Ẹzra 1 - Ạḍinya Iigbia

ẠSairos ạto mọ ạbuo aJu phọ origheel

¹ Ḍịḅel ạlha phọ ạḍiphe ạSairos aḍighi bọ ọdaam mọ aPasia, Ọmoogh-we phọ aḍighi ịpe ọdi mạḅem bọ, ẹḍua bọ esi aJerimaya oyil phọ kụ eru emite. Ọdi ạkpaariom ni Sạiros ọlogh ologh dị kọge ọkiomonaan tọrobo ekpisi sịphe eelhe phọ ọdi mọ ạal:

² “Ịphen kụ ịto phọ ạSairos ogbogh ọdaam mọ aPasia. Ọmoogh-we Ẹnaan kꞌạke phọ, muḍighi ịmi ọdaam oomo areelhe ịsien aḅirini phọ kụ mạḅogh oḍighi ọlogh Otu Ịiḅereghi ọlo ọdi ẹpe Jeruselem ẹpe Juda ụngo ịmi.

³ Ẹnaan ẹrolan oomo phọ anyina bụphe oḍighi bọ we phọ ọdi! Nyina kẹki ẹpe Jeruselem kụ ẹḅile ẹlogh Otu Ịiḅereghi Ọmoogh-we Ẹnaan phọ Ịzirel, Ẹnaan phọ rooseeny ghan bọ ẹpe Jeruselem.

⁴ Eru mạar dị tọrobo oye ọdi dị odi iiruen ạwa ọloghonaan ạḍighaagh origheel, amatuman phọ ạbidi kụ kọngo bịdi ọloghonaan ạḍighaagh phọ ọphon. Bịdi kọngo bịdi silva rꞌagol, ruphua rꞌịnam adool ḅịle rꞌinmo dị kọngo sịphe Otu Ịiḅereghi Ẹnaan ẹpe Jeruselem.”

⁵ Pọ kụ amem dị aruwo ẹmhu aropolo arughunughun aJuda rꞌạBenjamin, ariil ạrikia phọ rꞌạbuo aLivai, rꞌạtorobo ọnon ọlo Ẹnaan mẹḅogh ekpom ọdi, ookolobian ọghi ọḅile ọlogh Otu Ịiḅereghi Ọmoogh-we phọ ẹpe Jeruselem.

⁶ Oomo phọ amatuman phọ ạbidi ụlhoghonaan ni bịdi ḍịghaagh esi ọngo ạbidi ịbadi ạraraar: rạraar asilva ọsaam eḍien, gol, ruphua, ịnam adool, ịnon ạraraar dị ẹman ikpoki, rꞌinmo ịlo Otu Ịiḅereghi phọ.

⁷ ẠSairos aḅulemi ạngo bịdi rụkpa rꞌạraraar ọphugholom mọ ịpe ạNebukadnezar ọdaam eelhe phọ ạsighe bọ sịphe Otu Ịiḅereghi phọ ẹpe Jeruselem kụ mạlhogh bọ sịphe otu iigbia ạrumugh phọ ọdi.

^8-10 Ọdi ạlogh bịdi ḍịghaagh aMitredat, ọpo rapogh ghan bọ ruphua phọ kꞌọdaam mọ, dị ạge oomo phọ ịdi aseenaan Sesbazar, ọpo ạda bọ Juda: ạrukpa agol ịlo inmo 30 ạrukpa asilva ịlo inmo 1,000 ịnon ạrukpa 29 ịbam ạrukpa agol 30 ịbam ạrukpa asilva 410 ịnon ạraraar ịisa 1,000

¹¹ Esi ookpomoghi, 5,400 ạrukpa agol rꞌasilva rꞌịnon ạraraar dị aSesbazar ạsighe bọ rꞌọdi mem mọ ọdi rꞌạbueri phọ ạbuphe ọrol bọ dọl ọmiinom ọḍua bọ Bạbilon kụ ogheel Jeruselem.