Emiighom 50 - Ạḍinya Iigbia

¹ ẠJosef ạghi aghurughi ọde phọ ọdi amoghi, kụ ạkpun nyọdi.

² Kụ ạJosef ạto ạḅeni riil eekonom mọ oḍighi ịdi aḍizu ọde phọ ọdi kẹnuun ẹpu tụtu oḍi, kụ bịdi ọtuugh oḍighi.

³ Kụ rẹman inyadi aḍughul-otu, esi eḍighinom ịyaar ạbidi ịlo oḍim lọ oseere. Kụ awe Ijipt phọ omoghi nyọdi oḍualdi aḍughul-otu.

⁴ Mem dị ariiḍio okughuḍi phọ emunughan bọ, ạJosef ạghaaph ạḅeni kꞌọdaam eelhe phọ mọ, “Eru mạar dị ighirigiir ạmi risiphanaan ni inyina, pọ ịḅeninaan ịmi ọdaam eelhe phọ mọ,

⁵ ‘Ọde phọ ạmi ụḅeni ịmi mọ mị ukunya ịduon, mọ ọno amugh, mọ mị ụki uḍi nyịno ẹpe oḍi phọ ọno aguph bọ ẹpe ade phọ aKenan.’ Kụ nyịidipho mị rạaḅereghi ni nyịna mọ meera mị ụki uḍi ọde phọ ạmi ẹpe phọ kụ mị aḅula.”

⁶ Kụ ọdaam eelhe phọ ạḅeni nyọdi mọ, “Kịa ạtuugh ịpe nạ aghunya bọ aḍi ọde phọ ạna.”

⁷ ẠJosef aḅetenu ạghi oḍi ọde phọ ọdi. Oomo awe iiḍighi ọdaam eelhe phọ, ikumoor awe kꞌọdaam eelhe phọ, rꞌoomo ikumoor awe phọ Ijipt ụdaph ni Jọsef.

⁸ Kụ oomo ọto ạJosef rꞌabumor phọ ọdi, rꞌọto ọde phọ ọdi, ọghi aani. Ịbam ạnmuny, iyool-ịga rꞌạrutu-ịga, rꞌạsinam mọ ạbidi bịn kụ ịdi bịdi ụ́pam, ụwile ni ẹpe ade phọ aGosen.

⁹ Aḍita phọ ọghi bọ ụbugh ni; bụlo oḍiku rughuugh-ude, rꞌạbudi oḍiku rụsu.

¹⁰ Bịdi ọghi osi ẹpe arukue eḍien phọ ẹpe Atad, ạga emitenom erumuḍio phọ ạJodan, kụ bịdi omoghi yogh, okururu yogh. Kụ ạJosef akughuḍi ọde phọ ọdi oḍual aḍughul-otu.

¹¹ Mem dị awe eelhe phọ aKenan ọnaghan bọ ọotughu emoghi phọ, rꞌoghur ịdi awe phọ Ijipt rọkughuḍi bọ oye phọ ẹpe Atad, bịdi ọtuan ịduon phọ oghol esi phọ mọ Ebel Mizraim (ọto awe Ijipt).

¹² Ạnmuny phọ ọdi ọtuugh ịpe ọdi ạḅeni bọ bịdi oḍighi.

¹³ Ạnmuny phọ ọdi urool li nyọdi osiemi Kenan, oḍi nyọdi ẹpe asikol eḍum mọ aMakepela, ẹpe Ebraham agho bọ aḍighi ẹkaraph eḍum, esi Efron ọlo ạHitait phọ, oten bọ kụ ọteeny Mamre.

¹⁴ ẠJosef rọghi bọ roḍi ọde phọ ọdi bịn bịdi oḅula Ijipt, ạJosef rꞌabumor phọ ọdi rꞌoomo ạbuphe ọdaph bọ nyọdi.

ẠJosef ạadereghi bumor phọ ọdi

¹⁵ Mem dị abumor phọ ạJosef ọmiin bọ mọ ọde phọ ạbuno mamugh, kụ bịdi ọḅem mọ, “Oḍighom ịyaar, rolegheri ghan bọ, ạJosef kụlogh iyira ḍien uḅulemian iyira ịkaraph phọ ịpe yira oḍighi bọ nyọdi.”

¹⁶ Kụ bịdi orom ọokpaany mọ ạghi ạḅeni Jọsef mọ, “Ọde phọ ạna ụḅeni ni iyoor ịyaar kụ agbi bọ omugh,

¹⁷ mọ yoor oru ọoḅereghi nyịna mọ, ‘Seseeny, sạr ạwilenaan bumor phọ ạna ịkaraph phọ ịpe bịdi oḍighi bọ nyịna.’ Kụ nyịidipho yoor rọḅeni ghan nyịna mọ seseeny, sạr ạwilenaan ịkaraph phọ ạbuphe rooseeny ghan bọ Ẹnaan phọ ọde phọ ạna.” ẠJosef amoghi ni mem mọ ọdi ạnaghan bọ dom mọ ạḍien.

¹⁸ Kụ abumor phọ ọdi ọghi okpuḍughian ruwol ọdi kụ ọḅeni nyọdi mọ, “Yoor ạrebene ạna.”

¹⁹ ẠJosef ạḅeni mọ, “Kékiil ruugu. Mịna kụ Ẹnaan phọ? Kị́duon.

²⁰ Nyina, nyina ịitughenam ni ịmi ịkaraph, kụ Ẹnaan phọ igbiighiom ni igeny, kụ eḍighi bọ ịphen phọ, ọbo ịbadi awe ọrol ịdipho bịdi odi bọ rodon.

²¹ Nyịidipho kẹ́moogh oghiilaan. Mị kiikonom ni inyina rꞌịbam ạnmuny phọ anyina.” Kụ ọdi ạadereghi bịdi, adughe ọnhu kụ ạghaaphan rꞌạbidi.

Aḍuugh phọ ạJosef

²² ẠJosef rꞌọto ọde phọ ọdi orugh ẹpe Ijipt. ẠJosef ạman oniin okuron rꞌiḍioph ạsia.

²³ Ọdi ạmiin ni nmụny Ifraim ịraar oghiil, rꞌạnmuny bụo aMakir ọony phọ ạManase, ụmar sịphe rụgbo ạJosef.

²⁴ ẠJosef ạḅeni bumor phọ ọdi mọ, “Mị kamugh. Kụ Ẹnaan kịsighe ni inyina sịen ade phọ ạḍien asiemi ẹpe ade phọ ạḍiphe ọdi aguanaan bọ Ebraham rꞌẠizik rꞌạJekob.”

²⁵ Pọ kụ amem dị ạJosef ạto ạḅeni nmụny phọ Ịzirel mọ oghiran ịyo kụ ạḅem mọ, “Iguanaan ịmi mọ, mem dị Ẹnaan kirorori inyina esiemi de phọ ạḍiphe, nyina kẹgba ni iphorobo phọ ạmi ẹḍuanam ẹphen.”

²⁶ ẠJosef ạman oniin okuron rꞌiḍioph ạsia kụ agbi omugh. Kụ bịdi oseere loor phọ ọdi ịlo kạ́pu, kụ ọlogh igbe oḍim ẹpe Ijipt.