Ẹzra 8 - Ạḍinya Iigbia

Awe phọ ọḍua bọ iiruen ạramha origheel

¹ Ḍịen kụ ạḍikool aruwo ẹmhu aropolo phọ ạbuphe mọrol bọ rạmha ọmiinom ẹpe Bạbilonia kụ origheel bọ rꞌẸzra ẹpe Jeruselem mem mọ ọpo Atazakzis aḍighi bọ ọdaam mọ:

^2-14 Gersom, ọpo ọto phọ ạFinehas Dạniel, ọpo ọto phọ Itamar Hatus ọony aSekanaya, ọlo ọto aDevid Zẹkaraya, ọlo ọto phọ aParos ra 150 awe ạbuo ọto ọdi (ịge ịlo ạburude ạburude ạbidi ịrol li) Eliehoenai ọony aZerahaya, ọlo ọto aPahat Mọab, ra 200 awe Sekanaya ọony ạJahaziel ọlo ọto aZatu, ra 300 awe Ebed ọony ẠJonatan, ọlo ọto Adin, ra 50 awe Jesaya ọony Atalaya, ọlo ọto Ilam, ra 70 awe Zẹbadaya ọony ạMaikel, ọlo ọto aSefataya, ra 80 awe Obadaya ọony ạJehiel, ọlo ọto aJoab, ra 218 awe Selomit ọony aJosifaya, ọlo ọto aBani, ra 160 awe Zẹkaraya ọony aBebai, ọlo ọto aBebai, ra 28 awe Johanan ọony aHakatan, ọlo ọto Azgad, ra 110 awe Elifelet, Jẹwel rꞌaSemaya, ạbuo ọto Adonikam, ra 60 awe (bịdi ụnuun utigheel aani) Utai rꞌaZakur, ạbuo ọto aBigvai, ra 70 awe

Ẹzra ạwa bụo aLivai Otu Ịiḅereghi phọ

¹⁵ Mị uukpomoghi oomo aḍita phọ ọgbal akoroma phọ ọpo akil bọ ạghi ẹpe ẹmha phọ Ahava, kụ yoor odoghoḍi rugbogo kụ ọrol sịphe ịraar aḍughul-otu. Mị ụmiin ni mọ ariil ạrikia ụrol li sịphe aḍita phọ kụ ạbuo aLivai ụ́tol.

¹⁶ Mị urom ạghiom esugha abuḍiemiom mọ: Eliezer, Ạriel, Semaya, Ẹlnatan, Jarib, Ẹlnatan, Netan, Zẹkaraya rꞌaMesulam, rꞌịyal ạbutughemia, Joyarib rꞌẸlnatan.

¹⁷ Mị ụghiom bịdi Ido, uwo ẹmhu aḍita awe ẹpe Kasifia, opuru ọdi rꞌạbuphe rꞌọdi roḍighi bọ iiḍighi phọ, ạbuo iiḍighi ịsiphe Otu phọ, mọ uruom iyoor we okumu ghan sịphe Otu Ịiḅereghi phọ.

¹⁸ Esi ạghusan Ẹnaan, bịdi uruom iyoor Serebaya, oye dị ạmanam, ọlo aLivai sịphe ọto aMahli. Aḍioph rꞌọphaanya ạnmuny ọdi rꞌabumor ọdi uru aani ni rꞌọdi.

¹⁹ Bịdi ụḅile kẹn ni ọghiom Hasabaya rꞌaJesaya bụo ọto aMerari rꞌịyaldi asiya ạbidi.

²⁰ Esi ọḅaram ụrol kẹn ni 220 ạbuo iiḍighi dị bụrude ạburude phọ ạbidi aDevid ọdaam mọ ạson bọ amitiom dị oru aani ọloghonaan ghan ḍịghaagh bụo aLivai sịphe Otu Ịiḅereghi phọ. Siḍien ạbidi ụgooghi ni.

Ẹzra aḍiemiom we phọ esi ạdol ọkoony rꞌịiḅereghi.

²¹ Ẹpe ọgbal aKoroma Ahava, mị ụto ni ạngo mọ oomo phọ ayoor ọrol ọkoony kụ osooromi loor ghisigh Ẹnaan phọ ayoor kụ kẹn opuru ọdi ịlo oḍiemiom ayoor mem erelhe phọ ayoor kụ ọoḅaki ayoor rꞌạnmuny ayoor rꞌoomo ịpe yoor ọmoogh bọ.

²² Mị ụmoogh ni umugholoor ọlom ogbogh ọdaam mọ ḍita ạbulo kokiilom rụsu lọ kụuḅaki iyoor esi ạbumulogh-ḍien mem erelhe phọ ayoor, ịdi eḍighi bọ mị mạḅeni nyọdi mọ Ẹnaan phọ ayoor rạseph ghan tọrobo oye lọ ameeraam esi ọdi, ḅịle mọ ọdi rạmoogh ghan ni ḍikia kạḅile ạliom tọrobo oye lọ akiton ạḍua esi ọdi.

