Emiighom 41 - Ạḍinya Iigbia

ẠJosef ạgba ẹmhu ạramalha ọdaam mọ

¹ Ịphen phọ reten, esi ịyal ikpom ạsia, ọdaam eelhe phọ ạmalha, dị odi oogbom Ọphiiny aNail,

² kụ ạmiin oḍual ạsinam ẹsoghoronu, ẹbughogh ẹnuumogh, rẹḅal ghan ọgbal ọphiiny phọ.

³ Oḍual ịnon ạsinam emiteghu, ẹkpolokpolo, ẹḅile ẹsoghoronu sịphe ọphiiny phọ, kụ ẹmeregha ịigaany ịpheri phọ ạsinam mọ.

⁴ Kụ oḍual phọ ịkpolokpolo phọ ạsinam mọ ẹminogh oḍual phọ ịbughunu ạsinam mọ. Kụ ọdaam eelhe phọ ạsuma.

⁵ Ọdi ạḅile rạnaani kụ ạmalha kẹn mụnon ạmalha, ạmiin oḍual igbogh ạsigba ịbiakpa loor oniin ozin, ẹmoogh ịnyaam, ẹnighe ọmiin.

⁶ Ịnon oḍual ịdi ẹnyurughan enyororo yogh ịnyaam ị́moogh, emite etuman bịdi.

⁷ Oḍual ịpe ị́moogh bọ ịnyaam, ẹminogh oḍual phọ ịpe ẹbughogh bọ, ẹmoogh ịnyaam. Kụ ọdaam eelhe phọ ạsuma, kụ aloghoma mọ mụen phọ ạmalha.

⁸ Rẹḅaal kụ ịphen phọ rẹeḅaghami ọdaam eelhe phọ. Kụ ọdi arom ạghiom oomo ạbuo ịiḍaany phọ odi bọ Ijipt, rꞌoomo ạbuo olegheri ịyaar phọ. Ọdaam eelhe phọ ạghaaph mạlha phọ ọdi ạḅeni bịdi, kụ ọlo alegheri ạgba ẹmhu ạmalha phọ ạḅeni nyọdi ọ́rol.

⁹ Uwo ẹmhu ọmeleghia phọ ạḅeni ọdaam eelhe phọ mọ, “Mị malhoghoma ọpioman phọ ạmi rodon.

¹⁰ Mem mọ ọdaam eelhe phọ ạghagham bọ ologhi butelhedom mọ ọdi, ụkasiom iyoor ẹpe kꞌuwo ẹmhu ugheel ẹkpar phọ, mị rꞌuwo ẹmhu ịisa phọ.

¹¹ Kụ yoor ọmalha mạlha, ḍiniin phọ aḍughul phọ, uwo ạmalha ọdi rꞌạmalha ọdi, ịpe ọgba bọ ẹmhu ạmalha phọ ụḅeni iyoor.

¹² Ẹpe phọ yoor ọrol bọ, oniin onyugheel ọony ọlo aHibru, otelhedom uwo ẹmhu ugheel ẹkpar phọ rꞌayoor kụ ụrol bọ, kụ yoor ọgba rạmalha phọ ayoor ạḅeni nyọdi kụ ọdi ạgba rụmhu ạramalha phọ ayoor ụḅeni iyoor; ọdi ạgba, uwo ạmalha rꞌạmalha ọdi, ạḅeni.

¹³ Kụ ịpe ọdi ạghaaph bọ ụḅeni iyoor kụ ịdi ẹtuugh ni emite, uwo ịlo ọdi rꞌọdi; ịmi nạ ạsighe aḅulemi sịen oḍighi phọ ạmi, nyọdi nạ ạsighe asin.”

¹⁴ Ọdaam eelhe phọ arom mọ ọghi ọmagh Jọsef, kụ bịdi oogborion ọghi ọsighe Jọsef omitiom sịphe otu ikoli phọ. Roghula ọleem mọ kụ roonmenan rukpe phọ ọdi, kụ aru ạmeera ghisigh ọdaam eelhe phọ.

