Ẹzra 10 - Ạḍinya Iigbia

Ogbiighi ịlo okunughi oophinighan rꞌạbudi úḍighi bụo aJu

¹ Ịdipho Ẹzra azuman bọ rạaḅereghi esomanan Otu Ịiḅereghi phọ ramoghi kụ raatuma ịkaraph phọ ịphen, aḍiboom aḍita ạbuo Ịzirel — lephiri, nmạriir rꞌịbam ạnmuny, uukpomoghan ni okitonom nyọdi romoghi yogh egey emoghi.

² Pọ kụ amem dị aSekanaya ọony ạJehiel ọpo ọto Ilam, ạḅeni Ẹzra mọ, “Yira mọka omeeraam rꞌẸnaan esi ophin aruuruen ạnmariir, kụ ghạlamo ịduon phọ ni, oḍuom ologhi ạḅile ni odianaan Ịzirel.

³ Nyịidipho yira ọmoogh ọkaraghi oguanaan Ẹnaan phọ ayira mọ yira koporogh yogh ni nmạriir phọ ạbuen rꞌạnmuny phọ ạbidi ọḍua. Yoor koḍighi ni tọrobo ịlo nạ rꞌạbueri phọ ạbuphe oghueni bọ ịtooghi Ẹnaan phọ uroma bọ iyoor oḍighi. Yoor koḍighi ni ịpe Ologh Ẹnaan phọ rạwa bọ.

⁴ Ịphen edi esi ạna oḍighi. Yoor odi ni ọman ạna; esi ịduon phọ kịa risigh kụ ạmiin mọ oḍighi ni.”

⁵ Esi ịduon phọ, ẹḅel ịyaar dị Ẹzra aḍighi — ọkpaariom mọ abuḍiemiom ariil ạrikia phọ rꞌạbuo aLivai phọ oghunya mọ bụno koḍighi ni ịpe aSekanaya magbiighi bọ.

⁶ Pọ kụ esi dị ọdi ạḍua sịphe esomanan Otu Ịiḅereghi phọ ạghi ologhi asimarugh aJehohanan ọony Eliasib, kụ ạrol sịphe ḍughul phọ akururu iboom esi ẹ́moogh omeeraam mọ ạbuphe ọḍua bọ iiruen ạramha origheel. Ọdi eḍien ólhe, ịyaar ọ́phughol.

⁷ Adom ịghi ni oomo aJeruselem rꞌaJuda mọ oomo ạbuphe mọḍua bọ iiruen ạramha origheel kookpomoghan sịphe Jeruselem

⁸ esi ịto abuḍiemiom awe phọ. Eru mạar dị oye ạrol dị úmeera útu esi ịraar aḍughul-otu, oomo aruphua ọdi kobum ni ọsighe kụ ọdi katoph ni elhiom ọdi oḍighi ọlo ẹmha phọ.

⁹ Esi ịraar aḍughul-otu phọ, ḍio dị emuneniom ịyaldi esi ụnwanyu dị amuneniom esugha, oomo alephiri phọ orugh bọ sịphe ade phọ aJuda rꞌạBenjamin oru ẹpe Jeruselem kụ ookpomoghan sịphe erugh Otu phọ. Ạkaraghi ni rạloph iboom kụ loor esi aḍio phọ rꞌephigh ookpomoghan phọ tọrobo oye akpereghaan ni.

¹⁰ Ẹzra oyil ạrikia phọ ạmeera ni kụ ạḅaanaan bịdi. Ọdi ạḅem: “Nyina ị́moogh omeeraam kụ mẹsighe apum ẹngo Ịzirel esi ophinogh aruuruen ạnmariir.

¹¹ Nyịidipho, iituma ịkaraph anyina esi Ọmoogh-we Ẹnaan ạburude ạburude phọ anyina, kụ eḍighi ịpe ẹḅeeraan bọ nyọdi. Ịgbatanaan siloor anyina esi aruuruen phọ orugh bọ sịen ade phọ ayira kụ ephorogh yogh ruuruen ạnmariir phọ anyina.”

¹² Awe phọ ọlo kụ ọphagharanaan, “Yoor koḍighi ni tọrobo ịlo nạ ạḅem.”

¹³ Kụ bịdi ọḅaram, “Aḍita phọ ẹbugh ẹpughan kụ ọlophia rạloph ni iboom. Yoor kọ́meera sịen ephoghoghoony phọ. Ẹphen kị́yaar dị koḍighi esi aḍiniin mꞌịyal aḍughul-otu, ịdi eḍighi bọ ịbadi ayoor odi ni esi ịkaraph phọ ịphen.

