Emiighom 34 - Ạḍinya Iigbia

Ịdi ạSekem ạka Daina ạphue

¹ Eniin aḍio aDaina ọnyani phọ aLia ạmaranaan bọ Jẹkob ạghi ọmiin ạnmanyaan ẹmha phọ.

² Mem dị ạSekem, ọony phọ aHamor ọlo aHivait phọ, ọpo aḍighi bọ ọdaam eelhe phọ ẹpe, ạmiin ọnyani phọ bịn asiph nyọdi ạka.

³ Oomo ologhi phọ ọdi odi esi aDaina ọnyani phọ ạJekob. Ọdi ạphomoghian nyọdi, alher ẹeḍiom rꞌoodugha ọnhu kụ ạghaaphan ghan rꞌọdi.

⁴ ẠSekem ạḅeni Hamor ọde phọ ọdi mọ, “Uphinanaan ịmi ọnyani phọ ọphon.”

⁵ ẠJekob ạnaghan mọ ạSekem mạphue Daina ọnyani phọ ọno kụ, loor esi dị ạnmuny phọ ọdi mọsighe ịnam ọkimom ịḅal, ọdi ịyaar óḍighi tụtu bịdi oḅula.

⁶ AHamor ọde phọ ạSekem amite ạghi ọḅaanaan ạJekob

⁷ mem dị pụruku ạnmuny phọ ạJekob rotigheel ẹpe de ịḅal ịnam mọ, kụ ephin iloghi ạbidi iboom ọnaghan ịphen phọ. Ịghagh ni iloghi phọ ạbidi ịdi eḍighi bọ ạSekem masooromi Ịzirel ạmagh elologhi; ọrolan esi ọnyani ạJekob, ịphen phọ ị́kpe oḍighi.

⁸ AHamor rꞌạbidi ọghaaphan kụ ạḅem mọ, “Oomo ologhi ọony phọ ạmi odi esi ọnyani phọ. Mị rạaḅereghi ni nyịna, kạ́le, meera ọdi aphin ọnyani phọ.

⁹ Eḍighi ịdi yira kooḍikuan pineen, awe ayoor rꞌawe anyina koophinighan.

¹⁰ Kụ nyina kẹtolan sịen eelhe phọ rꞌayoor, nyina ketue ni etugh tọrobo ekpisi lọ ịḅeeraan inyina, emuul ḍighi rꞌẹereegh, ẹmoogh ruphua eḍumom.”

¹¹ ẠSekem ạḅeni ọde phọ rꞌabumor phọ aDaina mọ, “Iḍighi iiḅi phọ ịphen. Tọrobo ịlo nyịna ịḅeni ịmi mị kạngo ni.

¹² Ịḅeni ịmi tọrobo aruunmo lọ nyina ẹwa ḍịghaagh ạmi kụ eseere ikpoki ẹmhu phọ anyina ẹghiom ạnyu ịlo ịḅeeraan inyina, kụ ọlo kị́bugh ịpughan, mị kịngo inyina tọro ịyaar lọ nyina epuru; kụ ọlo ịnughenyan ni ịmi ọnyani phọ anyina.”

¹³ Ạnmuny phọ ạJekob ọsighe ologhi ẹḍim rꞌiigbegheḍiom kụ ọphagharanaan Sẹkem rꞌaHamor ọde phọ ọdi, ịdi eḍighi bọ ọdi mạphue bọ Daina umarani phọ ạbidi.

¹⁴ Bịdi ọḅeni bịdi mọ, “Yoor kómeera umor ạnir-ephoph ayoor ạghi ilhom kꞌoye dị úḍuna. Ịpe keḍighi roofola esi ayoor.

¹⁵ Kụ yoor kómeera emuton dị nyina kẹtol ịduon yoor odi bọ reten oḍun ghan tọrobo olephiri ọony.

¹⁶ Eḍighi ịduon, pọ yoor omeera ni ophinighan. Yoor kotugh ogbo anyina kụ oḍighi buniin awe rꞌanyina.

