Hosia 10 - Ạḍinya Iigbia

¹ Awe phọ Ịzirel ụghigh ni ịdipho oreeny avain dị arughuuny emuza. Ịdipho eḍien reḍum bọ de phọ ạbidi, ịdipho kụ ẹdi bịdi ọkanagh ghan renmeny. Ịdipho ade phọ ạbidi reḍum bọ eḍien, ịdipho kụ ẹdi bịdi roselemi sighiigh ạroko igbudu iigbia phọ bịdi ooseeny ghan bọ.

² Awe phọ ạbuphe iloghi phọ ạbidi ẹḅaram bọ iikeleghian nyịidipho kọmiinom ni loor ịkaraph ạbidi. Ẹnaan kelereghi ni renmeny phọ ạbidi kụ egborion epiemi rọko igbudu iigbia phọ ạbidi.

³ Kébia bịn awe phọ ạbuen kọḅem ghan ni mọ, “Yoor ụ́moogh ọdaam loor esi dị yoor úkiilaan Ọmoogh-we phọ. Kụ ọdaam kạkar uḍighinaan iyoor eeghe ịduon phọ rọkaaph bọ?”

⁴ Bịdi ụḅa oopho ikpo ọnhu kụ oguanaan eepua aruguan kụ ọḅophan ịdi mạar ị́man. Nyina mekiton iiḅi ịiruen etene ịkaraph ịiruen dị repoph ịdipho ạtukaraph ạroogho sịphe ozo dị mowul.

⁵ Awe phọ orugh bọ ẹmha phọ aSameria kọmoogh oghiilaan kụ ọtol ọto esi ophieneen aḍilephiri ạnam agol phọ ẹpe Bẹtel. Bịdi rꞌariil ạrikia phọ ooseeny ghan bọ igbudu phọ komoghi ni. Bịdi kọlooghi ni ọkiom ạnyu mem dị mọkpanyan ẹnighe agol phọ ọdi.

⁶ Kọsighe ni igbudu phọ okeelom ẹpe Asiria mụdi osogh dị osogh ọngo ogbogh ọdaam mọ. Kosiphe ni umugholoor eelhe phọ Ịzirel loor esi oroma phọ bịdi ọdaph bọ.

⁷ Kọsighe ni ọdaam mọ ọdi ọḍuanam ịdipho ekulha ạḍipe ạnyu ạmuum.

⁸ Kopiemi ni rugbogo iigbia phọ ẹpe Aven ịpe awe phọ Ịzirel ọloghoḍi bọ ịlo ooseeny ghan ịkaaghineen ạrumugh phọ. Iiḅurom rꞌạroogho kẹsi eekpereghiom renmeny phọ ạbidi. Awe phọ kọḅeni ruugum mọ mọ, “Ạaghi iyoor!” ḅịle ruugum mọ, “Iikpereghiom iyoor!”

Ọmoogh-we phọ asophonaan ọoruen weye Ịzirel

⁹ Ọmoogh-we phọ rạḅem ghan mọ, “Awe phọ Ịzirel kọ̋wile oḍighi ịkaraph esi ạmi emiigh kꞌamem ịkaraph phọ ạbidi ẹpe Gibia. Kụ ẹpe Gibia, ẹgham kezuom ni bịdi.

¹⁰ Mị kazuom we ạsipioghom mọ ạbuen ạliom bịdi. Areelhe kọḅoph ọnhu kụ ọliom bịdi loor iboom ịkaraph phọ ạbidi.

¹¹ “Amem ịrol li dị Ịzirel ạghigh onyugheel ạnam dị ookonom agey, dị ạwa ghan rꞌoomo ologhi ọponyon ghan ịbiakpa, kụ mị ạatughian ọsighe ọfeguma phọ rꞌọkpoom ghan bọ sịnam mọ ọlogh ịma orum mọ ọdi. Mị aḍighi ịdi aJuda aḍur ọophulughiom mọ kụ Ịzirel aḍur oguphom mọ.

¹² Mị ạḅem mọ, ‘Ibulogh imoom ade, eḅeph ruukuan ḅịle ebugha ḍịseph phọ omeelom mọ ạna esi ạmi kamitiom bọ.’ Mẹteeny mem dị nyina kekiton iphogh ịmi Ọmoogh-we phọ anyina, kụ mị atu kụ iikuom inyina ḍịseph.

¹³ Kpạripe ghụn nyina ịzuph ịkaraph kụ ibugha phọ ẹdaphan. Nyina melhe iimuma ọkpe phọ anyina emitiom. “Loor esi dị nyina iḍuom ologhi rughuugh ẹgham rꞌaḍita ạbuo ẹgham anyina,

¹⁴ ẹgham kesoorom ni weye anyina, kụ oomo ariisi ẹkpar phọ anyina kopiemi ni. Kẹtol ịdipho aḍio phọ aSalman ọdaam mọ aphiemi bọ ạBet Arbel erugh ẹgham mọ, kụ ọze bọ burunhiin rꞌạnmuny ạbidi.

¹⁵ Ịpe kụ ịdi kimitenaan inyina awe phọ ạBetel loor ẹmhu ịkaraph phọ nyina meḍighi bọ. Ẹgham mọ remiigh bịn, ọdaam mọ Ịzirel kamugh ni.”