Emiighom 35 - Ạḍinya Iigbia

Ẹnaan ẹngo ḍịseph Jẹkob ẹpe Bẹtel

¹ Ẹnaan ẹḅeni Jẹkob mọ, “Ḅetenu agheel Bẹtel, arugh ẹpe, kụ ạkan sịphe phọ enmeny ạrikia ẹpe Ẹnaan emite bọ egaan esi ạna mem mọ nạ aghiilaan bọ Ịso umor phọ ạna kụ rasuma.”

² ẠJekob ạḅeni ọto ọdi rꞌoomo ạbuphe odi bọ kꞌọdi mọ, “Itoḅologhi oomo iiruen ạrumugh phọ anyina, ẹḅaal, enme rụsuoma phọ anyina.

³ Oḅerenu ogheel Bẹtel. Mị kạkananaan sịphe phọ enmeny ạrikia Ẹnaan, ẹpe ịnaghanan bọ ịmi mem ịiḅaghami phọ ạmi kụ ịrolonaan bọ ịmi tọrobo ekpisi phọ ẹpe mị ạghi bọ.”

⁴ Kụ bịdi ọsighiogh oomo iiruen ạrumugh phọ ạbidi rꞌareḅeri-sụa phọ ạbidi ọngo Jẹkob. Kụ ạJekob ạsighe ạghi ạaghi loor azin ạḍiogh dị etuman Sẹkem.

⁵ Mem dị ạJekob rꞌạnmuny ọdi oḅetenu omiigh erelhe, aruugu Ẹnaan phọ asiph ni oomo ạramha phọ ịpe ekoom bọ bịdi, kụ bịdi úporogh nmụny phọ ạJekob.

⁶ ẠJekob ạghi asi ẹpe Luz, ẹpe phọ ạBetel, edi bọ ẹpe eelhe aKenan, ọdi rꞌoomo awe phọ ọdi.

⁷ Kụ ọdi ạkan sịphe phọ enmeny ạrikia, kụ aghol ḍien esi phọ mọ Ẹl Bẹtel, ịdi eḍighi bọ esi phọ ịpa kụ ẹdi Ẹnaan emite bọ egaan esi ọdi, mem mọ ọdi aghiilaan bọ umor phọ ọdi kụ rasuma bọ.

⁸ ADebora, oobia phọ ạRibeka, amugh, kụ oḍi nyọdi zin ạḍiogh pạ esoorom ạBetel, ḍien esi phọ ughol mọ Ạḍiogh Emoghi.

⁹ Ẹnaan ẹḅile emite esi ạJekob egaan mem mọ dị ạḍua bọ ẹpe Mesopotamia, kụ ạseph nyọdi.

¹⁰ Kụ Ẹnaan ẹḅeni nyọdi mọ, “Kọmagh ghan mun nyịna mọ ạJekob, ḍien ạna kokol mọ Ịzirel.” Kụ ọdi aghol ḍien ọdi mọ Ịzirel.

¹¹ Kụ Ẹnaan ẹḅeni nyọdi mọ, “Mị kụ Ẹnaan Oomo Ịikpo phọ. Ọkuruḅaka ạna adugh ạmar amuzeḍi. Areelhe kọḍua esi ạna, ạbudaam-ẹmha kọḍua esi ạna kụ omite.

¹² Ade phọ ạḍiphe mị ạngo bọ Ebraham rꞌẠizik, mị kạngo nyịna rꞌoghiil ạna bụphe rotu bọ.”

¹³ Ẹnaan ẹwile nyọdi sịphe bịdi ọrol bọ kụ ọghaaphan bọ ẹḍua.

¹⁴ Kụ ạJekob ạmeremi ḍighiigh ẹko sịphe Ẹnaan rꞌọdi ọrol bọ kụ ọghaaphan bọ, kụ amoor miim kụ ạsighe mụnum ạsagharan ẹpe ạnyu phọ.

¹⁵ ẠJekob aghol ḍien esi phọ Ẹnaan rꞌọdi ọrol bọ kụ ọghaaphan bọ mọ ạBetel.

Aḍuugh phọ aRechel

¹⁶ Kụ bịdi ọḍua Bẹtel omiigh erelhe ọtol ropogh Ẹfrat, kụ oghunughun rakun Rechel, dị ẹkpaariom nyọdi.

¹⁷ Oghunughun phọ rakun nyọdi iboom, kụ ọmaramia phọ ạḅeni nyọdi mọ, “Aruugu nyịna kúsiph, ịdi eḍighi bọ nạ kạḅile ạmar olephiri ọony.”

¹⁸ Ịnyaam ílho mun nyọdi, óloghoma mun loor, kụ amuzaan ḍuugh, kụ ọdi aghol ḍien ọony phọ mọ ạBen Oni; kụ ọde phọ aghol mọ ạBenjamin.

¹⁹ ARechel amugh kụ oḍi nyọdi ẹpe eten Ẹfrat ẹpe Bẹtilihem.

²⁰ ẠJekob ạmeremi ḍighiigh aḍighi ẹko sịphe oḍi phọ, kụ ẹko phọ ẹpe phọ edi ghan sịphe oḍi phọ kꞌarodon.

²¹ Ịzirel aḅetenu amiigh erelhe, kụ ạlogh ogbogo ẹpe ḍịeri phọ ạḍighaagh phọ otu ạnyu phọ Eder.

Ạnmuny phọ ạJekob

²² Kụ eru eten mem dị Ịzirel arugh sịphe ade phọ ạḍiphe kụ aRuben rꞌaBilha ọyuga ọde phọ ọdi ọrolan esi, kụ Ịzirel ạnaghan kụ ephin ologhi ọdi. Ạnmuny phọ ạJekob mọman bọ ḍioph rꞌịyal.

²³ Bụen ạnmuny phọ aLia: aRuben ọkpana phọ ạJekob, rꞌạSimion rꞌaLivai rꞌaJuda rꞌỊsaka rꞌạZebiulon.

²⁴ Bụen ạnmuny phọ aRechel: ạJosef rꞌạBenjamin.

²⁵ Bụen ạnmuny phọ aBilha ọnyani-otu phọ aRechel: ạDan rꞌạNaftalai.

²⁶ Bụen ạnmuny phọ aZilpa ọnyani-otu phọ aLia: ạGad rꞌẠser. Bụen kụ ạnmuny phọ ọmaranaan bọ Jẹkob ẹpe Mesopotamia.

Aḍuugh phọ Ạizik

²⁷ ẠJekob ạghi asi kꞌẠizik ọde phọ ọdi, ẹpe Mamre (ẹpe phọ ạKiriat Arba rꞌạHebron). Ẹpe kụ ekpisi phọ Ebraham rꞌẠizik orugh bọ.

²⁸ Ạizik ạman bọ oniin okuron rꞌọphaanyadi ạsia.

²⁹ Ạizik ạkpo ni ageny kụ agbi ọḅophoghan rꞌạburude phọ ọdi omugh, kụ Ịso rꞌạJekob ạnmuny phọ ọdi oḍi nyọdi.