Emiighom 46 - Ạḍinya Iigbia

ẠJekob rꞌọto ọdi oḅerenu okeel ẹpe Ijipt

¹ Kụ Ịzirel aḅetenu aakoroghian oomo aruphua phọ ọdi ọghi erelhe phọ, ạghi asi Beersheba kụ aḍighi yogh rạraar aghuḍum ạngo Ẹnaan phọ Ạizik ọde phọ ọdi aaseeny ghan bọ.

² Ẹnaan eru esi Ịzirel ụmalha ḍughul, kụ ẹmagh mọ, “Jẹkob, Jẹkob.” Kụ ọdi ameera mọ, “Mị odi ni sịen.”

³ Kụ ọdi ạḅeni nyọdi mọ, “Mị kụ Ẹnaan, Ẹnaan phọ ọde phọ ạna. Kákiilaan ogheel ẹpe Ijipt. Mị kạbughe ni nyịna ẹpe phọ, aḍighi eboom eelhe.

⁴ Mị rạdaph ni nyịna kạghi aani ẹpe Ijipt, kụ mị kạḅile ni ạsighe nyịna aḅulemi. ẠJosef kạsighe ni rạghaagh ọdi kụ apukiom riḍien ạna.”

⁵ ẠJekob aḅetenu ẹpe Beersheba, kụ ạnmuny phọ Ịzirel ọsaany Jẹkob ọde phọ ạbidi, rꞌịbam ạnmuny phọ ạbidi rꞌạnmariir phọ ạbidi ologhi oghuugh-ude phọ ọdaam eelhe phọ ạngo bọ mọ ọghi ọsaanyom nyọdi.

⁶ Kụ bịdi ookoroghian ịnam mọ rꞌaruphua phọ ịpe bịdi ọmoogh bọ ẹpe Kenan ọghi osi Ijipt; ạJekob rꞌoomo ọto phọ kꞌọdi,

⁷ ạnmuny phọ ọdi rꞌạnmuny ạnmuny phọ ọdi, ạnmanyaan ọdi rꞌạnmuny ạnmanyaan phọ ọdi, rꞌoomo ọto kꞌọdi rꞌọdi ọghi osi Ijipt.

⁸ Ịphen kụ asiḍien ạnmuny phọ Ịzirel ogheel bọ Ijipt, ạJekob rꞌạnmuny ọdi. ARuben ọkpana ọony phọ ạJekob,

⁹ rꞌạnmuny aRuben: Hanok, Palu, Hẹzron, rꞌaKami.

¹⁰ Ạnmuny ạSimion: Jẹmuel, Jamin, Ohad, Jakin, Zohar rꞌaSaul, ọony ạnir ọlo aKenan.

¹¹ Ạnmuny aLivai: Gerson, Kohat, rꞌaMerari.

¹² Ạnmuny phọ aJuda: Sela, Pẹrez rꞌaZera (Er rꞌOnan, ạbueri phọ ạnmuny aJuda umugh ẹpe Kenan.) Ạnmuny ạPerez: Hẹzron rꞌaHamul.

¹³ Ạnmuny Ịsaka: Tola, Pua, Jashub rꞌaSimron.

¹⁴ Ạnmuny ạZebiulon: Sered, Elon rꞌaJaleel.

¹⁵ (Bụen phọ ạnmuny dị aLia ạmaranaan Jẹkob ẹpe Mesopotamia, rꞌaDaina ọnyani phọ ọdi. Oomo ạnmuny phọ ọdi, nmạnyaan rꞌalephiri, ọman bọ ịraardi rꞌịraar ạnmuny).

¹⁶ Ạnmuny ạGad: Zefon, Hagi, Suni, Ezbon, Eri, Arod rꞌAreli.

¹⁷ Ạnmuny Ạser: Imna, Isva, Isvi, Beria rꞌaSera umarani ạbidi; ạnmuny aBeria: Heber rꞌạMalkiel.

