Ẹzra 4 - Ạḍinya Iigbia

Okikima ọḅile ọlogh Otu Ịiḅereghi phọ

¹ Ạbumulogh-ḍien phọ awe phọ aJuda rꞌạBenjamin ụnaghan ni mọ ạbuphe ọḍua bọ rạmha ọmiinom mọ kụ origheel mọḅile rọlogh Otu Ịiḅereghi Ọmoogh-we Ẹnaan phọ Ịzirel.

² Esi ịduon phọ bịdi ọghi ọmiin Zẹrubabel rꞌaruwo ẹmhu aropolo phọ kụ ọḅeni mọ, “Yoor kịdaphan inyina esi ọlogh Otu Ịiḅereghi phọ. Yoor rooseeny ghan ni egina phọ Ẹnaan phọ nyina reeseeny ghan bọ, kụ yoor rọngo ghan kẹn ni inmo ạrikia nyọdi emiigh kꞌamem Esar Hadon ogbogh ọdaam mọ Asiria, urughemi bọ iyoor sịen.”

³ ẠZerubabel, aJosua rꞌoomo aruwo ẹmhu aropolo phọ ọḅeni bịdi mọ, “Yoor ụ́wa ọlogh ạḍighaagh anyina esi ọlogh Otu Ịiḅereghi Ọmoogh-we Ẹnaan phọ ayoor. Yoor kọlogh ni rꞌaloor ayoor, ọkaraghi ịdipho ạSairos ogbogh ọdaam mọ aPasia ạto bọ ụngo iyoor.”

⁴ Pọ kụ amem dị awe phọ ạbuphe orugh bọ sịphe ade phọ ọwa reten ọphue iloghi ạbuo aJu phọ rꞌokikima ạbidi ọlogh eegu oḍighi phọ.

⁵ Bịdi ụḅile kẹn ni oti ọman bụo ịtooghi aPasia ọmiin mọ oḍighi phọ ọ́ghi mun risigh. Bịdi uḍighi ghan ịphen phọ bịn oomo phọ ọda phọ ạSairos kụ ẹghi ẹteeny ọda phọ ạDarios.

Okikima ọḅile ọlogh aJeruselem

⁶ Sịphe emiighom ọda phọ aZakzis ọdaam mọ, ạbumulogh-ḍien awe phọ orugh bọ sịphe Juda rꞌaJeruselem ụsighe ni rịnya dị ọge ọgba ịkaraph awe phọ aJuda rꞌaJeruselem oru.

⁷ Ḅịle kẹn, sịphe ọda phọ Atazakzis ọdaam mọ aPasia, aBislam, Mitredat, Tabeel rꞌạbuphe oḍighan bọ bịdi ụge ni ḍịnya ọghiom ọdaam mọ. Ḍịnya phọ ụge ọnhu Aramaik kụ ọgba ịpe ọge bọ mem dị mạal.

⁸ Ḅịle kẹn, aRehum ọdaam eelhe phọ rꞌaSimsai ọgeeghiom ạrinya eelhe phọ ụge ni ḍịnya phọ ạḍien ọghiom Atazakzis ịlo aJeruselem:

⁹ “ARehum ọdaam eelhe phọ rꞌaSimsai ọgeeghiom ạrinya eelhe phọ rꞌạbuphe oḍighan bọ bịdi, abuugboom ịiruen phọ, rꞌoomo ạbueri phọ ạbuo ịtooghi phọ, bụen phọ ụḍua Erek, Bạbilon rꞌạSusa sịphe ade phọ Ilam kụ oru bọ sịen,

¹⁰ ọḅaram rꞌạbueri phọ awe phọ ạbuphe Asurbanipal, ogbogh ophelegbe phọ, aphorogh bọ amitiom sịphe asimarugh phọ ạbidi kụ ọḅile bọ orugh sịphe ẹmha phọ aSameria rꞌịnon arikpisi sịphe eelhe aYufratis ạga phọ ọpo erumuḍio phọ remeel ghan bọ; oomo phọ ayoor kụ rọge ḍịnya phọ ạḍien koruom nyịna.”

¹¹ Ịphen kụ ịdi ạḍinya phọ rẹkaaph bọ: “Yoor abutelhedom mọ ạna sịphe eelhe aYufratis ạga phọ ọpo erumuḍio phọ remeel ghan bọ kụ ụge ḍịnya phọ aḍien ọkiom Atazakzis ogbogh ọdaam mọ.

