Ẹzra 3 - Ạḍinya Iigbia

Ooseeny ạbile amiigh

¹ Rẹteeny ụnwanyu phọ ọpo amuneniom bọ oḍual phọ, oomo awe phọ Ịzirel morugh sịphe ạramha phọ ạbidi. Pọ kụ amem dị oomo phọ ạbidi ookpomoghan sịphe Jeruselem,

² Kụ aJosua ọony ạJehozadak, rꞌạbueri phọ ariil ạrikia, rꞌạZerubabel ọony ạSialtiel, ọḅaram rꞌasiya ọdi, ọḅile ọkan enmeny Ẹnaan phọ Ịzirel, ọbo bịdi oguom nịan rịkia ạnyu ịsiphe phọ ọdaphan ịtooghi phọ ọge bọ sịphe ologhi Ologh phọ aMozis, oye kꞌẸnaan phọ.

³ Ghạlamo ịdipho ạbuphe ọḍua bọ iiruen ạramha phọ origheel oghiilaan bọ ni we phọ orugh bọ sịphe ade phọ, bịdi ụḅile ni ọkan enmeny phọ ẹḅel esi phọ ẹrol ghan bọ. Pọ kụ amem dị bịdi ọḅile omiigh tọrobo ạḍiroor rꞌadulhe ọphinyon ghan ạrikia oguom nịan.

⁴ Bịdi ule ghan ẹyaal arugbogo ọdaphan ịtooghi phọ; tọrobo aḍio bịdi ụphinyon ghan rịkia phọ ịpe eḍighi bọ ịlo aḍio phọ ạḍiphe;

⁵ Kụ esi ọḅaram bịdi ụphinyon ghan ni rịkia oguom nịan, oomo phọ ịdi rꞌịpe ẹyaal omoom ụnwanyu rꞌịpe ịpheri phọ rọpinyon ghan bọ tọrobo amem lọ awe ookpomoghan ịlo ooseeny Ọmoogh-we phọ, ḅịle rꞌoomo inmo phọ ịpe ọngo bọ Ọmoogh-we phọ rꞌophooph ologh.

⁶ Ghạlamo ịdipho awe phọ kőmiigh bọ ni ọḅile ọlogh Otu Ịiḅereghi phọ, bịdi umiigh ḍịḅel aḍughul-otu ụnwanyu phọ ọpo amuneniom bọ oḍual phọ ọphinyon rịkia oguom nịan ọngo Ọmoogh-we phọ.

Ọḅile ọlogh Otu Ịiḅereghi phọ amiigh

⁷ Awe phọ ụngo ni ikpoki ọkpe ạbuphe rọsighe ghan bọ ipoḍi asighiigh phọ kọḅiirom rꞌạbukaam ạmaka phọ kụ ọngo eḍien rꞌamiim rꞌạmunum-ọliv ọsighe ọghi ẹpe ạramha phọ aTaya rꞌaSaidon esi oonmenenom ọsaga ịpe ẹḍua bọ Lẹbanon kụ eru, dị arughuugh ạbazi kẹsaany esiemi Jọpa. Oomo phọ ịphen phọ uḍighi esi ịikpo phọ ịpe ạSairos ogbogh ọdaam mọ aPasia ạngo bọ.

⁸ Iru ni emite dị bịdi omiigh oḍighi oḍighi, ạlha phọ ạḍiphe bịdi origheel bọ osi esi phọ Otu Ịiḅereghi phọ ạrol bọ sịphe Jeruselem reru reten, ụnwanyu phọ ọpo amuneniom bọ ịyal phọ, bịdi omiigh oḍighi oḍighi. ẠZerubabel rꞌaJosua rꞌạbueri phọ awe ẹmha phọ ạbidi, ariil ạrikia phọ rꞌạbuo aLivai — dị ọkpe úlho, oomo ạbuphe ọḍua bọ rạmha ọmiinom origheel Jeruselem uḍighan ni ọḅophoghan sịphe oḍighi phọ. Ụḅogh ni ịtooghi oḍighi ọḅile ọlogh Otu Ịiḅereghi phọ ọngo tọrotoro ọlo kꞌaLivai dị mạman ịyaldi ạsia mụghumo mạkpo apel sịphe.

⁹ AJesua ọlo kꞌaLivai rꞌạnmuny ọdi rꞌasiya ọdi, ḅịle rꞌạKadmiel rꞌạnmuny ọdi (ạbuo ọto phọ kꞌaHodavaya) uḍighan ni ọḅophoghan esi ophogh ghan oḍighi ọḅile ọlogh Otu Ịiḅereghi phọ. (Ạbuo aLivai phọ, bụphe ọto phọ kꞌaHenadad ụlhoghonaan ni bịdi ḍịghaagh.)

¹⁰ Mem dị awe phọ omiigh bọ ophighi ephighiom Otu Ịiḅereghi phọ, ariil ạrikia phọ ụkpologhian ni rụsuoma phọ ạbidi kọrol riisi phọ ạbidi rꞌạrukuodu sịphe ạraghaagh phọ ạbidi, kụ ạbuo aLivai bụphe ọto phọ Asaf ọmeera sịphe rꞌipoḍi ạsigbagba iitia. Bịdi ọseph Ọmoogh-we phọ ọdaphan ịtooghi phọ ịpe ọḅogh bọ ọlogh ḍịghaagh ạbidi kꞌamem mọ aDevid aḍighi bọ ọdaam.

¹¹ Bịdi ụmoor ghan ni sụor oboomiom Ọmoogh-we phọ; úsoph mem ọmoor ghan mọ, “Ọmoogh-we phọ ạnighe ni, kụ ẹphomoghian ọdi esi Ịzirel edi ghan ni kꞌagee-pọ.” Tọrobo oye ạlho rꞌeboom ẹḍogh ọseph ghan Ọmoogh-we phọ ịdi eḍighi bọ mophighi ephighiom Otu Ịiḅereghi phọ.

¹² Ịbadi ikumoor awe ariil ạrikia phọ, ạbuo aLivai phọ rꞌaruwo ẹmhu aropolo ụmiin ni ọḅel Otu Ịiḅereghi phọ, kụ ịduon bịdi ọmaar bọ ophogh ịdi ropighi ephighiom Otu Ịiḅereghi phọ ọphon, bịdi umoghi ni. Kụ ạbueri phọ ạbuphe ọrol aani bọ sịphe ụlo ni rꞌibo.

¹³ Oye órue ọ́gbarion ịlooghi iboh rꞌịlooghi emoghi ịdi eḍighi bọ ọyugh phọ ạbidi ạghi ni ạnyu iboom dị ọnaghan ni oomo arikpisi.