²³ Esi ịduon phọ yoor ụrol dọl ọkoony kụ ọoḅereghi Ẹnaan ọoḅaki ayoor, kụ ọdi ạphagharanaan ni ịiḅereghi phọ ayoor.

Inmo ịlo Otu Ịiḅereghi phọ

²⁴ Sịphe igbo abuḍiemiom ariil ạrikia phọ, mị ụsaḅar ri Serebaya, Hasabaya rꞌaḍioph ạbunon.

²⁵ Reru reten, mị ụto amitiom ẹemor asilva phọ, gol phọ rꞌạraraar ịisa phọ ịpe ogbogh ọdaam mọ, bụo oroma rꞌịtooghi phọ ọdi, rꞌawe phọ Ịzirel mọngo bọ ịlo oḍighinom ịsiphe Otu Ịiḅereghi phọ.

^26-27 Ịphen kụ ịdi mị ạngo bọ bịdi: silva — 22 ọkaraghi igbogh ịtoom ẹemor 100 ạraraar ịisa — 70 igbogh ọtoom ẹemor agol — 3,400 igbogh ọtoom ẹemor 20 ạrukpa agol — 8.4 igbogh ọtoom ẹemor enaba — ịyal ịma ạrukpa, dị eeleeny ḍighi ạrukpa agol

²⁸ Mị ụḅeni bịdi mọ, “Nyina eḍighi we iigbia esi Ọmoogh-we phọ, Ẹnaan ạburude ạburude phọ anyina; ịdipho phọ kẹn oomo ạraraar ịisa dị ọlemom silva rꞌagol ịpe awe phọ ọngo bọ Ẹnaan rꞌophooph ologhi keḍighi aani ni rạraar iigbia esi anyina.

²⁹ Ịmaar ẹeḅaki bịdi tụtu nyina esi Otu Ịiḅereghi phọ. Sịphe ologhi osoph oyil ạrikia phọ, mẹtooghi ẹemor phọ kụ ẹḅogh ẹlogh rạghaagh abuḍiemiom ariil ạrikia phọ rꞌạbuo aLivai phọ rꞌabuḍiemiom awe phọ Ịzirel sịphe Jeruselem.”

³⁰ Pọ kụ amem dị ariil ạrikia phọ rꞌạbuo aLivai phọ ọsighe silva phọ rꞌagol phọ rꞌạraraar ịisa phọ ọghimom sịphe Otu Ịiḅereghi phọ ẹpe Jeruselem.

Origheel phọ ẹpe Jeruselem

³¹ Aḍio phọ iḍighi ḍioph rꞌịyal aḍughul-otu ọḅel ụnwanyu phọ kụ ẹdi yoor ọḍua bọ Koroma Ahava ogheel aJeruselem. Ẹnaan phọ ayoor ịrolan ni iyoor kụ ikpeki iyoor esi ịiḅaghami ạbumulogh-ḍien rꞌesi awe ininika ịduon yoor rotelhe bọ.

³² Mem mọ yoor osi bọ Jeruselem, yoor uphooghian ịraar aḍughul-otu.

³³ Omuneniom inya aḍio kụ ẹdi yoor ọghi osi Otu Ịiḅereghi phọ, ọtooghi ẹemor asilva phọ, gol phọ rꞌạraraar ịisa phọ, kụ ọḅogh ọlogh ḍịghaagh aMeremot oyil ạrikia phọ, ọony aYuraya. Rꞌọdi ọrol bọ Ẹliazar ọony ạFinehas rꞌịyal ạbuo aLivai, Jọzabad ọony aJesua rꞌaNoadaya ọony aBinui.

³⁴ Ugbi ni tọrobo ịyaar ọḅile olegheri ẹemor phọ, kụ ogbi ọge ghan.

³⁵ Oomo ạbuphe mọḍua bọ iiruen ạramha phọ origheel ụsighe ni ịnam oruom ịdipho ạrikia ịlo ọphinyon ọngo Ẹnaan phọ Ịzirel: 12 alephiri ạsinam ịlo oomo phọ Ịzirel, 96 idughuna ra 77 ạnmuny iyool-ịga ḅịle ra 12 ịga ịlo oselemiom asiloor ạbidi esi ịkaraph. Oomo ịnam mọ ịphen uguom nịan eḍighi rịkia ọngo Ọmoogh-we phọ.

³⁶ Bịdi ọḅile ọsighe ḍịnya phọ ạḍiphe ogbogh ọdaam mọ ạngo bọ bịdi kụ ọngo ruwo ẹmhu rꞌạbuo ịtooghi ịsiphe eelhe phọ aYufratis ạga phọ ọpo erumuḍio phọ remeel ghan bọ. Ịphen reten, awe phọ ạbuen ụlogh ni ḍịghaagh ọngo we phọ rꞌịiḅereghi sịphe Otu Ịiḅereghi phọ.