¹² “Igbogh phọ ạna, yoor rọwa dị nạ kalegheri mọ ạbuo aJu phọ ạbuphe ọḍua bọ ịpheri phọ areelhe ọda phọ ạna kụ oru morugh Jeruselem kụ ọḅile kẹn rọlogh ẹkaraph ẹmha ẹ́naghanan phọ ẹphen. Bịdi momiigh ọḅile ọlogh iikpe phọ kụ mọony ẹnum amem kọmadan ni.

¹³ Igbogh phọ ạna, eru mạar dị ọḅile ọlogh ẹmha phọ ẹphen rꞌiikpe phọ ọmadan, awe phọ kọbile ọkpe ghan iisogh, kụ ikpoki ạna ọdaam mọ egbem.

¹⁴ Nyịidipho, loor esi dị igbogh phọ ạna kụ riphogh iyoor, yoor ụ́wa ọmiin mọ ịphen emite, kụ esi ịduon phọ yoor ọotughian

¹⁵ mọ tọ ạngo oḅiligha ophogh ịpe ọgeeghi bọ oghiil atum oghiil oseere bọ. Eru mạar dị nạ aḍighi ịduon, nạ kạmiin ni dị ẹmha phọ ẹphen tọrobo amem ẹmha ọḅaar ẹmhu kụ kꞌageedi amem mọ meten bọ mẹngo ghan ịiḅaghami rạalha rꞌạbuo ịtooghi areelhe phọ. Awe ẹmha phọ oomo amem ọkpar ọda. Ịphen kụ iḍighi bọ ịyaar phọ ophiemi bọ ẹmha phọ.

¹⁶ Esi ịduon phọ yoor omeeraam mọ, eru mạar dị ọḅile ọlogh ẹmha phọ ẹphen rꞌiikpe phọ ọmadan, Igbogh phọ ạna kátue mun ạpamaghan eelhe phọ aYufratis ạga phọ ọpo erumuḍio phọ remeel ghan bọ.”

¹⁷ Ogbogh ọdaam mọ ạghiom ọphagharanaan phọ ọphon: “Rehum ọdaam eelhe phọ rꞌaSimsai ọgeeghiom ạrinya eelhe phọ rꞌạbuphe oḍighan bọ bịdi orugh bọ Sameria rꞌịpheri phọ ạramha eelhe aYufratis ạga phọ erumuḍio phọ remeel ghan bọ, mipuru inyina.

¹⁸ “Ḍịnya phọ nyina eruom bọ mạal kụ ọgba ụḅeni ịmi.

¹⁹ Mị ụngo ni ịto ịlo oḅiligha ophogh, kụ igey ni ọwa ni ọmiin mọ emiigh kꞌageedi amem mọ meten bọ aJeruselem ụ́naghanan ghan bụdaam esi ịtooghi kụ mọ ẹ́naghanan rꞌịiḅaghami kụ imuza esi ọdi.

²⁰ Ạbudaam dị ọmoogh ịikpo mọda ni ẹpe kụ ọtooghi ghan ọngo oomo eelhe aYufratis ạga phọ ọpo erumuḍio remeel ghan bọ, ọbunyi ghan iisogh rꞌikpoki.

²¹ Esi ịduon phọ, ịto ẹḅeni we phọ ạbuphe mọ osophe ọḅile ọlogh ẹmha phọ tụtu mị ạngo ịnon ịtooghi.

²² Iḍighi ịphen phọ egina amem ọbo eḍighi ịlo ịkaraph kémite esi ạmi.”

²³ Ịduon ạal bọ ḍịnya phọ aḍien ẹḍua bọ esi Atazakzis eru ọḅeni Rehum, Simsai rꞌạbuphe oḍighan bọ rꞌạbidi, bịdi uugborion ni osi Jeruselem kụ ọkpaariom bụo aJu phọ osophe ọḅile ọlogh ẹmha phọ.

Oḍighi ịsiphe Otu Ịiḅereghi phọ ạḅile amiigh

²⁴ Oḍighi ịsiphe Otu Ịiḅereghi phọ usophe ni kụ ạrol bịn aḅoorian tụtu ẹteeny lhạ phọ ạḍiphe emuneniom bọ ịyal esi ọda phọ ạDarios ogbogh ọdaam mọ aPasia.