Emiighom 43 - Ạḍinya Iigbia

Abumor ạJosef ọpam Bẹnjamin ọkimom ẹpe Ijipt

¹ Ịgbakuro phọ ẹpughan sịphe ade phọ.

² Kụ ẹteeny mem dị eḍien phọ ẹpe bịdi ogho bọ ẹpe Ijipt bịdi molhe ọmadan, kụ ọde phọ ạbidi ạḅeni bịdi mọ, “Ịḅile ẹghi egho mọony ẹnum eḍien.”

³ Kụ aJuda ạḅeni nyọdi mọ, “Oye phọ ạphur ri rụru ayoor kụ ạḅem mọ, ‘Nyina kẹ́miin mun ghisigh phọ ạmi, omuton dị nyina ẹpham umor phọ anyina kụ ẹghimom.’

⁴ Eru mạar dị umor phọ ayoor rꞌayoor kụ kọki, pọ yoor kọki ni oko eḍien oruomonaan nyịna.

⁵ Kụ eru mạar dị nạ úmeera mọ ọdi rꞌayoor kụ ọghi, pọ yoor kọ́ki mun, ịdi eḍighi bọ oye phọ ụḅeni iyoor mọ yoor ghisigh phọ ọno kọ́miin, dị umor phọ ayoor rꞌayoor kụ́ki.”

⁶ Kụ Ịzirel ạḅem mọ, “Uḍighi ika kụ nyina riḍighi bọ ịmi ịphen phọ, ọḅeni oye phọ mọ nyina ẹmoogh ni umor?”

⁷ Bịdi ọphagharanaan mọ, “Oye phọ amiigha loor kụ upuru iyoor ịlo ayira rꞌologhi otu phọ, apuru kẹn mọ, ‘Ọde phọ anyina odi ni? Nyina ẹmoogh ni ọnon umor?’ Yoor ụdaph ḍipuru phọ ọdi kụ ọphagharanaan bọ. Yoor úlegheri mọ ọdi kạḅem mọ yoor ọpham umor phọ ayoor kụ ọghimom?”

⁸ AJuda ạḅeni Ịzirel ọde phọ ọdi mọ, “Bịle ọony phọ rꞌạmi ọghi, ọbo yoor rꞌạna rꞌịbam ạnmuny phọ komuughu ghan bọ.

⁹ Mị ạsighe loor phọ ạmi ạpaghan ẹmhu ọdi. Pọ upuru ịmi ẹmhu ọdi, eru mạar dị mị ụ́pam nyọdi útigheel ụ́meremi nyọdi risigh ạna. Pọ oomo phọ ịdi ẹrol ẹmhu ạmi kꞌagee-pọ.

¹⁰ Mụghumo róobinya bọ ịduon, ọbo yoor mọghi ịyal amem otigheel.”

¹¹ Pọ kụ amem dị Ịzirel ọde phọ ạbidi ạḅeni bịdi mọ, “Eru mạar dị eru ịduon, pọ ịson igeny iimuma ade phọ ẹphen ẹloghoḍi ologhi ạsikpuru phọ anyina, eḍighi ruunmo dị koonmo oye phọ: ẹnum elho eḍu, ẹnum ẹnuum aḍiowo, ọwe, ọophaghar, ọoza, iziph rꞌaghotor.

¹² Ịpam ni ịnon ikpoki epeeliom ịpe nyina ẹmiin bọ sịphe ọnhu ạsikpuru phọ anyina eḅulemi ẹghiomonaan, ạgama ụpioman ni.

¹³ Ịpamam ni umor phọ anyina ẹghimom, iḅetenu ẹghi kꞌoye phọ.

¹⁴ Ẹnaan Oomo Ịikpo phọ ịngo inyina ọnma ighirigiir esi oye phọ, oye phọ aḅulemi umor phọ anyina rꞌạBenjamin, ẹpham erighelom. Kụ eru mạar dị ạnmuny phọ ạmi momuughu, pọ mị phọ kẹn kamugh aani ni.”

¹⁵ Awe phọ ọsighe ruunmo phọ rꞌịyal ạga ikpoki rꞌạBenjamin ọpham, oḅetenu ọghi osi Ijipt, ọghi ọteeny Jọsef.

¹⁶ Mem dị ạJosef ạmiin bọ bịdi rꞌạBenjamin, kụ ạḅeni ọsaam ịisa phọ ọdi mọ, “Sịghe we phọ ạbuen ạghi ologhi otu. Kiigh ẹnam ạsaam eḍien lọ bịdi rꞌạmi kole ootaany phọ.”

¹⁷ Oye phọ ạtuugh ịpe ạJosef ạḅeni bọ nyọdi aḍighi, ạsighe we phọ ạlogh kꞌạJosef.

