Emiighom 33 - Ạḍinya Iigbia

ẠJekob azuan Ịso

¹ ẠJekob aphoophe ghisigh ọdi aphogh kụ ạmiin Ịso rꞌinya okuron awe phọ rꞌọdi rotu bọ, kụ ọdi adiemi nmụny phọ ọdi Rechel rꞌaLia rꞌạnmanyaan-otu phọ ọdi.

² Ạnmanyaan-otu phọ ọdi rꞌạnmuny phọ ạbidi oḍiemiom; aLia rꞌạnmuny phọ ọdi otum; aRechel rꞌạJosef ọrol eekuna ọman.

³ Kụ ạJekob aḍia risigh kụ azumeri ẹmhu ọdi oḍual amem ude tụtu ạghi ạteeny umor phọ ọdi.

⁴ Ịso aghiil ạghi ạteeny nyọdi aghurughi nyọdi, ạpham orum ọdi kụ ạkpun nyọdi, kụ ịyal ạbidi omiigh emoghi.

⁵ Kụ Ịso aphoophe risigh ọdi ạnmanaghian kụ ạmiin nmạriir phọ rꞌạnmuny phọ, kụ apuru mọ, “Bụen phọ rꞌạna odi bọ sịen ạbuo ạnhian?” Kụ ạJekob ạphagharanaan mọ, “Bụen phọ ạnmuny dị Ẹnaan ẹngo otelhedom mọ ạna.”

⁶ Ạnmanyaan-otu phọ ọdi orelhe ọobeeph, bịdi rꞌạnmuny phọ ạbidi, kụ oru ozumeri yogh rụmhu ọngo.

⁷ Ḅịle kẹn, aLia rꞌạnmuny phọ ọdi oru ọobeeph kụ ozumeri yogh rụmhu ọngo. Rọḍua kụ ạJosef rꞌaRechel oru aani ozumeri yogh rụmhu ọngo.

⁸ Kụ Ịso apuru mọ, “Ḍịeri phọ aḍita ịnam mọ ịpe mị azuan bọ ẹpe eten phọ ẹmhu ika?” Kụ ạJekob ạḅeni mọ, “Ịpe phọ mị ụwaam ọnma ighirigiir esi ọpo ụmoogh bọ ịmi.”

⁹ Kụ Ịso ạḅeni nyọdi mọ, “Mị ạmoogh ni ịdi ịgbaanyan ịmi; mạar aseere ịlo nạ ạmoogh.”

¹⁰ ẠJekob ạḅeni nyọdi mọ, “Eeye, mị rạaḅereghi ni nyịna, eru mạar dị nạ ạmoogh ni ghụsan ạmi, pọ ạar ri ịmi ruunmo phọ mị aruom bọ nyịna. Ọmiin aghisigh ạna, esi ạmi ẹkigh ọmiin aghisigh Ẹnaan, nyịidipho phọ yira mọrolan bọ dọl ạrighiri.

¹¹ Kạ́le, sịghe ruunmo phọ mị aruomaan bọ nyịna. Seseeny, mị rạaḅereghi ni nyịna. Ẹnaan miḍighi ịmi igeny kụ mị ạmoogh ni oomo ạraraar dị mị ạwa.” Kụ ọdi ạkpaariom nyọdi kụ ọdi ạar.

¹² Kụ Ịso ạḅem mọ, “Ụgua omiigh erelhe; itu ọḍua kụ mị kaḍiemi ghisigh ạna.”

¹³ ẠJekob ạḅeni nyọdi mọ, “Oye dị ụmoogh ịmi, nạ alegheri ni mọ bụen phọ ịbam ạnmuny. Mị kụ rapogh ghan ịga phọ rꞌịnam mọ rẹngo bọ mạmaam. Eḍighi ịdi ọkpagh bịdi iboom ghạlamo ḍiniin aḍughul-otu, oomo aḍita phọ kemugh ni ẹman.

¹⁴ Oye dị ụmoogh ịmi, ḍiemi ghan mị kạkoronaan ghan kụ atu, ịlo mị katue ạpamam ịnam mọ, rꞌạnmuny phọ, tụtu mị aru ạteeny nyịna ẹpe Idom.”

¹⁵ Ịso ạḅem mọ, “Mị kạwilenaan nyịna buniin awe phọ ạbuen rꞌạmi oru bọ.” Kụ ạJekob ạḅem mọ, “Oomo ịpe mị ụ́wa. Mị rạwa ọnma ighirigiir oye phọ ọpo ụmoogh bọ ịmi bịn.”

¹⁶ Kụ ḍio phọ ạḍiphe phọ Ịso anyeene ogheel ẹpe Idom.

¹⁷ Kụ ạJekob ạghi ẹpe Sukot, ekpisi dị ọdi ạlogh otu, asuanaan ạgalaga ịnam mọ ọdi. Ịdipho kụ iḍighi kụ oghol bọ esi phọ mọ aSukot.

¹⁸ ẠJekob ạḍua bọ Mesopotamia ratigheel, kụ ạghi asi Sẹkem ẹpe eelhe phọ aKenan rꞌẹepho, kụ azu ogbogo ọdi de ạtugbiir ạroogho phọ etuman bọ ẹmha phọ kụ arugh sịphe.

¹⁹ Ọdi agho ẹkpigh ade phọ ạḍiphe ḍịghaagh ạnmuny ạnmuny aHamor ọde phọ ạSekem, ikpoki dị ẹman oniin okuron ipoḍi asilva.

²⁰ Kụ ạkan sịphe phọ enmeny ạrikia, kụ aghol ḍien mọ Ẹl-Ẹlohe-Ịzirel.