Fạilimon 1 - Ạḍinya Iigbia

¹ Mị ạPol phọ aghol bọ Jịzos Kraist kụ odi bọ ikoli phọ, rꞌaTimoti ọnyo asiya phọ ayira, kụ ụge ḍịnya phọ ạḍien roruomaan nyịna ooḅi ạFailimon ooḅi ọyaghiri rꞌọḅarama phọ ayoor,

² rꞌạbuo ạsiosi phọ rookpomoghan ghan bọ kꞌạna ọoḅereghi Ẹnaan, ḅịle rꞌAfia umarani phọ ayira, rꞌẠrkipos ọpo rꞌayoor robianaan ghan bọ Kraist.

³ Ạḍiseph rꞌẹepho kꞌẸnaan Ọde phọ ayira, rꞌạJizos Kraist Ọmoogh-we phọ, ịrolonaan inyina!

Ẹphomoghian phọ rꞌomeeraam mọ ạFailimon

⁴ Fạilimon ọnyo asiya ạmi, tọrobo amem lọ mị rạaḅereghi, mị raghol ghan ni nyịna kạngo ḍịseph Ẹnaan phọ ạmi,

⁵ ịdi eḍighi bọ mị rạnaghan ghan ni ịdi nạ ạphomoghian oomo awe phọ Ẹnaan rꞌịlo omeeraam mọ nạ ạmoogh bọ esi ạJizos Ọmoogh-we phọ.

⁶ Mị rạaḅereghi ghan mọ ạmuḅoph phọ yoor ọmoogh bọ rꞌạna esi omeeraam mọ ụngo ni iyira ogey ọnaghanan tọrobo aruunmo ịpe eḍighi bọ ịlo ayira esi aKraist.

⁷ Mị rạngo ghan ni ḍịseph Ẹnaan, ịdi eḍighi bọ ẹphomoghian phọ ạna ọnyo asiya ạmi, mịngo ịmi iboom iboh rꞌạkpo ologhi, ịdipho nạ mạkparami bọ iloghi oomo awe phọ Ẹnaan.

Ịlom ọloghonaan ạḍighaagh Ọnesimos

⁸ Mị aghol ịphen phọ, ọbo mị kaḅom ni ẹmhu, ịdipho mị aru bọ ni ọnyo asiya ạna esi aKraist, ạto ạḅeni nyịna mọ ḍighi ịpe ẹkpe bọ.

⁹ Kụ loor esi ẹphomoghian, meḍighi ịlom, ọbo ọkaraghi ạmi ạPol phọ ạJizos Kraist ạlogh bọ ọokpaany phọ kụ aghol bọ ẹmhu phọ ọdi odi ikoli phọ nyịidipho, ạḅile ghụn ni rạaḅereghian nyịna.

¹⁰ Mị akol ẹmhu Ọnesimos, ọpo mị ạsighe bọ sịen otu ikoli phọ aḍighi mọony phọ ạmi esi omeeraam mọ, kụ rạaḅereghian bọ nyịna.

¹¹ Mem dị meten, nạ ọ́moogh ịyaar oḍighinom ọdi, kụ nyịidipho ọdi mạmoogh ịyaar oḍighinom esi ạna rꞌạmi.

¹² Ọnesimos phọ mị maḅulemi bọ raruom nyịna ạkan ni ologhi ạmi iboom.

¹³ Ọbo mịḅaal li ologhi ạmi ọwile lọ ọdi kạrol ẹphen aghol ẹmhu ạna ukumu ghan ịmi sịen mị ạtuan bọ ooḅi ọghaaph phọ kụ odi bọ ikoli phọ.

¹⁴ Kụ ịmi ị́ḅeeraan lọ ọdi kụrolan ịmi dị mị ḍụghum ọnhu ạna ụ́naghan mọ nạ ameeraam ni. Ịḅeeraan ghụn ịmi dị nạ kạsighe ophooph ologhi kụ ameeraam mọ ọdi ạrol ẹphen ụlhoghonaan ịmi ḍịghaagh.

¹⁵ Iini sịen Ọnesimos ạḍua kꞌạna mọony amem mọ ạmuen pịdi ọdi ạḅile aḅula ạrolan nyịna kꞌagee-pọ,

¹⁶ ịdi eḍighi bọ nyịidipho ọdi kẹ́bene mun bịn, mapu ẹbene maḍighi ooḅi ọnyo asiya esi aKraist. Ọdi ạman ni ịyaar iboom esi ạmi. Kụ kạman ni ịyaar iboom apuemi esi ạna, ịdi eḍighi bọ ọdi maḍighi ẹbene ạna rꞌọnyo asiya esi Ọmoogh-we phọ.

¹⁷ Esi ịduon phọ, ịdipho nạ mạsighe bọ ni mọ mị ọnyo asiya ạna ni, pọ ḅịle ni ạloghoma nyọdi ịdipho nạ ụloghoma bọ ni ịmi.

¹⁸ Mọ ọdi aḍighi nyịna ịkaraph mụghumo kẹn ale ọmugh ạna, pọ gbiighi ạḅam ẹmhu ạmi.

¹⁹ Sịen mị ạsighe ḍịghaagh ạmi kụ rạgeom mọ: Mị ạPol kaḅulemian ni nyịna ọmugh ạna lọ ọdi ale. (Ọbo mị kạ́bile kẹn ọghiom ạna ologhi mọ ọkaraghi aghuḍum mọ ạna rꞌaloor ọmugh ạmi dị nạ alhe.)

²⁰ Loor ịphen phọ, ọnyo asiya ạmi, seseeny, kol ḍien Ọmoogh-we phọ aḍighi ịphen phọ ụngo ịmi. Tụan ịduon yira oru bọ bụo asiya esi aKraist, aḍighi ịdi ologhi ạmi kasoor.

²¹ Ḍịnya phọ ạḍien mị ạge bọ raruomaan nyịna mị aḍuom ni ologhi mọ nạ kaḍighi ni apuemi ịpe mị rạwa bọ.

²² Ḅịle kẹn, ụ́bile ghan ookolobian esi oseenaan ạmi, loor esi dị mị aḍuom ni ologhi mọ Ẹnaan kẹnaghanan ni ịiḅereghi oomo phọ anyina mị ạḅile atu ịteeny inyina.

Eekuna aḍipuru

²³ Ẹpafras, ọpo rꞌạmi oghol bọ ẹmhu ạJizos Kraist kụ odi bọ ikoli phọ, mapuru nyịna.

²⁴ ẠMak rꞌẠristakos rꞌaDimas rꞌaLuk, ạbuḅarama phọ ạmi mopuru kẹn ni nyịna.

²⁵ Ooḅi ọghor phọ kꞌạJizos Kraist Ọmoogh-we phọ ịrolonaan inyina!