¹⁸ Aruugu rasiph we phọ, ịdipho ọsighe bọ bịdi ọlogh kꞌạJosef kụ bịdi ọḅem ghan mọ, “Ụtuan ikpoki phọ bịdi oḅulemi bọ odoghoḍi ologhi ạsikpuru phọ ayira ẹḅel amem mọ kụ ụlogh bọ iyira sịen kꞌọdi, ẹrol dị ạmoogh eepoogh uzuom iyira ụsighe iyira aḍighi rẹbene, ạsighe ịnam adool phọ ayira.”

¹⁹ Bịdi rọghi rosi kꞌạJosef odi sịphe ọnhu-aḍibuo otu phọ kụ ọghi ọteeny ọsaam ịisa phọ ọdi kụ ọḅem mọ,

²⁰ “Oye dị ụmoogh iyoor, ẹḅel amem mọ yoor oru bọ ẹphen ogho eḍien phọ,

²¹ yoor oten rokeel, yoor osi esi ọmina ḍughul rọkarion sịkpuru phọ ayoor kụ ophogh ikpoki phọ yoor oghoom bọ eḍien phọ ediighi ịnhu ạsikpuru phọ ayoor, uwo ịlo ọdi rꞌịlo ọdi, kụ yoor ọpam ni otumom.

²² Yoor ọpam ni ịnon ikpoki ịdi yoor kokoom eḍien. Yoor úlegheri oye phọ aḅulemi bọ ikpoki phọ adoghoḍi sịphe ạsikpuru phọ.”

²³ Kụ ọdi ạphagharanaan bịdi mọ, “Ịpoomi iloghi phọ anyina. Aruugu inyina kúsiph. Ẹnaan phọ anyina, Ẹnaan ọde phọ anyina kụ aḅulemi bọ ikpoki phọ ạlogh sịphe ạsikpuru phọ anyina. Mị ạar ri ikpoki phọ anyina.” Kụ ọdi ạghi ạsighe Sịmion aruom bịdi.

²⁴ Oye phọ ạsighe bịdi ạghi kꞌạJosef, ạngo bịdi mụum bịdi ootola ruwol ạbidi, ạngo ịnam adool phọ ạbidi ịḅal.

²⁵ Kụ bịdi ookpomoghi ruunmo phọ okoriom ghan Jọsef mem lọ dị aru ootaany.

²⁶ ẠJosef arigheel, kụ bịdi ọsighe ruunmo phọ bịdi ọpham bọ ọngo nyọdi, kụ okpuḍughian esomanan ọdi.

²⁷ ẠJosef apuru bịdi ịlo ologhi otu, kụ apuru mọ, “Ọde phọ anyina amoon ni; okumoor oye phọ ọpo nyina ịḅeni bọ ịmi, odi ni?”

²⁸ Kụ bịdi ọphagharanaan nyọdi mọ, “Otelhedom mọ ạna, ọde phọ ayoor amoon ni, odi ni.” Kụ bịdi ozumeri yogh rụmhu ạbidi ude esomanan ọdi.

²⁹ Ọdi ạnmanaghian kụ ạmiin Bẹnjamin umor phọ ọdi, ọony onhiin phọ ọdi, kụ apuru bịdi mọ, “Ọphon kụ ọbam umor phọ anyina, ọpo nyina ịḅeni bọ ịmi? Ẹnaan ẹrolonaan nyịna, mọony ạmi.”

³⁰ ẠJosef aagborion ạḍua ịdi eḍighi bọ aloor ọdi regbirighaan loor umor phọ ọdi, ạwa ghan esi ạaghian kụ omoghi, kụ aḍigh ẹpe otu phọ ọdi amoghi yogh.

³¹ Kụ aatola risigh ọdi, aru amite ạphama loor ọdi, kụ ạḅem mọ, “Ịsighe eḍien ẹsighe eru.”

³² Kụ ọḅamanaan eḍien ẹlo ọdi gem, ọḅamanaan ẹlo ạbidi gem, ọḅamanaan ẹlo ạbuphe rꞌọdi role bọ gem. Bụo Ijipt kómeera ọḅaran rꞌạbuo aHibru olhian eḍien, ịdi eḍighi bọ iigbia ni ẹpe Ijipt.

³³ Kụ bịdi ọrol otuman nyọdi, oniin aruom nyoniin, kụ abugbogh phọ ọtuugh oye aruom oye ọrol ẹpe eekuna phọ. Awe phọ oniin akiton aphogh nyoniin, kụ iḍigh iikia esi ạbidi.

³⁴ ẠJosef ạsighe eḍien phọ nyẹpe ọdi adiemi bịdi, kụ abin mụo ạBenjamin kụ ạbugh apu mụo ạbidi oogh amem. Kụ bịdi olhe ọphughol, kụ iloghi ạbidi ẹḅaal kụ robo.