¹⁵ Ọdaam eelhe phọ ạḅeni Jọsef mọ, “Mị ụmalha mạlha kụ oye lọ arue ạgba ẹmhu ạmalha phọ ụḅeni ịmi ólho; kụ mị ạnaghan mọ nạ katue ni ạgba ẹmhu ạramalha.”

¹⁶ ẠJosef ạphagharanaan mọ, “Ílho esi ạmi. Ẹnaan kẹpagharanaan ni ọdaam eelhe phọ ịdi kẹnighenaan nyọdi.”

¹⁷ Ọdaam eelhe phọ ạḅeni Jọsef mọ, “Mị ụmalha dị mị ạmeera pạ oogbom Ọphiiny aNail phọ,

¹⁸ kụ mị ạmiin oḍual ạsinam dị ẹḍua sịphe ọphiiny phọ ẹsoghoronu, ẹbughogh ẹnuumogh, ẹnighe ophoghoghom, kụ rẹḅal ghan ọgbal ọphiiny phọ.

¹⁹ Íbia bịn oḍual ịnon ịkpolokpolo ạsinam dị ịnyaam ị́moogh ẹsoghoronu sịphe ọphiiny phọ etuman ịḅel phọ; mị kọ̋miin ghan ọdo ịpe phọ sịen ade phọ Ijipt.

²⁰ Oḍual phọ ịkpolokpolo ạsinam mọ ị́nighe bọ ophogh ẹminogh oḍual igeny ạsinam mọ ẹmoogh bọ ịnyaam ẹbughogh.

²¹ Kụ ghạlamo ịdipho bịdi kụ ọminogh bọ ni ịpe phọ íḍeenaan sịphe aloor phọ ạbidi mọ bịdi kụ ụminogh ni. Ịdipho ẹkpolokpolo bọ ẹḅel amem mọ kụ ịdi ẹrol li, kụ mị ạsuma.

²² Kụ ẹpe ạmalha phọ ạmi mị ạmiin oḍual ịphunubu ipoola ịbiakpa, ẹbughunu ẹnighe.

²³ Mị ạḅile ạmiin oḍual ịnon ịphunubu ipoola ọbiakpa ẹnyurughan enyororo yogh ị́moogh ịnyaam, emite etuman ịḅel phọ.

²⁴ Oḍual inyororo yogh ipoola phọ ịpe ị́nighe bọ ophogh phọ ẹminogh oḍual ịpe ẹmoogh bọ ịnyaam mọ. Kụ mị ạghaaph ịphen phọ ạḅeni bụo ịiḍaany phọ, kụ ọlo arue ạgba ẹmhu ịphen phọ ọ́rol.”

²⁵ ẠJosef ạḅeni ọdaam eelhe phọ mọ, “Ạmalha phọ ạna amuniin ni; Ẹnaan kụ iḍeenaan nyịna ịdi ọdi kaḍighi.

²⁶ Oḍual phọ igeny ạsinam mọ, pọ oḍual ạsia: oḍual phọ igeny ipoola ọbiakpa phọ, pọ oḍual ạsia. Ạmalha phọ ạna amuniin.

²⁷ Oḍual phọ ịkpolokpolo ạsinam mọ ẹsoghoronu bọ etuman bịdi, pọ oḍual ạsia; oḍual ịphunubu ịbiakpa phọ ịpe ookuugh ẹghologhol phọ aghiighom bọ aroḅologhi, pọ oḍual ạsia ịgbakuro.

²⁸ Mị ạkaaph ịphen phọ rạḅeni ọdaam eelhe phọ: Ẹnaan iḍeenaan ọdaam eelhe phọ ịdi ọdi kaḍighi.

²⁹ Nạghan, ẹeḍiom kẹtol li oomo ẹphen eelhe phọ Ijipt oḍual ạsia.

