Esta 5 - Ạḍinya Iigbia

Esta ạmagh ọdaam mọ rꞌaHaman oru olhe egbogh ẹyaal

¹ Ḍio dị emuneniom ịraar esi ạdol ọkoony phọ ọdi, Esta ạkpologhian iinmenan ạnir ọdaam ẹmha mọ kụ ạghi ạmeera sịphe erugh ogiga ạrol bọ rapogh bọ osoph ọdaam mọ. Ọdaam mọ odi ologhi ạtol sịphe ạgada ọdaam ẹmha phọ rapogh ghan eḍighom mọ.

² Mem dị ọdaam mọ ạmiin bọ Esta ukueni-ạnir dị ạmeera erugh, ọdi ạmoogh ḍịḅeeraan esi ọdi, kụ ọdi asele amitiom ạngo nyọdi ẹḅu agol phọ. Ịphen reten, Esta aru amite kụ ạḅogh ẹpe eekuna ẹḅu phọ ọdi.

³ Ọdaam mọ apuru mọ, “Eeghe, Esta ukueni-ạnir? Ụḅeni ịmi ịpe nạ rạwa bọ bịn nạ kạmoogh ni — ghạlamo eḍighi mạar dị eru oolemi odi eelhe ọda phọ ạmi.”

⁴ Esta ạphagharanaan mọ, “Eḍighi mạar dị ẹḅeeraan Igbogh Ạna, kịḅeeraan ịmi dị nạ rꞌaHaman koḍighi bụo ạḍimagh ạmi ḍughul phọ arodon esi egbogh ẹyaal dị mị riikolobianaan inyina.”

⁵ Pọ kụ esi dị ọdaam mọ ạto mọ aHaman ạnuun aru ọbo bịdi ọghi ḍịmagh phọ Esta. Esi ịduon phọ ọdaam mọ rꞌaHaman ụghi ni ẹyaal phọ Esta.

⁶ Rọmeleghi rimiim mọ, kụ ọdaam mọ apuru Esta, “Ụḅeni ịmi ịpe nạ rạwa bọ, kụ mị kạkuom ni nyịna ịyaar lọ nạ ạzua, ghạlamo eḍighi mạar dị eru oolemi odi eelhe ọda phọ ạmi.”

⁷ Esta ạphagharanaan mọ

⁸ “Eḍighi mạar dị Igbogh phọ ạna ẹmoogh ni ọnma ighirigiir dị ạmanam ọngo ịlom mọ ạmi, kịḅeeraan ịmi dị nạ rꞌaHaman koḍighi bụo ạḍimagh ạmi iḍue esi ẹnon ẹyaal dị mị kiikolobianaan inyina. Amem mọ ạmuphe kụ ẹdi mị kạḅeni nyịna ịpe mị rạwa bọ.”

AHaman amite ezue oghiigh aModekai

⁹ Mem mọ aHaman ạḍua bọ sịphe olhe ẹyaal phọ ọdi ạḅaal li ologhi kụ ạrol rꞌibo. Kụ ọlo mem mọ ọpo ọdi ạmiin bọ aModekai sịphe eḍighom ogiga ọdaam mọ dị úḅetenu ụḅile ụlogh eegu ịdipho ọdi raten bọ, aHaman ạghagham ni nyọdi ologhi iboom.

¹⁰ Kụ ọlo ọdi ạphamaghan ni loor ọdi kụ agheel ologhi otu. Reru reten, kụ ọdi ạmagh rịghiri ọdi oru kꞌọdi kụ ạḅeni Zeres ạnir phọ ọdi ọghi ọḅophoghan rꞌạbidi.

¹¹ Ọdi aatuma risigh ạbidi ịlo ẹelha dị ọdi ạmoogh rꞌọnhu alephiri ạnmuny dị ọdi ạmoogh, rꞌịdi ọdaam mọ maphoophe nyọdi aseere ḍigbogh ạdol, rꞌịdi ọdi mạḅile ạman mạar apu bụeri phọ ạbuo iiḍighi kꞌọdaam mọ.

¹² “Ịdi epu sịphe,” AHaman ạghaaphom ni mọ, “Ukueni-ạnir Esta alhe ni ẹyaal dị ạmagh ọdaam mọ rꞌạmi bịn, kụ ụmagh ni iyoor ọḅile ọghi iḍue.

¹³ Kụ ọlo rꞌeniin esi ạraraar phọ ịphen dị ẹman ịyaar esi ạmi ílho dị mị rạmiin ni kạghiom risigh aModekai ọlo aJu phọ dị ạrol sịphe eḍighom ogiga ọdaam mọ.”

¹⁴ Esi ịduon phọ ạnir ọdi rꞌoomo ạrighiri ọdi ogbiighi kụ ọḅeni nyọdi mọ, “Uḍighi ika kụ nạ ọ́ka bọ esi osinogh awe dị ẹman ịyaldi rꞌịyal akuḅu ḍiphoph? Iḍueneen ḍịroor, kịa ạaḅereghian ọdaam mọ mọ ạto ạngo we mọ osin aModekai sịphe ạnyu phọ. Ḍighi ịduon kụ nạ ạki ẹyaal phọ rꞌọḅaal ologhi.” AHaman agbiighi mọ ọphon ogeny oroma kụ ạto ạḅeni we mọ ọlogh esi osinogh phọ.