Hagai 2 - Ạḍinya Iigbia

Ẹnighe omoom Otu Ịiḅereghi phọ

¹ Omuneniom ịyaldi rꞌoniin Aḍughul-otu oḍual ụnwanyu oḍual aḍiniin phọ ạlha phọ, Ọmoogh-we phọ ạḅile ni arom oyil aHagai ọḅeni awe phọ ọdi.

² Ọdi arom Hagai mọ ạḅaanaan ạZerubabel ọdaam eelhe phọ aJuda, rꞌaJosua ogbogh oyil ạrikia phọ, ḅịle rꞌoomo awe phọ, kụ ạḅile ạḅeni bịdi mọ,

³ “Ọnyo anyina odi ni dị katue nịiniin ạatughian ẹekia ẹnighe phọ ẹpe Otu Ịiḅereghi phọ ạnighe ghan bọ ḍụghum? Esi anyina ạtol ika nyịidipho phọ? Ọ́ghigh mun ịyaar.

⁴ Kụ ọlo ọnyo anyina kụ́moogh ọto. Iḍighi ni oḍighi phọ. Mị odi ni rꞌanyina.

⁵ Mem mọ ọpo nyina ẹḍua bọ Ijipt erigheel, mị uguanaan ni mọ mị kạtolan ghan ni rꞌanyina oomo amem. Kụ mị odi ni rꞌanyina, kụ iḍighi kékiilaan.

⁶ “Kébia mun iboom mị kapighemi kẹ phọ rꞌade phọ, ude phọ rꞌọphiiny phọ.

⁷ Mị kapiemi ịtooghi areelhe phọ, kụ ọsighe ruphua phọ ạbidi otu sịen, kụ ẹelha emuza sịen Otu Ịiḅereghi phọ.

⁸ Oomo asilva rꞌagol aḅirini phọ ọlo ạmi.

⁹ Omoom Otu Ịiḅereghi phọ kạnighe ni apu ogbaany phọ, kụ ịsiphe kụ ẹdi mị kạngo we phọ ạmi edughom rꞌẹepho.” Ọmoogh-we egbogh Ẹnaan phọ mạḅem.

Oyil phọ Ẹnaan azu rụru bụpinyon rịkia phọ.

¹⁰ Omuneniom ịyaldi rꞌinya Aḍughul-otu esugha ụnwanyu sịphe ạlha phọ emuneniom bọ ịyal phọ ạDarios mạda aḍighi bọ ọdaam mọ, Ọmoogh-we egbogh Ẹnaan phọ ạḅile ni ạḅaanaan oyil aHagai.

¹¹ Ọdi ạḅem mọ, “Puru bụpinyon rịkia phọ ịlo kọpagharanaan ḍipuru phọ aḍien:

¹² Eḍighi ịyaar dị oye ạsighe ọpherepe ẹnam iigbia dị mọphighironom ẹkia kụ ạkul eekuna ạsuoma ọdi aphurughiom, eḍighi ịyaar dị ọdi ameera kụ ạsuoma phọ ọdi atir brẹd mꞌeḍien lọ mọsa, mꞌamiim, mꞌạmunum ọliv, mụghumo tọro ọdo eḍien ni, ketue ni eḍighi ịdi eḍien phọ ẹpe phọ keḍighi aani eḍien iigbia ḍụghum?” Mem dị opuru bọ ḍipuru phọ ạḍien, ariil ạrikia phọ ụphagharanaan mọ, “Eeye.”

¹³ Reten kụ aHagai apuru mọ, “Eḍighi ịyaar dị oye mạapuan loor ọdi loor esi dị ọdi mạḅogh oye dị mamugh kụ agbi nụun ọḅoghom eniin eḍien phọ ẹphen, ịphen phọ ketue ni ẹepu aani eḍien phọ ḍụghum?” Ạbupinyon rịkia phọ ọphagharanaan mọ, “Ii.”

¹⁴ Pọ kụ amem dị aHagai ạḅem, “Ọmoogh-we phọ ạḅem mọ ịduon phọ kẹn ni kụ edianaan weye eelhe phọ ẹphen ḅịle kẹn tọrobo ịyaar lọ bịdi omitiom; pọ ịduon phọ tọro ịyaar lọ bịdi ọngo sịphe enmeny phọ pọ mẹepuan ni.”

Ọmoogh-we phọ aguanaan ḍịseph phọ ọdi

¹⁵ Ọmoogh-we phọ ạḅem mọ, “Nyina rẹ́miin ghan ịphen mimitenaan bọ inyina ḍụghum? Tụtu nyina kemiigh bọ ọḅile ọlogh Otu Ịiḅereghi phọ,

¹⁶ nyina ịghi ghan ni egu ịbiakpa egbiighi ghan mọ kẹman ni ịyal okuron igbogh ịtoom ẹemor ịbiakpa, kụ ọlo oniin okuron bịn kụ kạtol. Nyina ẹghi sịphe oko amiim mọ ọsighe oniin okuron aruuku amiim, kụ ẹmiin inyadi bịn.

¹⁷ Mị kụ urom ọkaraph ookuugh mọ aagulemi tọrotoro ịyaar lọ nyina ẹkparagha ẹzuph, ịduon phọ kẹn ni kụ nyina íkiton.

¹⁸ Arodon emuneniom ịyaldi rꞌinya Aḍughul-otu esugha ụnwanyu, ḍio phọ mophighi bọ Otu Ịiḅereghi phọ ọmadan. Ịmiin ịpe kẹḅile bọ emite emiigh nyịidipho kụ rẹki ghisigh.

¹⁹ Ghạlamo ịduon ịbiakpa ísugha mun bọ ni, ḅịle kẹn ireeny avain rꞌaruman rꞌekpetughe ḅịle kẹn rꞌireeny ọliv phọ ke̋muum bọ ni, bịn emiigh nyịidipho kụ ẹghiom risigh, mị kịseph ni inyina.”

Oguanaan Ọmoogh-we phọ esi ạZerubabel

²⁰ Ḍiniin phọ aḍio phọ, omuneniom ịyaldi rꞌinya Aḍughul-otu ụnwanyu phọ ọpo, Ọmoogh-we phọ ạngo ni Hagai dom dị emuneniom ịyal

²¹ ọghiomonaan ạZerubabel ọdaam eelhe phọ aJuda: “Mị kạnuun ni apighemi kẹ phọ rꞌade phọ

²² ạḅile apiemi ịtooghi areelhe phọ ạḅile akunughi ịikpo phọ ạbidi. Mị agborion yogh rughuugh-ude phọ rꞌạbuphe rokiilom bọ; ạrusu phọ kemuughu ni, kụ bụphe rokiilom bọ kọzian ni siloor.

²³ Ḍio phọ ạḍiphe phọ mị kạsighe nyịna ạZerubabel otelhedom mọ ạmi, kụ mị ạma nyịna ọda esi aḍien phọ ạmi. Nạ kụ ọdi mị mạsaḅar.” Ọmoogh-we egbogh Ẹnaan phọ mạḅem.