Esta 4 - Ạḍinya Iigbia

AModekai ạlom ọloghonaan ạḍighaagh esi Esta

¹ Mem dị aModekai alegheri bọ oomo ịpe moḍighi bọ, ọdi ạphanyi ni rukpe ọdi loor amukum ologhi. Ịphen reten kụ ọdi ạkpologhian iinmenan ọto, aakpereghiom ẹmhu ọdi ọoru kụ arelhe ạḅeeny ẹmha phọ, amoghi ghan ạghiom ạnyu rꞌeghiḍim ologhi,

² tụtu ọdi asi ọnhu-aḍibuo ịsiphe ogiga ọdaam mọ. Ọdi óḍigh ologhi ịdi eḍighi bọ oye ólho dị ạkpologhian iinmenan ọto dị komeera mọ aḍigh ologhi.

³ Sịphe oomo ạriikpigh areelhe phọ, tọrobo ekpisi dị mogananami ịge ọdaam mọ, oboom okururu ạrol li ogbo aweye aJu phọ. Bịdi ọrol dọl ọkoony, emoghi rꞌịlooghi, kụ ogbogh opol ạbidi ọkpologhian iinmenan ọto kụ ọmina esi ọoru.

⁴ Mem dị ạnmanyaan rꞌaroophoony awe phọ Esta ọḅeni nyọdi ịpe aModekai raḍighi bọ, ịiḅaghami ni nyọdi iboom. Ọdi ạghiomonaan Modekai ịnon arukpe ọkpologhian kpạripe rꞌịlo ọto kụ ọdi ómeera ọsighe.

⁵ Ịphen reten, ọdi ạmagh Hatak, oniin oophoony oye ịsiphe otu ọdaam mọ dị ọdaam mọ ạma otelhedom ọdi, kụ ạḅeni nyọdi ọghi esi aModekai kụ ọwa omitiom ịpe remite bọ rꞌịyaar phọ eḍighi bọ.

⁶ AHatak ạghi ạteeny Modekai sịphe egbogh erugh ẹmha phọ sịphe aḍibuo otu ọdaam mọ.

⁷ AModekai ạḅeni nyọdi oomo ịpe memitenaan bọ nyọdi, kụ ạḅaram ọkaraghi ephigh ikpoki dị aHaman maguanaan ọlogh ịsiphe otu ikpoki ọdaam mọ eḍighi mạar dị ọze oomo ạbuo aJu.

⁸ Ọdi ạngo Hatak opoḍi ạḍinya igbeel phọ dị mọghiom ẹpe Sụsa dị egbolomaam bọ ọzeeghi ạbuo aJu phọ. AModekai ạḅeni nyọdi mọ ạsighe ạghiom Esta, ạghaaph ịpe ạdol phọ edi bọ ạḅeni nyọdi, ạḅile ạlomom mọ ọdi ạghi ạaḅereghian ọdaam mọ mọ ọdi ạnma ighirigiir we phọ ọdi.

⁹ AHatak aḍighi ni ịduon phọ,

¹⁰ kụ Esta ạngo nyọdi dom mọ aḍien ọsighe oḅulemi ọghiom aModekai:

¹¹ “Eḍighi mạar dị tọrobo oye, mꞌolephiri mꞌạnir, kụ ạghi sịphe ọkaraghi ologhi ogiga phọ kụ ạmiin ọdaam mọ dị útom ọghiom mọ aru, oye phọ ọpo kokiigh ni. Ọpo kụ ologh phọ; tọrobo oye, emiigh bụo oroma ọdaam mọ kụ ẹteeny we phọ ịsiphe ạriikpigh areelhe phọ, olegheri ni ịpe phọ. Edi bọ eniin eten bịn ẹlo okiton ologh phọ ọphon: eḍighi mạar dị ọdaam mọ asele amitiom ẹḅu agol phọ ọdi aphoghomi tọrobo oye, pọ aghuḍum oye phọ ọpo mạrol. Kụ ọlo mẹman ni oniin ụnwanyu kꞌamem mọ ọdaam mọ arom bọ uruom ịmi ọghi.”

¹² Mem dị aModekai ạar bọ dom mọ Esta,

¹³ ọdi ạghiom nyọdi ọphur ạruru phọ ọphon: “Kạ́atughian mọ nạ ạmoogh ni pẹleeny apu bụeri phọ awe aJu phọ loor esi dị nạ odi bọ sịphe ogiga ọdaam mọ.

¹⁴ Eru mạar dị nạ aḅoorian mem dị ẹrol ịduon, pọ ọloghonaan ạḍighaagh kạḍua ni kꞌạke atu ạteeny we aJu phọ, kụ kạpel li bịdi, kụ ọlo nạ kamugh ni bịn eghun ọde phọ ạna mesi eekuna. Ghạlamo ịduon ni — ạnhian kụ alegheri — ịduon sịen ịtuan mem mọ ạmuen kụ oḍighi bọ nyịna ukueni-ạnir ẹmha phọ.”

¹⁵ Esta ạphagharanaan kụ ạḅeni aModekai ịduon:

¹⁶ “Kịa aakpomoghi oomo ạbuo aJu phọ sịphe Sụsa eniin esi. Ịkaagh ẹḍogh ịiḅereghinaan ịmi. Kéle ḅịle kẹ́pughol rꞌeniin ịyaar esi ịraar ootaany rꞌaḍughul. Abutelhedom ạnmanyaan ạmi rꞌạmi koḍighi ni iniin phọ. Ịpe reten, mị kạki ni kꞌọdaam mọ, ghạlamo eḍighi ni ịdi ologh phọ úmeeraam. Eru mạar dị kughiigh ịmi loor esi oḍighi ịphen, pọ mị ạnya ni omugh.”

¹⁷ Pọ kụ esi dị aModekai ạḍua kụ aḍighi tọrobo ịyaar dị Esta ạḅeni nyọdi oḍighi.