Ẹzra 9 - Ạḍinya Iigbia

Ẹzra ạnaghan ịlo oophinighan rꞌạbudi úḍighi bụo aJu

¹ Mem dị moḍighi oomo phọ ịphen, abuniin abuḍiemiom awe phọ Ịzirel oru kụ ụḅeni ịmi mọ awe phọ, ariil ạrikia phọ rꞌạbuo aLivai phọ úseere siloor ạbidi ọgbatanaan esi awe areelhe phọ etuman bọ: bụphe Amon rꞌạMoab rꞌIjipt, Kenan, Hịtait, Pẹrezait, Jebusait rꞌẠmorait. Bịdi uḍighi ghan igina phọ ịkaraph ạraraar phọ ịpe awe phọ ạbuphe phọ oḍighi bọ.

² Awe aJu phọ uphinogh ruuruen ạnmariir, kụ esi ịduon phọ awe aruukuan phọ Ẹnaan mọphu. Abuḍiemiom mọ rꞌạbuo ịtooghi phọ kụ ụkaraghi bọ ọpioman.

³ Mem dị mị ạnaghan bọ ịphen phọ, mị ụphanyi rukpe ạmi esi dị oḍuom ologhi ịmi ụ́rol mun, arunyi sịlaal ạmi rꞌọleem ạmi kụ ạrol ude loor oboom ọto.

⁴ Mị ụrol sịphe ạto ghan tụtu ẹteeny mem ẹkia adulhe phọ, kụ awe omiigh ookpomoghan okitonom ạmi — oomo ạbuphe ọmoogh bọ okpereghaan loor esi ịpe Ẹnaan phọ Ịzirel mẹḅem bọ ịlo ịkaraph phọ ạbuphe mọḍua bọ rạmha ọmiinom kụ origheel.

⁵ Mem dị ẹteeny mem ẹkia adulhe phọ, mị aḅetenu sịphe mị ạrol bọ rạto ghan, kụ mị akpuḍian rꞌarukpe phọ ạmi ẹphanyu bọ esi ịiḅereghi kụ ạrar rạghaagh ạmi ạghiom Ọmoogh-we Ẹnaan phọ ạmi.

⁶ Mị ạḅem: “Sey Ẹnaan, umugholoor ạmi ạpughan ophoophe ẹmhu ạmi sịphe esomanan ạna. Ịkaraph ayoor meekpomoghan eḍighi egu epel rụmhu ayoor; mephoph esi ẹpe ạsike phọ.

⁷ Emiigh kꞌasiḍughul otu ạburude ạburude ayoor tụtu kꞌạnyiidipho, yoor awe phọ ạna mọpioghom iboom. Loor ẹmhu ịkaraph ayoor, ạbudaam mọ ayoor rꞌariil ạrikia phọ ayoor momeel oḍigh rạghaagh aruuruen ạbudaam dị mụkanyan iyoor, omi, kụ otool ọḍuanam oḍighi bụo ikoli. Mọkaraghi ụngo iyoor eekuna aroofola, kụ yoor odimom bọ kꞌarodon.

⁸ Nyịidipho esi ekulha amem, nạ Ọmoogh-we Ẹnaan phọ ayoor mụnma iyoor ighirigiir kụ aḍighi ịyaar dị abuniin ayoor okpetenaan dọl ạrebene kụ ọrol ẹereegh sịen esi iigbia phọ ẹphen. Nạ mụtagharan iyoor dọl ạrebene kụ ụngo iyoor kumoom aghuḍum.

⁹ Yoor uḍighi rẹbene, kụ nạ iyoor ụ́wile dọl ạrebene. Nạ uḍighi ịdi ạbudaam mọ aPasia ọmoogh ḍịḅeeraan ayoor kụ omeera mọ yoor ọrol li ọghi risigh rꞌọḅile ọlogh Otu Ịiḅereghi phọ ạna, ọpo oḅomoghi bọ, rꞌọwa ạdol ẹereegh sịen Juda rꞌaJeruselem.

¹⁰ “Kụ nyịidipho, Ẹnaan, eeghe kụ ẹdi yoor kọḅem esi oomo ịpe memite bọ? Yoor ụ́naghanan mun kẹn ịtooghi phọ

¹¹ ịpe nạ ụngo bọ iyoor esi abutelhedom mọ ạna, riil phọ. Bịdi ụḅeni ni iyoor mọ ade phọ yoor rọki bọ orugh eḍighi de dị ị́ḅaal ịdi eḍighi bọ awe phọ orugh bọ sịphe ade phọ omuzeḍi ịkaraph ạraraar iboom emiigh eniin eekuna ẹghi esi ẹpheri phọ.

¹² Bịdi ụḅeni iyoor mọ rꞌamem yoor kúuphinighan rꞌawe phọ ạbuphe ḅịle rꞌamem kụ́loghonaan ḍịghaagh bịdi ọghi aghisigh mꞌọkpar opu eru mạar dị yoor ọwa ni olhe ịma ade phọ kụ otene ọngo oghiil atum oghiil ayoor kꞌagee-pọ.

¹³ Ghạlamo amem mọ oomo ạraraar mimitenaan bọ iyoor esi ọliom ịlo ịkaraph rꞌạsipioghom mọ ayoor, yoor olegheri mọ nạ Ẹnaan phọ ayoor mụlhiom iyoor ịdi ị́man ịpe yoor ọkpianaan bọ kụ mameeraam mọ yoor oḍum.

¹⁴ Ika nụun kụ ịdi yoor kọḅile bọ ọḅitonaan ịtooghi phọ ạna kụ oophinighan rꞌịkaraph awe phọ ạbuen? Eru mạar dị yoor ọḅile ọḅitonaan nyịna, nạ kạkagh ni ologhi iboom dị nạ kuphiemi ni iyoor ạmadan kụ kámeera oniin aḍum.

¹⁵ Ọmoogh-we Ẹnaan phọ Ịzirel, nạ aseleman ni kụ nạ mameera mọ yoor oḍum. Yoor ootuma apum mọ ayoor ọngo nyịna: yoor ụ́moogh elhiom oru ịsiphe esomanan ạna.”