Hạbakuk 3 - Ạḍinya Iigbia

Ịiḅereghi ạHabakuk

¹ Ẹphen kụ ịiḅereghi ạHabakuk oyil phọ:

² Ọmoogh-we, mị mạnaghan ni ịpe nạ maḍighi bọ, kụ eḍigh ḍiigu esi ạmi. Nyịidipho ḅịle aḍighi sịen amem mọ ayoor iboom ạraraar phọ nạ aḍighi ghan bọ. Mọogh ọnma ighirigiir ghạlamo ịyaar repin ologhi ạna.

³ Ẹnaan mẹḅile ẹḍua ẹpe Idom retu; Ẹnaan aruukuan ẹḍua ẹpe aroogbolom mọ ạParan kụ retu. Eegu phọ ọdi eekpereghiom okuaḍio phọ kụ de phọ ạḍiseph ọdi kụ imuza.

⁴ Ọdi ratu rꞌạḍiḅaal ọmeephian okuaḍio; ạḍiḅaal ẹḍua ghan ḍịghaagh ọdi kụ rẹmu; ịsiphe kụ ẹdi ịikpo ọdi ạaghian.

⁵ Ọdi atom ghan ẹzegh kụ reḍiemi kụ ạto mọ aḍuugh ẹdaph.

⁶ Mem lọ ọdi asophe, ade phọ epiigha; aḍiphogh ọdi reḍighi ghan dị areelhe phọ reekpereghan ghan. Ạraaḅaraph phọ ẹrol ghan bọ kꞌagee-pọ meetughuḍian; aroogbolom kꞌạsia kꞌạsia phọ meḅi ẹki ude, aroogbolom mọ ọdi arelhe ghan bọ geedi phọ.

⁷ Mị ụmiin ni awe aKusan ọmoogh oghiilaan kụ awe ạMidian okper kper.

⁸ Ạriphiiny phọ kụ iḍighi ịdi ephin ologhi ạna ḍụghum, Ọmoogh-we? Ọphiiny ạbazi kụ aḍighi nyịna ịlo ophin ologhi ḍụghum? Nạ ụzoghi ạnyu ọotu; ọotu oghim mọ kụ oghuugh, ịdipho nạ aruomaan bọ ọkpar opu weye ạna.

⁹ Nạ uukolobian oḍighinom ạkumugh phọ ạna, ạnya ọraḅal ịkpina phọ ạna. Ọmeephian ạna aḅom de phọ apoghoghomi.

¹⁰ Mem dị ạraaḅaraph phọ ẹmiin nyịna, bịdi eekpereghan; ạmuum ạḍua okuaḍio phọ ameleghu. Ạrumuum mọ edi bọ ologhi ade phọ imoogha ni, kụ oologh ạbidi aphooph ạghi ạnyu.

¹¹ Etenom mọ ịkpina phọ ạna reten bọ rꞌonmeeghu ọsoph ạna rạmuanan bọ, erumuḍio phọ rꞌụnwanyu phọ ẹmeera sim.

¹² Nạ arelhe aten de phọ rꞌịnyaam esi ophin ologhi; rꞌọghagh ologhi kụ ẹdi nạ ạazeghi reelhe phọ.

¹³ Nạ ụghi ọphel awe anyina, ọphel ọdaam mọ nạ ạsaḅar bọ. Nạ ạgur alher oḍiemiom ạbuo ạsipioghom mọ kụ aagulemi bụmatuan phọ ọdi.

¹⁴ Ịkpina ạna ephunyi oḍiemiom awe ẹgham mọ ọdi mem dị eru mụdi oghim ọowalami ayoor, rꞌọnmoghoghoom ghan mụdi ạbuphe rọgbiphoghom ghan bọ rukulom reten ịbooghian.

¹⁵ Nạ ạrol ạnyu ạrusu ẹgham mọ ạna kụ ạazeghi igbogh ạriphiiny phọ kụ amuboom ạmuum amitiom oopha.

¹⁶ Mị ạnaghan oomo ịphen, kụ akper kper; ịidoronhu epiigha rꞌaḍiigu. Aloor ạmi edugh kụ ạrada ạmi reekpeteghaan ude phọ. Mị kaḅoorian ni kụ akori mem mọ mọ eru mem dị Ẹnaan kẹliom bọ bụphe uzuom bọ iyoor.

¹⁷ Ghạlamo ireeny ạfig phọ ị́moogh mun rughuuny kụ iimuma ị́tol loor iizin avain phọ, ghạlamo ireeny ọliv phọ ímitiom mun mụnum kụ iizo phọ ímuum mun ịbiakpa, ghạlamo oomo iyool-ịga imuughu ni kụ ịyaar ílho sịphe ạsidol ạsinam,

¹⁸ mị kạḅile ni ạmoogh iboh rꞌọḅaal ologhi loor esi dị Ọmoogh-we Ẹnaan phọ kụ ọpelia ạmi.

¹⁹ Ọmoogh-we phọ rụngo ghan ịmi ịikpo. Ọdi ạkparami ruwol ạmi ịdipho ọnuen, aḍighi ịdi mị rákpetaan ghan, kụ aḍighi ịdi ịyaar ịmi ị́ḅogh sịphe ạraaḅaraph phọ.