Emiighom 30 - Ạḍinya Iigbia

¹ Mem dị aRechel ạmiin bọ mọ ọno ọ́maranaan Jẹkob rꞌoniin ọony, kụ ạrolom ịghughian umarani phọ ọdi; kụ ạḅeni Jẹkob mọ, “Ụngo ịmi nmụny mị ụmar aani. Ịduon ílho, pọ mị kamugh.”

² ẠJekob ạghagham ologhi Rechel kụ ạḅem mọ, “Mị kátue ạsighe dọl Ẹnaan. Ọdi kụ oye phọ aḍue bọ ọophi ẹmaria phọ ạna.”

³ ARechel ạḅeni Jẹkob mọ, “Pọrono sịen ọnyani-otu phọ ạmi. Kịa ọdi rꞌạna ẹrolan esi, ọbo mị ạmoogh aani mọony.”

⁴ Kụ ọdi ạḅogh Bilha ọnyani-otu phọ ọdi ạngo Jẹkob ịdipho ạnir.

⁵ ABilha aamor kụ ạmaranaan Jẹkob olephiri.

⁶ ARechel ạḅem mọ, “Ẹnaan mesoph igheelemi ịmi, kụ mạnaghanan ẹḍogh phọ ạmi kụ mụngo ịmi mọony,” kụ aghol ḍien ọony phọ mọ ạDan.

⁷ ABilha ọnyani-otu phọ aRechel ạḅile aamor kụ ạmaranaan Jẹkob ọnon ọony.

⁸ ARechel ạḅem mọ, “Mị rꞌumarani phọ ạmi mọgba iboom ịnugh, kụ mị kụ mạkpar apu nyọdi,” kụ aghol ḍien ọony phọ mọ ạNaftalai.

⁹ ALia rọmiin bọ mọ ọno mạwile ẹmaria, kụ ạsighe Zilpa ọnyani-otu phọ ọdi ạngo Jẹkob ịdipho ạnir.

¹⁰ AZilpa ọnyani-otu phọ aLia ạmaranaan Jẹkob olephiri.

¹¹ ALia ạḅem mọ, “Mụen phọ amuuḅi amaazuan,” kụ ọdi aghol ḍien ọony phọ mọ ạGad.

¹² AZilpa ọnyani-otu phọ aLia ạḅile ạmaranaan Jẹkob ọnon olephiri.

¹³ ALia ạḅem mọ, “Ologhi ạmi mạḅaal. Oomo arisina phọ kụmagh ghan ịmi mọ ạnir ịiseeny,” kụ ọdi aghol ḍien ọony phọ mọ Ạser.

¹⁴ Ịteeny mem ogbo ịbiakpa kụ aRuben ạghi ẹpe elegheḍum kụ aḅomoghi ẹḍara dị aruomaan Lia onhiin phọ ọdi. Kụ aRechel ạḅeni Lia mọ, “Seseeny ụngaani ịmi ẹnum ẹḍara ọony phọ ạna.”

¹⁵ ALia ạḅeni Rechel mọ, “Kẹ́gbaanyan nyịna ọmooghom olhom mọ ạmi? Nyịidipho nạ rạnyaaghian kẹn ọsighiogh ẹḍara ọony ạmi?” Kụ aRechel ạḅem ịduon: “Lọ nạ kụngo ni ịmi ẹḍara ọony phọ ạna, pọ ọdi rꞌạna kẹtolan esi ḍughul phọ arodon.”

¹⁶ ẠJekob ạḍua ozo ratigheel dulhe, kụ aLia amite ạghi azuan nyọdi eten, kụ ạḅeni nyọdi mọ, “Ḍughul phọ arodon nạ rꞌạmi kụ kọmina egina esi loor esi dị mị maghoom nyịna ẹḍara ọony phọ ạmi.” Sịphe kụ ịdi ịyal phọ ạbidi ọmina ḍughul phọ ạḍiphe.