³⁰ Kụ mem dị ịphen phọ meten, oḍual ạsia ịgbakuro kẹḅile ni emite etum pạ, kụ eḍighi ịdi kobula oomo ẹeḍiom mọ ẹrol bọ pạ ade phọ; ịgbakuro phọ keleeny oomo phọ eelhe phọ Ijipt.

³¹ Ilhom ịgbakuro phọ kẹpughan bịn kẹ́ngo rꞌẹnum eepoogh mọ ọotughian ẹeḍiom mọ ẹrol bọ pạ ade phọ.

³² Ịphen kụ iḍighi bọ ịdi ạmalha phọ ọdaam eelhe phọ aḍighi bọ ịyal: ịdi eḍighi bọ ịphen phọ ịtooghi Ẹnaan. Kébia, kụ emite.

³³ “Kụ nyịidipho, ọdaam eelhe phọ ạnmanaghian aphogh oye lọ rạnaghan ghan ḍụghum, ạmoogh olegheri ịyaar, ạsighe nyọdi ạdaami aphogh ghan eelhe phọ Ijipt.

³⁴ Ọdaam eelhe phọ aḍighi ịphen phọ: ạmaaghi we dị kopogh de phọ, ọsighe muniin abin esi oogh asibin phọ ịpe ade phọ Ijipt kẹmoogh bọ esi oḍual ạsia ẹeḍiom mọ.

³⁵ Bịdi ookpomoghi ghan oomo eḍien igeny ạsia phọ ịpe retu bọ, ookpomoghi ọḅogh ọlogh ḍịghaagh ọdaam eelhe phọ, ẹrol dị oomo areelhe phọ Ijipt ọmoogh eḍien.

³⁶ Ookpomoghi eḍien phọ ọlogh ruutu oseerian sịen ạramha phọ, okoriom ghan oḍual ạsia ịgbakuro phọ kesoorom bọ Ijipt, ọbo ịgbakuro képiemi ghan bọ Ijipt.”

Ọdaam eelhe phọ ạdaami Jọsef ophogh ghan ade phọ Ijipt

³⁷ Ịitughian phọ ịphen ịḅeeraan ni ọdaam eelhe phọ rꞌoomo awe iiḍighi phọ ọdi.

³⁸ Ọdaam eelhe phọ ạḅeni bịdi mọ, “Yira kótue ni ọmiin ọnon oye dị ạrol ịduon phọ, oye dị uwaloor Ẹnaan phọ odi uloor.”

³⁹ Ọdaam eelhe phọ ạḅeni Jọsef mọ, “Tụtu Ẹnaan kụ eḍeenaan bọ nyịna oomo phọ ịphen, ọnon oye dị ạmoogh ọnaghan ạḍughum rꞌolegheri ịyaar ịduon ạna ólho.

⁴⁰ Nạ kụ kạda otu phọ ạmi. Ịlo nạ ạghaaph kụ ịdi awe phọ kọdaph ghan, emuton sịphe ạgada ọdaam ẹmha phọ bịn kụ ẹdi mị kapu nyịna.

⁴¹ Nạghan. Mị mạdaami nyịna ophogh oomo eelhe phọ Ijipt.”

⁴² Ọdaam eelhe phọ ạkpotonaan gulu phọ ọdi sịphe ạḍighaagh phọ ọdi, ạsighe ạlogh ḍịghaagh ạJosef, ạsighe ịma ạrusuoma iidugha ạkpologhi Jọsef, ạnyagharanaan ikoli agol phọ ọdi ạnyaari orum ạJosef.

⁴³ Ọdi ạsighe ẹnam oghiilom mọ ọdi, nyẹpe emuneniom bọ ịyal phọ, ạngo Jọsef mọ aghiilom ghan, kụ bịdi ọrol sịphe arisigh phọ ọdi ọlooghi mọ ikpuḍughian. Ịduon phọ ọdi ạsighe nyọdi ạdaami oomo areelhe phọ Ijipt.

