Ẹzra 7 - Ạḍinya Iigbia

Ẹzra asi Jeruselem

¹ Ịbadi ạsia reten, mem dị Atazakzis aḍighi ọdaam mọ aPasia, oye ạrol li dị oghol mọ Ẹzra. Ọdi ạgo bụrude ạburude phọ ọdi aḅulemi ọman asi kꞌEeron ogbogh oyil ạrikia phọ ịduon: Ẹzra aḍighi ọony aSeraya, ọony Azaria, ọony ạHilkaya,

² ọony aSalum, ọony ạZedok, ọony Ahitub,

³ ọony Amaraya, ọony Azaria, ọony aMerayot,

⁴ ọony aZerahaya, ọony Uzi, ọony aBuki,

⁵ ọony Abisua, ọony ạFinehas, ọony Ẹliazar, ọony Eeron.

^6-7 Ẹzra aḍighi oye ịtuugha dị ạmoogh ogey olegheri-ịyaar ịlo Ologh, ọpo Ọmoogh-we Ẹnaan phọ Ịzirel mạngo bọ Mozis. Loor esi dị Ẹzra ạmoogh bọ ḍịseph ạḍiphe Ọmoogh-we Ẹnaan phọ ọdi, ọdaam mọ ạngo ni nyọdi tọrobo ịyaar lọ ọdi apuru ọmoogh. Lhạ phọ ạḍiphe emuneniom bọ oḍual esi ọda phọ Atazakzis, Ẹzra ạḍua ni amite sịphe Bạbilonia ogheel aJeruselem rꞌaḍita Ịzirel dị ẹḅaram riil ạrikia, bụo aLivai, bụo ạsuor rꞌareephegh Otu Ịiḅereghi phọ, bukoriom mọ rꞌạbuo iiḍighi.

^8-9 Bịdi ụḍua Bạbilonia ḍịḅel aḍughul-otu ọḅel ụnwanyu phọ, kụ rꞌọloghonaan ạḍighaagh Ẹnaan, bịdi usi ni sịphe Jeruselem ḍịḅel aḍughul-otu ụnwanyu phọ ọpo aḍighi bọ oogh phọ.

¹⁰ Ẹzra mạḅogh loor ọdi ạngo ọtuugha Ologh Ọmoogh-we phọ rꞌooko ghan ọdi, ḅịle rꞌọtughemi ghan awe phọ Ịzirel oomo iilogh rꞌịtooghi phọ ọdi.

Ạḍinya phọ ḍịphe Atazakzis ạngo bọ Ẹzra

¹¹ Atazakzis ạngo ḍịnya phọ aḍien Ẹzra, oyil ạrikia rꞌoye ịtuugha phọ, ọpo ạmoogh bọ ogey olegheri-ịyaar ịlo iilogh phọ rꞌịtooghi phọ ịpe Ọmoogh-we phọ mạngo bọ Ịzirel:

¹² “Ẹḍua kꞌAtazakzis ogbogh ọdaam mọ rọkiom Ẹzra oyil ạrikia rꞌoye ịtuugha phọ ịsiphe Ologh Ẹnaan kꞌạke phọ.

¹³ “Mị ạto mọ sịphe oomo eelhe ọda phọ ạmi oomo awe phọ Ịzirel, ariil ạrikia rꞌạbuo aLivai dị ịduon phọ ẹḅeeraan ogheel rꞌạna ẹpe Jeruselem.

¹⁴ Mị, ọḅaram rꞌoḍual ạbuo oroma phọ ạmi, orom nyịna ọghi oḅiligha ịpe ạraraar edi bọ ẹpe Jeruselem rꞌaJuda ọwaaghi ophogh mụghumo awe phọ rooko ni Ologh phọ ọpo Ẹnaan phọ ạna mẹḅogh bọ ẹngo nyịna.

¹⁵ Nạ kạsighe ni rꞌạna inmo agol rꞌasilva phọ ịpe mị rꞌạbuo oroma phọ ạmi rọwa bọ ọngo Ẹnaan phọ Ịzirel, nyẹpe Otu Ịiḅereghi phọ ọdi odi bọ ẹpe Jeruselem.

¹⁶ Nạ kạḅile kẹn ạsighenom oomo asilva rꞌagol ịpe nạ aakoroghi bọ oomo ịsiphe eelhe phọ ạBabilon rꞌinmo phọ ịpe awe phọ Ịzirel rꞌariil ạrikia phọ ạbidi ọngo bọ ịlo Otu Ịiḅereghi Ẹnaan phọ ạbidi ẹpe Jeruselem.

