Ẹmos 9 - Ạḍinya Iigbia

Ịiruen dị Ọmoogh-we phọ kaagbo

¹ Mị ụmiin ni Ọmoogh-we phọ dị ạmeera ọgbal enmeny ạrikia phọ. Kụ ọdi ạto ạḅem mọ, “Ịgurogh rọko otu iigbia phọ pịdi iḅidi ạnyu phọ emeleghu kụ ịḅaghaghaam mọ ebunughian. Iḅonyon ẹsighiogh ịdi ịpherepe kemeleghuom rụmhu awe phọ. Bụeri phọ, mị kạze bịdi mem ẹgham. Rꞌoniin oye kạ́ḍua; rꞌoniin oye kásuma.

² Ghạlamo bịdi uguph ọghi okputon ọmar iḍim, mị kasiph ni bịdi. Ghạlamo bịdi ụsiiny kụ osi kꞌạke, pọ mị kasoore ni bịdi ude.

³ Mụghumo bịdi ụsiiny ạnyu Eegum ạKarmel, mị kạwa ni bịdi asiphi. Ghạlamo bịdi ughiilaan ịmi kụ ọghi ạaghian ude ọphiiny, pọ mị katom ni egbogh ẹnam ọphiiny phọ mọ elom ni bịdi.

⁴ Mụghumo ẹpomoghian mạsighe ni bịdi akeelom ẹnon eelhe ọmiinom ạdol iiruen, pọ mị kạḅeni ni mọ ọze bịdi. Mị ạnya ni ophiemi ạbidi, kọ́lhoghonaan ạḍighaagh.”

⁵ Ọmoogh-we Egbogh Ẹnaan Oomo Ịikpo phọ rạaḅoghogh ghan de phọ, kụ ade phọ epiigha; oomo ạbulo orugh sịphe ọtolom ọto. Oomo phọ aḅirini phọ rọbugh ghan ni kụ kọḅile osoorom ịdipho Ọphiiny aNail.

⁶ Ọmoogh-we phọ ạmoogh marugh ọdi kꞌạke, kụ ạsighe eḅugulu okuaḍio phọ aakpereghiom de phọ. Ọdi rạmagh ghan rụmuum ọphiiny phọ mọ eru ezuughiom ẹphen ade phọ. Aḍien phọ ọdi, Ọmoogh-we phọ.

⁷ Ọmoogh-we phọ ạḅem mọ, “Weye Ịzirel, awe phọ ạSudan ọkar ri ọman mạar esi ạmi ịdipho anyina. Ịdipho mị ạsighe bọ we phọ aFilistia ạḍuanam ẹpe aKrit ḅịle rꞌawe phọ ạSiria ẹpe Kir, ịduon kẹn kụ ịdi mị ịsighe bọ inyina amitiom ẹpe Ijipt.

⁸ Mị Ọmoogh-we Oomo Ịikpo phọ ạtol li kụ rapogh eelhe ịkaraph phọ ẹphen Ịzirel, kụ mị kapiemi ni bịdi sịen ade phọ. Kụ ọlo mị kápiemi oomo ạnmuny ạnmuny phọ ạJekob.

⁹ “Mị kạto ni ạḅem kụ apighemi we phọ Ịzirel ịdipho ịbiakpa dị rọsal. Mị kapighemi ni bịdi igbo areelhe phọ ạgbarion oomo ạbuphe ụ́moogh bọ ịyaar oḍighinom ạsighe.

¹⁰ Abuḍighinom ịkaraph sịphe ogbo awe phọ ạmi, kọze ni bịdi mem ẹgham — oomo ạbuphe ọḅem bọ mọ, ‘Ẹnaan kémeera ịkaraph ituman iyoor.’”

Ọḅile oḅulemi awe Ịzirel dọl edughom

¹¹ Ọmoogh-we phọ ạḅem mọ, “Aḍio retu ni dị mị kaḅulemi dọl ọmar phọ aDevid, ọpo ạghigh bọ ịdipho otu dị ameel kụ aagulaan. Mị kaselemi ni iikpe phọ ọdi kụ mị ạḅile aḅulemi. Mị kạḅile ni ạlogh ạkighemi ịdipho ạrol bọ mem dị meten.

¹² Kụ awe phọ Ịzirel kọkpar ri opu rạmha phọ Idom esugha bọ, ḅịle rꞌoomo areelhe phọ ịpe eḍighi ghan bọ ịlo ạmi,” Ọmoogh-we phọ kụ ạḅem, ọpo kaḍighi bọ ịdi ịphen phọ kemite.

¹³ Ọmoogh-we phọ ạḅem mọ, “Ariiḍio retu ni dị ịbiakpa kepoph epu ịdi kotue ọku, kụ iimuma avain keegborion epoph epu ịdi kotue oḍighi miim. Ạraaḅaraph phọ kekilogh ni rꞌạmuudugha amiim kụ aruugum ekiloghom aani.

¹⁴ Mị kaḅulemi ni we phọ ạmi aseere ẹpe ade phọ ạbidi. Bịdi kọḅile ni ọloghoḍi rạmha phọ ạbidi ophiemi bọ, kụ otugh pạ; Bịdi kọzuphogh ni iizo ireeny avain kụ ọpughol ghan rimiim mọ; Bịdi kọzuphogh ni ịizupha riisi aroghoony kụ ole ibugha phọ.

¹⁵ Mị kaseere ni we phọ ạmi sịphe ade phọ mị ạngo bọ bịdi, kụ kótuphuron mun bịdi ọsighe.” Ọmoogh-we Ẹnaan phọ anyina kụ ạghaaph.