¹⁴ Meera ạbuo ịtooghi phọ ayoor ọrol sịen Jeruselem kụ ọpham ọghaaph phọ. Reten, meera tọrobo ọlo ạmoogh ooruen ạnir aru mem dị ogu, ọḅaram rꞌabuḍiemiom mọ rꞌabuugboom ịiruen ịsiphe ẹmha phọ ọdi. Ịduon phọ kụ ẹdi ọghagh ologhi Ẹnaan esi ạdol phọ ạḍien kakunian.”

¹⁵ Awe dị ọgbagharan igbiighi phọ ụ́tol emuton ạJonatan ọony Ạsahel rꞌaJazeya ọony aTikva, bụdi uḍighan Mesulam rꞌaSabetai ọlo kꞌaLivai.

¹⁶ Bụphe ọḍua bọ iiruen ạramha phọ origheel omeeraam ogbi phọ. Esi ịduon phọ Ẹzra oyil ạrikia phọ ạson we amitiom sịphe ogbo aruwo ẹmhu aropolo phọ kụ ạge siḍien ạbidi. Ḍịḅel aḍughul-otu ụnwanyu phọ ọpo amuneniom bọ ḍioph phọ bịdi omiigh oḅiligha ophogh,

¹⁷ kụ esi ịpheri phọ ịraar ụnwanyu phọ bịdi oḅiligha ophogh oomo asighiton awe dị ọpham ruuruen ạnmariir.

Awe phọ ọpham bọ ruuruen ạnmariir phọ

¹⁸ Ḍịen kụ ạḍikool awe phọ ạbuphe ọpham bọ ruuruen ạnmariir phọ: Ạbupinyon rịkia, ọge ọtuan ropolo: Opolo aJosua rꞌabumor ọdi, ạnmuny ạJehozadak: Maaseya, Eliezer, Jarib, rꞌaGedalaya.

¹⁹ Bịdi uguanaan ọgbaranaan ạnmariir phọ ạbidi, kụ bịdi ọphighiron odughuna ịdipho ẹkia ẹlo ịkaraph ạbidi.

²⁰ Opolo Imer: Hanani rꞌạZebadaya

²¹ Opolo Harim: Maaseya, Ilaija, Semaya, Jẹhiel, rꞌUzaya

²² Opolo aPashur: Elioenai, Maaseya, Ịsmael, Nẹtanel, Jọzabad, rꞌElasa

²³ Ạbuo aLivai: Jọzabad, Simei, Kelaya (ọḅile ghan oghol mọ aKelita), Petahaya, Juda, rꞌEliezer

²⁴ Ạbuo ạsuor rꞌareephegh: Eliasib Abukoriom Otu phọ: Salum, Telem rꞌUri

²⁵ Ạbunon: Opolo aParos: Ramaya, Iziya, Malkaija, Mijamin, Ẹliazar, Malkija, rꞌaBenaya

²⁶ Opolo Ilam: Matanaya, Zẹkaraya, Jẹhiel, Abdi, Jeremot, rꞌIlaija

²⁷ Opolo aZatu: Elioenai, Eliasib, Matanaya, Jeremot, Zabad, rꞌAziza

²⁸ Opolo aBebai: Jehohanan, Hananaya, Zabai, rꞌAtlai

²⁹ Opolo aBani: Mesulam, Maluk, Adaya, Jashub, Sial, rꞌaJeremot

³⁰ Opolo aPahat Mọab: Ạnda, Kelal, Benaya, Maaseya, Matanaya, Bẹzalel, Binui, rꞌạManase

^31-32 Opolo aHarim: Eliezer, Isija, Malkaija, Semaya, Sịmion, Bẹnjamin, Maluk, rꞌaSemaraya

³³ Opolo aHasum: Matenai, Matata, Zabad, Elifelet, Jeremai, Mạnase, rꞌaSimei

^34-37 Opolo aBani: Maadai, Ạmram, Ụel, Benaya, Bedeya, Keluhi, Vanaya, Meremot, Eliasib, Matanaya, Matenai, rꞌaJaasu

^38-42 Opolo aBinui: Simei, Selemaya, Netan, Adaya, Maknadebai, Sasai, Sarai, Ạzarel, Selemaya, Semaraya, Salum, Amaraya, rꞌạJosef

⁴³ Opolo aNebo: Jẹyel, Matitaya, Zabad, Zebina, Jadai, Joel, rꞌaBenaya

⁴⁴ Oomo awe phọ ạbuen ụmoogh ruuruen ạnmariir. Bịdi ụgbaranaan bịdi kụ oḍighi ịdi bịdi rꞌạnmuny ạbidi ọḍua.