Emiighom 48 - Ạḍinya Iigbia

ẠJekob ạngo Ifraim rꞌạManase ọghor

¹ Ịphen phọ reten, kụ oru ọḅeni Jọsef mọ, “Aloor ọde phọ ạna ị́nighe.” Kụ ọdi ạpham Ifraim rꞌạManase, ịyal phọ ạnmuny phọ ọdi, ạghimom ọmiin ọdi.

² Mem dị ạJekob ạnaghan bọ mọ ạJosef ọony phọ ạna maru ophogh ọdi, aḅetenu ni ạrol ude sịphe ẹmina phọ.

³ ẠJekob ạḅeni Jọsef mọ, “Ẹnaan Oomo Ịikpo phọ igananami ni loor iḍeenaan ịmi ẹpe Luz, ẹpe eelhe phọ aKenan kụ ịngo ịmi ọghor.

⁴ Kụ ịḅeni ịmi mọ, ‘Mị kạngo nyịna ọoloogh ạnmuny. Nạ kạmar amuzeḍi, ạmoogh ḍita areelhe. De phọ ạḍien mị kạngo nmụny ạnmuny ạna eḍighi ẹlo ạbidi kꞌagee-pọ.’

⁵ “Kụ nyịidipho ịyal phọ ạnmuny phọ ọmaranaan bọ nyịna ẹphen Ijipt kụ mị agbi bọ oru phọ, Mạnase rꞌIfraim, ạbuo ạmi, ịdipho aRuben rꞌạSimion oḍighi bọ bụo ạmi.

⁶ Mụghumo nạ ạmoogh bụnon ạnmuny, pọ mị kạ́sighe mọ ạbuo ạmi. Erua ạbidi kẹḍua esi Ifraim rꞌạManase kụ etu.

⁷ Mị raḍighi ghan ịphen phọ loor ẹmhu onhiin phọ ạna aRechel. Ịyaar phọ eḍighi bọ ịduon: mem mọ mị ạḍua bọ ẹpe Mesopotamia ratigheel, aRechel amugh ẹpe eten aKenan, esi dị ị́kelan rꞌẸfrat. Mị uḍi ni nyọdi ọgbal eten Ẹfrat.” (Nyịidipho Ẹfrat phọ pọ ạBetilihem.)

⁸ Mem dị ạJekob ạmiin bọ nmụny phọ ạJosef, ọdi apuru ni mọ, “Bụen phọ ạbughen?”

⁹ ẠJosef ạphagharanaan mọ, “Bụen phọ ạnmuny ạmi dị Ẹnaan mịngo ịmi ẹphen Ijipt.” Kụ ạJekob ạḅeni nyọdi mọ, “Seseeny, sịghe bịdi uruom, mị ụngo bịdi ọghor.”

¹⁰ Loor ikumoor ạJekob ọ́kar mun ọ́miin eten igeny, kụ ạJosef ạsighe nmụny phọ aruom nyọdi, kụ ọdi aghurughi kụ ạḅile ạkpunogh bịdi.

¹¹ Kụ ạJekob ạḅeni Jọsef mọ, “Mị úseere ologhi ọḅile ọmiin ạna kụ Ẹnaan meḍighi ịdi mị mạmiin nmụny ạna.”

¹² ẠJosef aḅerion nmụny phọ rụgbo ạJekob, kụ azumeri ghisigh ọdi akaram ude risigh ạJekob.

¹³ ẠJosef aseere Ifraim ḍịghaagh ekeeny ạJekob, kụ aseere Mạnase ḍịghaagh elhiom.

¹⁴ Kụ ọlo ạJekob ạgbagh rạghaagh kụ ạsighe ḍịghaagh elhiom ọdi ạzuom ẹmhu Ifraim, ghạlamo ịdipho ọdi kụ aḍighi bọ ọbumoony phọ; kụ ạḅam ḍịghaagh ekeeny ẹmhu ạManase, ọpo aḍighi bọ okumoor phọ.

¹⁵ Kụ ọdi ạseph Jọsef mọ, “Ẹnaan phọ ẹpe ạburude phọ ạmi Ebraham rꞌẠizik okumu bọ ẹseph nmụny phọ ạbuen! Ẹnaan phọ ẹpe iiko bọ ịmi oomo asuḍughul-otu aghuḍum mọ ạmi, ẹteenye ḍio phọ ạḍien ẹseph bịdi!

¹⁶ Ọokpaany Ẹnaan phọ ọpo ụtagharan bọ ịmi esi oomo ịiḅaghami ạseph bịdi! Bịdi omitiom ḍien phọ ạmi rꞌaḍien ạburude phọ ạmi, Ebraham rꞌẠizik! Bịdi ọmoogh ịbadi ạnmuny rꞌịbadi ạnmuny ạnmuny!”

¹⁷ Mem dị ạJosef ạmiin bọ mọ ọde phọ ọno ạḅam ḍịghaagh elhiom ọdi ẹmhu Ifraim íkia ni nyọdi; kụ ạpham ḍịghaagh ọde phọ ọdi ịlo ọsighe ẹmhu Ifraim, ọḅam ẹmhu ạManase.

¹⁸ ẠJosef ạḅeni ọde phọ ọdi mọ, “Kị́duon, ọde ạmi. Ọphon kụ ọkpana ọony, ḅạm ḍịghaagh elhiom ạna ẹmhu ọdi.”

¹⁹ Ọde phọ ọdi ómeera, kụ ạḅem mọ, “Mị alegheri ni, mọony ạmi, mị alegheri ni. ẠManase kạmoogh ghan ni we, aḍighi ogbogh, kụ ọlo ọbam umor phọ ọdi kụ kạbugh apu nyọdi; kụ ạnmuny ạnmuny ọdi koḍighi igbogh areelhe.”

²⁰ Kụ ọdi ạseph bịdi ḍio phọ ạḍiphe kụ ạḅem mọ, “Awe Ịzirel kọsighe ghan siḍien anyina kụ ọsephom ghan we, kụ ọḅem ghan mọ, ‘Ẹnaan iḍighi aani inyina ịdipho Ifraim rꞌạManase!’” Ịduon kụ ịdi ạJekob ạsighe Ifraim ạmeremi mọ aḍiemiom Mạnase.

²¹ Pọ kụ amem dị ạJekob ạḅeni Jọsef mọ, “Nạ rạmiin bọ ni, rẹkpul dị mị kamugh; kụ Ẹnaan phọ kịrolonaan ni nyịna kụ ạsighe nyịna aḅulemi ẹpe de ạburude phọ ạna.

²² Ịdi etum pạ, nạ kábumor phọ ạna kụ ẹdi mị rạngo Sẹkem, ịma phọ ade ẹnuum mọ, ḍịphe mị ạar bọ Ạmorait rꞌelhool rꞌạkumugh ạmi.”