¹⁷ Kụ eru mạar dị nyina kémeera ịphen yoor ọghaaph bọ, pọ yoor kọsighe ni ọnyani ayoor ọḍuanam.”

¹⁸ Ọghaaph phọ ạbidi ạḅeeraan Hamor rꞌạSekem ọony phọ ọdi.

¹⁹ Kụ onyugheel ọony phọ óphiemi mem oḍighi ịpe bịdi ọḅem bọ, ịdi eḍighi bọ ọdi mạmoogh ẹphomoghian esi ọnyani phọ ạJekob. Ọdi kụ ạkar ạmoogh ịyaar oḍighinom sịphe eghun phọ ạbidi.

²⁰ AHamor rꞌạSekem ọony phọ ọdi ụghi ni esi ookpomoghan sịphe eḍighom ẹmha phọ kụ ọghaaphan we ẹmha phọ ạbidi mọ,

²¹ “Awe phọ ạbuen ụphomoghian ni iyira, sighiton iyira rụ́wa kụ iḍighi ọwilenaan bịdi orugh sịen ade phọ omuul ḍighi, ịdi eḍighi bọ ade phọ ẹmanam ni bịdi orugh. Bịdi rꞌayira ooḍikuan pineen, yira ophinogh nmạnyaan bụo ạbidi, bịdi ophinogh nmạnyaan bụo ayira.

²² Ịdi yira koḍighi kụ bịdi rꞌayira ooteneghian oḍighi oniin oye ịduon: oḍun ghan tọrobo olephiri ọony sịen ogbo phọ ayira, ịdipho bịdi oḍun bọ.

²³ Ạsinam mọ ạbidi rꞌaruphua phọ ạbidi rꞌịnam mọ ạbidi keḍighi ni ịlo ayira? Itu omeera bịdi orughan rꞌayira.”

²⁴ Kụ oomo awe phọ ọrol bọ sịphe eḍighom ẹmha phọ omeeraam Hamor rꞌạSekem ọony phọ ọdi; bịn oḍunogh oomo alephiri ạnmuny phọ ọrol bọ sịphe ẹmha phọ.

²⁵ Ịraar aḍughul-otu reten, mem dị ạrelem oḍun phọ ke̋gheel, ịyal ạnmuny phọ ạJekob, ạSimion rꞌaLivai abumor aDaina, okoph rolhool ẹgham ạbidi reten dị oye úseere ologhi oḍigh ẹmha phọ bịn ọze oomo alephiri awe phọ,

²⁶ ọḅaram Hamor rꞌạSekem ọony phọ ọdi ọziom. Kụ bịdi ọsighe Daina sịphe otu phọ ạSekem ọḍuanam.

²⁷ Mem dị mọze we ẹmha phọ, bụeri phọ ạnmuny phọ ạJekob owum ruphua ẹmha phọ oḅulemian aroofola phọ bịdi ọngo bọ umarani phọ ạbidi.

²⁸ Bịdi ọsighe ḍita iyool-ịga rꞌạrutu-ịga, sịnam mọ, ịnam adool phọ rꞌoomo ạraraar phọ ịpe ẹrol bọ sịphe ẹmha phọ rꞌịpe ẹrol bọ ẹpe iizo phọ.

²⁹ Bịdi ọsighiogh oomo aruphua phọ ạbidi, osiphi nmạriir rꞌịbam ạnmuny phọ ạbidi, kụ orool oomo ạraraar dị ẹrol iloghi aruutu ọsighiogh.

³⁰ ẠJekob ạḅeni Sịmion rꞌaLivai mọ, “Nyina mẹkom ịiḅaghami rꞌạmulogh-ḍien iseenaan ịmi. Awe phọ ạmi okom. Nyịidipho bụo aKenan phọ rꞌạbuo ạPerezait phọ rꞌayira orughan bọ kookpomoghan uzuom ịmi ịlo oghiigh ạmi ọḅile ọze ọto kꞌayira opiemi.”

³¹ Kụ bịdi ọphagharanaan mọ, “Ị́nighe dị yoor omeera dị kọgilaam umarani phọ ayoor dịadi oliom ẹmha.”