Emiighom 40 - Ạḍinya Iigbia

ẠJosef ạgba ẹmhu ạramalha ạbuo ikoli phọ

¹ Kụ ịphen phọ reten, kụ ọmeleghia ọdaam mọ Ijipt rꞌọsaam ịisa phọ ọdi ọpioman oḍighi ịdi ị́nighe ọde-otu phọ ạbidi ọdaam mọ Ijipt.

² Ọdaam eelhe phọ Ijipt ạghagham ịyal phọ ạbuo iiḍighi phọ ọdi ologhi, uwo ẹmhu ịmeleghia phọ rꞌuwo ẹmhu ịisa phọ.

³ Kụ ạsighe bịdi ạghi ạlogh ikoli kꞌuwo ẹmhu ugheel ẹkpar phọ, eniin phọ esi phọ ọlogh bọ Jọsef ikoli phọ.

⁴ Kụ uwo ẹmhu phọ ạḅogh bịdi ạlogh ḍịghaagh ạJosef mọ arelhenaan ghan bịdi sidom. Bịdi ụrol li sịphe ịminighan amem,

⁵ kụ ḍiniin phọ aḍughul phọ, ịyal phọ ạbidi ọmalha yogh mạlha, uwo ạmalha rꞌạmalha mụo ọdi, kụ ọwa ghan ẹmhu ạmalha ẹlo oye rꞌoye, ọmeleghia phọ rꞌọsaam ịisa phọ ọdaam mọ Ijipt odi bọ ikoli phọ.

⁶ Kụ rẹḅaal, ạJosef ạghi ophogh ạbidi kụ ạmiin mọ iloghi phọ ạbidi ị́ḅaal,

⁷ kụ apuru bịdi mọ, “Eeghe nyina ekururu bọ?”

⁸ Kụ bịdi ọḅeni nyọdi mọ, “Ịyal phọ ayoor ụmalha ni mạlha, kụ oye dị kạgba ẹmhu ạramalha phọ ụḅeni iyoor ólho.” Kụ ạJosef ạḅeni bịdi mọ, “Awe kụ iyira ẹmhu ọdo phọ ịphen kíḍeenaan, emuton Ẹnaan bịn. Ọgba ẹmhu ọlo esi Ẹnaan ḍụghum? Iseseeny, ịkaaph ịḅeni ịmi.”

⁹ Kụ uwo ẹmhu ịmeleghia phọ ạghaaph ịpe ọdi ạmalha bọ ạḅeni Jọsef mọ, “Mị ạmalha ạmiin vain dị ạmeera risigh ạmi.

¹⁰ Avain phọ ạmoogh bọ ịraar ịla. Avain phọ ạtol dịadi ramiteghom ipoola, kụ oomo ipoola phọ rẹkar, kụ ịphunubu phọ rẹḅaalogh ịlo agrep.

¹¹ Sịphe ạmalha phọ, mị ụpham tọbili ọdaam eelhe phọ ḍịghaagh, kụ amimighi agrep phọ ạlogh ạngo nyọdi.”

¹² ẠJosef ạḅeni nyọdi mọ, “Ẹmhu ạmalha phọ ạna ịduon; ịraar phọ ạsigo phọ, pọ ịraar aḍughul-otu.

¹³ Esi ịraar aḍughul-otu ọdaam eelhe phọ ratu ọsighe ạna oḅulemi ḍigbaany ạdol phọ ạna, kụ nạ ạḅile ghan ạmeleghi miim ạngo nyọdi ịdipho ẹḅel amem mọ nạ aru bọ ọmeleghia ọdi.

¹⁴ Kụ ọlo ịmi kúwula mem mọ kẹnighenom bọ nyịna. Ụnma ịmi ighirigiir, ọghiom ghan ologhi ọdaam eelhe phọ omitiom ạmi sịen otu ikoli phọ ịphen.

¹⁵ Ịmi phọ, umi ịmi ẹpe ade ạbuo aHibru phọ kụ ọḍuanam, kụ ẹphen phọ kẹn, mị mạar ụ́piom, kụ ụsighe bọ ịmi ọlogh sịen otu ikoli phọ.”

¹⁶ Mem dị uwo ẹmhu ịisa phọ ạnaghan bọ ịpe ọgba bọ mạlha phọ, mọ ẹnighenaan ni nyọdi, kụ ọdi ạḅeni Jọsef mọ, “Mị phọ kẹn ụmalha dị mị arool ịraar arugunum ạbred.

¹⁷ Kụ ologhi egunum mọ ẹpe edi bọ ạnyu phọ, ọdo kịrokiro ịphalaḅaal asikek edi ologhi dị ọsaaghinaan ọdaam mọ, kụ ịnun eru ghan rele ghan sịphe ologhi egunum mọ edi bọ ẹmhu ạmi.”

¹⁸ ẠJosef ạphagharanaan kụ ạḅeni nyọdi mọ, “Ẹmhu ạmalha phọ ạna ịduon; ịraar phọ arugunum mọ, pọ ịraar aḍughul-otu.

¹⁹ Esi ịraar aḍughul-otu ọdaam eelhe phọ Ijipt katu ạsighe nyịna sịen phọ ạpam akeel, kụ ạsighe nyịna asinemi loor oreeny, kụ ịnun etu pạ phọ eekpophi ghan nyịna.”

²⁰ Rẹman ịraar aḍughul-otu phọ, aḍio phọ ạḍiphe kụ aḍio dị ọmar ọdaam eelhe phọ, ọdi alianaan ẹyaal oomo ạbuo iiḍighi phọ ọdi, kụ ạpham uwo ẹmhu ịmeleghia phọ ọdi rꞌẹmhu ịisa phọ ọdi aphoophe sịphe ogbo ạbidi.

²¹ Ọdi ạsighe uwo ẹmhu ịmeleghia phọ aḅulemi ḍigbaany ạdol phọ ọdi.

²² Kụ ạsighe uwo ẹmhu ịisa phọ asin, ịdipho ạJosef ạgba bọ ạḅeni nyọdi.

²³ Kụ ọlo uwo ẹmhu ịmeleghia phọ awula ni Jọsef, ọ́otughian mun nyọdi.