¹⁸ (Bụen ạnmuny aZilpa ọpo ạLeban ạngo bọ Lia ọnyani phọ ọdi; bụen kụ ạbudi ọdi ạmaranaan bọ Jẹkob, ḍioph rꞌodiiny ạnmuny).

¹⁹ Ạnmuny aRechel ạnir phọ ạJekob: Jọsef rꞌạBenjamin.

²⁰ Ạnmuny dị ạJosef ạmar ẹpe Ijipt: Mạnase rꞌIfraim; Ạsenat ọnyani aPotifera oyil ạrikia phọ ọlo aOn kụ ạmaranaan nyọdi.

²¹ Ạnmuny ạBenjamin: Bela, Beker, Asbel, Gera, Nemon, Ehi, Ros, Mupim, Hupim rꞌArd.

²² Bụen phọ kụ ạnmuny dị aRechel ạmaranaan Jẹkob, ọman bọ ḍioph rꞌinya ạnmuny.

²³ Ạnmuny ạDan: Husim.

²⁴ Ạnmuny ạNaftalai: Jazeel, Guni, Jẹzer rꞌaSilem.

²⁵ Bụen phọ kụ ạnmuny aBilha, ọpo ạLeban ạngo bọ Rechel ọnyani phọ ọdi, ọpo ạmaranaan bọ Jẹkob, oḍual ạnmuny.

²⁶ Oomo ọto ạJekob dị rꞌọdi ogheel bọ Ijipt. Bụdi oru ọkaraghi ạbudi dị kụ ạmar, dị ụ́ḅaram nmạriir ạnmuny phọ ạJekob, ọman bọ odiinydi rꞌodiiny awe.

²⁷ Ạnmuny phọ, bụphe ọmaranaan bọ Jọsef ẹpe Ijipt, ịyal ạnmuny: oomo ọto ạJekob dị ogheel bọ ẹpe Ijipt, oḍualdi awe.

ẠJekob rꞌọto ọdi ẹpe Ijipt

²⁸ Kụ ọdi arom Juda mọ ọdi ạghi ạteeny Jọsef ạḅeni mọ ọdi aru ạmiin nyịno ẹpe Gosen, kụ bịdi ọghi osi Gosen.

²⁹ ẠJosef aḍigh oghuugh ade phọ ọdi ạghi ọmiin Ịzirel ọde phọ ọdi ẹpe Gosen, aḍeenaan loor ọdi nyọdi; kụ aghinighi orum ọdi ạrol sịphe orum mọ ọdi amoghi yogh ebia.

³⁰ Ịzirel ạḅeni Jọsef mọ, “Mẹnighe dị mị kamugh, mị mạmiin bọ ghisigh ạna alegheri bọ mọ nạ odi ni.”

³¹ ẠJosef ạḅeni bumor phọ ọdi rꞌọto ọde phọ ọdi, mọ, “Mị kạki ạḅeni ọdaam eelhe phọ mọ abumor phọ ạmi rꞌọde phọ ạmi rꞌọto ọdi ọrol ghan bọ ẹpe Kenan moru osi kꞌạmi.

³² Oḍighi awe phọ ạbuen ophogh ghan rꞌookonom ghan ịnam, kụ bịdi ọpam ni ịga phọ rꞌạsinam mọ, rꞌoomo aruphua phọ ạbidi.

³³ Eḍighi ịdi ọdaam eelhe phọ ịmagh inyina kụ ipuru inyina mọ, ‘Eeghe kụ oḍighi anyina?’

³⁴ pọ ịpagharanaan nyọdi mọ, ‘Oḍighi abutelhedom mọ ạna ophogh ghan ịnam kꞌẹghoroghor ayoor kꞌarodon, yoor rꞌạburude ayoor,’ ẹrol dị nyina etugh ẹphen Gosen, ịdi eḍighi bọ abupoghom ịnam ạḅaphanya ni ẹphen Ijipt.”