¹⁷ “Nạ kamiigha loor kụ aliom ikpoki phọ ịphen kụ akoom ilephiri ạsinam, idughuna, nmụny iyool-ịga, ịbiakpa rꞌamiim kụ ẹphinyonom rịkia ạnyu enmeny sịphe Otu Ịiḅereghi phọ ẹpe Jeruselem.

¹⁸ Ẹnighe ni dị nạ kaḍighinom silva rꞌagol phọ ọpo asugha bọ tọrobo ịyaar lọ ẹḅeeraan nyịna rꞌạbueri phọ awe ẹmha phọ ạna, ọdaphan ịpe kẹḅeeraan bọ Ẹnaan phọ anyina.

¹⁹ Nạ kạngo Ẹnaan ẹpe Jeruselem oomo ạrukpa phọ ịpe mọngo bọ nyịna ịlo oḍighinom iiḍighi sịphe Otu phọ.

²⁰ Kụ tọrobo ẹnon ịyaar dị nạ rạwa, nạ kạmoogh sịphe otu ikpoki ọdaam mọ.

²¹ “Mị ạto ạngo oomo ạbuo iiḍighi ịsiphe otu ikpoki phọ sịphe eelhe phọ aYufratis ạga phọ ọpo erumuḍio remeel ghan bọ ọnuun ọngo Ẹzra, oyil ạrikia rꞌoye ịtuugha ịlo Ologh Ẹnaan kꞌạke phọ tọrobo ịyaar lọ ọdi apuru bịdi,

²² ẹghi esi ḍiigbu 3,400 igbogh ọtoom ẹemor asilva, 10,000 igbogh ọtoom ẹemor ịbiakpa, 2,000 aruuku amiim, 2,000 aruuku ạmunum-ọliv, rꞌạtorobo aboph lọ kạkasian.

²³ Gona ni loor igey ọngo ạtorobo ịyaar dị Ẹnaan kꞌạke phọ rạwa ịlo Otu Ịiḅereghi phọ ọdi ọbo ọdi kạmooghom ghan bọ ọghagh ologhi esi ạmi ḅịle mꞌạbuphe kọda bọ mem dị mị mamugh.

²⁴ Kẹ́boor ghan iisogh ariil ạrikia phọ, bụo aLivai phọ, bụo ạsuor rꞌareephegh phọ, bukoriom mꞌọnon ọlo agbolomaam Otu Ịiḅereghi phọ ọphon.

²⁵ “Nạ, Ẹzra, ḍighinom olegheri-ịyaar phọ Ẹnaan phọ ạna mạngo bọ nyịna, sọn amitiom bupoghom iiḍighi rꞌabuugboom ịiruen dị kọda oomo awe phọ ạbuphe ooko bọ Ologh Ẹnaan phọ ạna sịphe eelhe phọ aYufratis ạga phọ ọpo erumuḍio phọ remeel ghan bọ. Mạar ạtughemi tọrobo ọlo úlegheri Ologh phọ ọpo.

²⁶ Oye lọ úuko iilogh Ẹnaan phọ ạna mꞌiilogh ịsiphe eelhe ọda phọ, oye phọ ọpo kọnuun ni ọliom: iini esi aḍuugh mꞌophorogh mꞌọsighiogh aruphua ọdi mꞌọlogh ikoli.”

Ẹzra aboom ni Ẹnaan

²⁷ Ẹzra ạḅem: “Boom Ọmoogh-we Ẹnaan ạburude ạburude phọ ayoor! Ọdi maḍighi ịdi ogbogh ọdaam mọ mameeraam oghueni areten phọ ịphen Otu Ịiḅereghi Ọmoogh-we phọ ẹpe Jeruselem.

²⁸ Esi ạghusan Ẹnaan, ọdaam mọ rꞌạbuo oroma phọ ọdi rꞌoomo ikpolom ạbuo ịtooghi phọ ọdi mọmoogh ḍịḅeeraan esi ạmi; Ọmoogh-we Ẹnaan phọ ạmi mụngo ịmi ạkpo ologhi, kụ mị marue ạkpaariom ịbadi aruwo ẹmhu aropolo Ịzirel origheel rꞌạmi.”