¹⁷ Kụ Ẹnaan ẹnaghanan Lia, kụ aamor, kụ ạmaranaan Jẹkob olephiri, amuneni oogh ạnmuny.

¹⁸ Kụ aLia ạḅem mọ, “Ẹnaan mịkpe ịmi rukumuan phọ ạmi, ịdi eḍighi bọ mị ụsighe ọnyani-otu ạmi ạngo olhom ạmi,” kụ ọdi aghol ḍien ọony phọ mọ ạIsaka.

¹⁹ ALia ạḅile aamor kụ ạmaranaan Jẹkob olephiri, ọḅaran rꞌọphon odiiny alephiri ạnmuny.

²⁰ Kụ aLia ạḅem mọ, “Ẹnaan mịngo ịmi ịma inmo. Nyịidipho olhom mọ ạmi kụsighe aani ịmi, ịdi eḍighi bọ mị mạmaranaan nyọdi sịen odiiny ạnmuny,” kụ ọdi aghol ḍien ọony phọ mọ ạZebiulon.

²¹ Kụ rebia ẹnum kụ ọdi aamor kụ ạmar ọnyani, kụ aghol mọ aDaina.

²² Kụ Ẹnaan ẹetughian Rechel, kụ ẹnaghanan nyọdi, kụ eghughuron oghun ẹmaria phọ ọdi.

²³ Ọdi aamor ạmar olephiri kụ ạḅem mọ, “Ẹnaan mẹsighiogh roofola phọ ạmi ụngo ịmi olephiri ọony.”

²⁴ Kụ ọdi aghol ḍien ọony phọ mọ ạJosef, kụ ạḅem mọ, “Ọmoogh-we phọ ạḅile ụngo ịmi ọnon ọony.”

Omerenyan ạJekob rꞌạLeban

²⁵ ARechel rọmar Jọsef, kụ ạJekob ạḅeni Lẹban mọ, “Meera mị ụḍua, pịdi mị aḅula kꞌayoor, kꞌayoor.

²⁶ Ụngo ịmi nmạriir phọ ạmi rꞌạnmuny phọ ạmi, bụphe mị ạtuan bọ kụ akumu nyịna, mị ukeel, ịdi eḍighi bọ nạ alegheri ni rukumuan phọ ịpe mị akumu bọ nyịna.”

²⁷ Kụ ạLeban ạḅeni nyọdi mọ, “Eru mạar dị nạ kameera ni, mọ mị ụkaaph ịphen mị rạwa bọ ọghaaph phọ. Mị ạmiin ni mọ Ọmoogh-we phọ mạtuan ẹmhu ạna ụseph ịmi.

²⁸ Kol ọnhu ikpoki lọ mị kạkpe ghan nyịna, mị ụkpe nyịna”.

²⁹ Kụ ạJekob ạḅeni nyọdi mọ, “Nạ alegheri ni ịdi mị makumu nyịna, ịdi ịnam mọ ạna meḍum esi ephoghom mọ ạmi.

³⁰ Ẹphurukpu phọ ịpe nạ ạmoogh bọ kụ mị agbi bọ oru phọ nyịidipho mẹmar emuzeḍi. Ọmoogh-we phọ rạseph nyịna kꞌaḍio phọ mị aru bọ, kụ nyịidipho mẹteeny dị mị kạmoogh aani dọl ḍịo ạmina ịlo ọphamam kꞌạmi.”

³¹ ẠLeban apuru nyọdi mọ, “Mị ạngo nyịna eeghe?” Kụ ạJekob ạphagharanaan mọ, “Mị ụ́wa rꞌeniin ịikpia. Mị kapogh ghan ḍita ịnam mọ ạna ạkiom ghisigh lọ nạ ameeraam ni ịitughian phọ ịphen.