⁴⁴ Ọdaam eelhe phọ ạḅeni Jọsef mọ, “Mị kụ ọdaam eelhe phọ, omuton nyịna ạJosef ọnon oye ólho, dị kapoophe ghan ḍịghaagh ọdi mꞌowol ọdi ạnyu sịen oomo eelhe phọ Ijipt.”

⁴⁵ Ọdi aghol ḍien Jọsef mọ aZafenat Pania, aphinanaan Jọsef ạnir, ọnyani aPotifera oyil ạrikia phọ ọlo ạHeliopolis. Oghol ḍien ọnyani phọ mọ Ạsenat. Kụ ạJosef amite ạghi arelhe yogh oomo areelhe phọ Ijipt.

⁴⁶ ẠJosef ạman bọ ịraardi ạsia mem mọ dị amiigh bọ oḍighi kꞌọdaam eelhe phọ Ijipt.

⁴⁷ Oḍual ạsia ẹeḍiom mọ, ade phọ esoor eḍien emuzeḍi.

⁴⁸ Kụ ọdi aakpomoghi ghan eḍien oomo oḍual ạsia phọ, mem mọ ạmuphe phọ eḍien imuza ni eelhe phọ Ijipt, kụ ọdi aakpomoghi ghan riiḍien aseenaan rạmha phọ ịpe orugh bọ otuman bịdi.

⁴⁹ Eḍien dị ạJosef aakpomoghi iḍiza emuza ịdipho ịisaar ọphiiny. Mẹphughan kụ ọdi ạwile ọ́tooghi ghan mun, ịdi eḍighi bọ mẹphughan ọtooghi.

⁵⁰ Tụtu rẹteeny bọ sịa ịgbakuro phọ, ạJosef mạmar ịyal ạnmuny. Ạsenat, ọnyani phọ aPotifera oyil ạrikia phọ ọlo ạHeliopolis, kụ ạmaranaan nyọdi.

⁵¹ ẠJosef aghol ḍien ọkpana ọony phọ ọdi mọ ạManase, ẹmhu aḍien phọ pọ ịduon mọ, “Ẹnaan meḍighi ịdi mị mawula oomo ịminimiin phọ ạmi rꞌoomo ọto kꞌọde phọ ạmi.”

⁵² Ọdi aghol ḍien esoony ọony phọ ọdi mọ Ifraim, ẹmhu aḍien phọ pọ ịduon mọ, “Ẹnaan meḍighi ịdi mị mạrol sịphe ade ịminimiin phọ ạmi rạmaraghian.”

⁵³ Oḍual ạsia ẹeḍiom mọ ẹrol bọ sịphe eelhe phọ Ijipt emunughan.

⁵⁴ Kụ oḍual ạsia ịgbakuro phọ emiigh, ịdipho ạJosef ạghaaph bọ. Ịgbakuro phọ ileeny eleeny oomo ịnon arikpisi; kụ oomo ạramha phọ Ijipt eḍien edi ni.

⁵⁵ Mem dị oomo phọ Ijipt rọmiinom ọkoony kụ awe omoghiom ghan ọdaam eelhe phọ eḍien, ọdaam eelhe phọ ạḅeni oomo awe phọ Ijipt mọ, “Ịki esi ạJosef, kụ ịlo dị ịḅeni inyina ẹtuugh eḍighi.”

⁵⁶ Kụ mem dị ịgbakuro phọ melheeny oomo Ijipt, ạJosef aghunyon oomo aruutu phọ dị asereghi bọ eḍien phọ, kụ aalha ghan we Ijipt, ịdi eḍighi bọ ịgbakuro phọ mẹphughan ẹpe Ijipt.

⁵⁷ Ịgbakuro phọ eleeny oomo aḅirini phọ, kụ oomo aḅirini phọ ọghi ghan Ijipt kụ ogho ghan eḍien esi ạJosef, ịdi eḍighi bọ ịgbakuro mẹphughan oomo aḅirini phọ.