleghian, kụ awe phọ aJuda odi nịiniin ọḅaar ẹmhu esi ạmi, Ẹnaan aruukuan phọ, Ọpo rábi ghan bọ.