³² Bịle mị utelhe igbo aḍita ịga phọ ạna uten rodon kụ mị ạson ạgbarion tọrobo ọony oyool-ọga lọ awil, rꞌọony ạtu-ọga lọ ạpoghogha. Ịphen bịn kụ keḍighi ikpoki dị nạ kụkpe ịmi.

³³ Ghisigh kụ ẹdi kedughanaan nyịna olegheri mụghumo mị ụrol li ịdi ẹnighe. Mem dị nạ aru ophogh olegheri ịikpia phọ ạmi, eru lọ mị ạmoogh ọga lọ ụ́ḅanana, ọlo útiagha mꞌoyool-ọga lọ úbil, pọ sịghenom mọ mị umi ni.”

³⁴ ẠLeban ameera mọ, “Ẹnighe ni, ẹrol ịdipho nạ ạḅem bọ.”

³⁵ Kụ ọlo ḍio phọ ạḍiphe ạLeban ạgbarion ni rekpe ịpe ẹgonyan bọ ẹḅile etiagha, rꞌịya ạrutu-ịga phọ ẹḅanana bọ ẹḅile etiagha ịphalaḅaal loor ạbidi, rꞌoomo ịpe ẹpoghogha bọ ḍịḅaal. Ọdi ạgbarion kẹn ni oomo iḍiil iyool-ịga ạsighe ạlogh ḍịghaagh ạnmuny ọdi.

³⁶ Pọ kụ ẹdi ạLeban ạwile Jẹkob ạḍua rꞌaḍita ịga phọ ịphen ạkel ạghi ịdi ọdi arue arelhe esi ịraar aḍughul-otu. ẠJekob aphogh ghan ḍịeri aḍita ịga phọ ạLeban.

³⁷ ẠJekob ạghi ạsighiogh imoom ọdo kịrokiro ịla ireeny aagbo, aḍighi ịkpara kụ akponyon roopho phọ pịdi ịla phọ emite eganana ịphalaḅaal.

³⁸ ẠJekob ạsighe ịkpara phọ ịpe ọdi akponyon bọ asereghi risigh ịga phọ, esi dị rọloghonaan ghan ịga phọ mụum ọphughol. Ọdi ạwile yogh ịla phọ sịphe, loor esi dị ịnam mọ ịdaaran ghan mem lọ eru ọphughol ạmuum.

³⁹ Sịphe kụ ẹdi mem dị ạrutu-ịga phọ esoph rughun ghisigh ịla phọ, bịdi ẹmaraghi nmụny dị ẹḅanana, ịdi ẹpoghogha, ịdi etiagha rꞌịphalaḅaal.

⁴⁰ Kụ ạJekob ạgbatan iyool phọ asereghi gem, kụ asomori ịga phọ ạLeban ịpe ẹgonyan bọ ḅịle ewilogh bọ. Ẹphen kụ eten dị ọdi ạsighe ạmooghom ḍita dị ọdi ạgbatan ọ́ḅophoghiom rꞌịpe ạLeban.

⁴¹ Tọrobo amem dị ịnam mọ ịpe ẹmoogh bọ ịnyaam rẹdaaran, ạJekob ạsighe ghan ịkpara phọ asereghi risigh ịnam mọ sịphe bịdi rẹki ghan bọ ọphughol ạmuum mọ; pịdi bịdi ẹrol sịphe ịkpara phọ edi bọ kụ eemorogh.

⁴² Kụ ịga phọ ịpe ịnyaam ị́moogh bọ, ọdi ósereghiom ghan sịphe phọ. Esi dị ị́kel bịn ạLeban ạmoogh oomo ịnam mọ ịpe ịnyaam ị́moogh bọ, kụ ạJekob ạmoogh oomo phọ ịpe emoon bọ.

⁴³ Ẹphen kụ eten dị ạJekob aḍumom aḍighinom ọdaam, ạmoogh ḍita ịnam, butelhedom alephiri rꞌabutelhedom ạnmariir, sịkamel rꞌịnam adool.