Emiighom 3 - Ạḍinya Iigbia

Ọḅaar ẹmhu phọ oye

¹ Ẹkaraph-ịyaar kụ ịmoogh igbogh ikeḍi epu oomo ịnam mọ Ọmoogh-we Ẹnaan phọ ạlhem bọ kụ epuru ạnir phọ mọ, “Ẹnaan ịḅeni ḍịen inyina mọ kéle eemuma ạtorobo oreeny sịphe oghoony phọ?”

² Kụ ạnir phọ ạḅeni ẹkaraph-ịyaar mọ, “Ẹkpe dị yoor role ghan ni iimuma oomo ireeny phọ edi bọ sịen oghoony phọ

³ emuton nyọpo odi bọ sịphe ogbo phọ. Ẹnaan mẹḅem mọ eemuma oreeny phọ ọpo yoor kúle ḅịle kẹn kụ́ḅogh rọḅogh ọbo yoor komuughu.”

⁴ Kụ ẹkaraph-ịyaar ẹphagharanaan ạnir phọ mọ, “Akue ni. Nyina kémugh.

⁵ Ẹnaan melhegheri mọ ḍio lọ nyina elhe iimuma oreeny phọ ọphon, pọ ariḍien anyina kẹḅaranu, nyina ẹkigh Ẹnaan elegheri igey rꞌịkaraph.”

⁶ Mem dị ạnir phọ ạmiin bọ ẹnighe oreeny phọ, kụ ạḅile ạnaghan ịdi eemuma phọ kẹdugh, rꞌịiḍaany dị keḍighi dị oye phọ kạsu ologhi, ạnir phọ ạkapharan eemuma oreeny phọ alhe. Kụ ọdi ạngo aani olhom mọ ọdi, kụ olhom mọ alhe aani.

⁷ Bịdi rolhe bọ bịn ariḍien ạbidi ẹḅaranu, kụ olhoghoma mọ bụno odi ẹdaḅa, kụ bịdi ọkologh rịnya ạfig ookpereghiom ẹdaḅa phọ ạbidi.

⁸ Kụ dulhe phọ ạḍiphe phọ kụ ẹdi olhom rꞌạnir phọ ọnaghan ẹḍogh Ọmoogh-we Ẹnaan phọ dị ratelhe yogh sịphe oghoony phọ kụ bịdi ọghi ạaghian zin ireeny sịphe oghoony phọ.

⁹ Kụ Ọmoogh-we Ẹnaan phọ ạmagh oye phọ kụ apuru mọ, “Nạ odi ẹghen?”

¹⁰ Oye phọ ạphagharanaan mọ, “Mị ụnaghan ẹḍogh ạna sịen oghoony phọ, kụ aruugu usiph ịmi ịdi eḍighi bọ mị ụrol ẹdaḅa, kụ mị ạaghian bọ.”

¹¹ Kụ Ẹnaan epuru mọ, “Ạnhian kụ ạḅeni bọ nyịna mọ nạ odi ẹdaḅa? Nạ malhe eemuma oreeny phọ ẹpe mị ạḅeni bọ nyịna mọ kále phọ ḍụghum?”

¹² Kụ oye phọ ạphagharanaan mọ, “Ạnir phọ ọpo nạ ụngo bọ ịmi mọ itughan phọ, ọdi kụ ụngo bọ ịmi eemuma oreeny phọ kụ mị ạar bọ ale.”

¹³ Ọmoogh-we Ẹnaan phọ apuru ạnir phọ mọ, “Eeghe kụ nạ aḍighi bọ ịduon phọ?” Kụ ạnir phọ ạphagharanaan mọ, “Ẹkaraph-ịyaar kụ iru iikeleghi ịmi kụ mị alhe bọ.”

Ịiruen dị Ẹnaan eegbo

¹⁴ Kụ Ọmoogh-we Ẹnaan phọ ẹḅeni ẹkaraph-ịyaar phọ mọ, “Loor ịphen phọ nạ aḍighi bọ, mị masu nyịna ọkaraph ọnhu apuemi oomo ịnam aḅirini phọ. Nạ kakuuraam ghan ọkuruḅaka ạna, kụ ale ghan ịisaar oomo asiḍughul-otu aghuḍum mọ ạna.

¹⁵ Mị kạlogh ẹpomoghian igbo ạnir phọ rꞌạna; ọony ọdi rꞌọony ạna kọtol dọl ẹpomoghian oomo amem. Ọdi kabun ghan ni ẹmhu ạna, kụ nạ alom ghan eeghim ọdi.”

¹⁶ Kụ ọdi ạḅeni ạnir phọ mọ, “Mị kạbughe ni ịminimiin phọ ạna mem eghun, ḅịle rꞌeephina mem ẹmaria. Esi ọto kụ ẹdi nạ kạsighe ghan kụ ạmaram nmụny aseere. Oomo ạruuphua phọ ạna kẹtol ghan esi olhom mọ ạna. Ọdi kụ kạtooghi ghan rạraar ạngo nyịna.”

¹⁷ Kụ ọdi ạḅeni oye phọ mọ, “Ịdipho nạ mạnaghanan bọ ọnhu ạnir phọ ạna kụ alhe bọ eemuma oreeny phọ ọpo mị ạḅeni bọ nyịna mọ kále phọ, itulughian kẹtolonaan de phọ loor ẹmhu ạna. Nạ kakumuan ni iboom oomo aghuḍum mọ ạna oḍighi ịdi ade phọ kemitiom ghan eḍien dị kẹgbaanyan nyịna olhe.

¹⁸ Ade phọ kemitiom ni iitoor rꞌiiḅurom, ḅịle nạ kale ghan ịizupha dị esi bịn ẹpe eḍum mọ.

¹⁹ Nạ kạkpar ri akumuan aloman oḍighi ịdi ade phọ kemitiom ịyaar olhe tụtu nạ aḅula sịphe ade phọ ọsighe bọ kụ ọlhemom bọ nyịna. Ụsighe ịisaar kụ ọlhemom bọ nyịna kụ nạ kaḅula ni aḍighi ịisaar phọ.”

²⁰ Ạdam aghol ḍien ạnir phọ ọdi mọ Iiv, ịdi eḍighi bọ ọdi kụ onhiin oomo awe.

²¹ Kụ Ọmoogh-we Ẹnaan phọ ẹkolonaan rukpe aruzu-ịnam emunemi Ạdam rꞌạnir phọ ọdi.

Ịdi Ẹnaan ephorogh Ạdam rꞌaIiv emitiom oghoony phọ

²² Kụ Ọmoogh-we Ẹnaan phọ ẹḅem mọ, “Nyịidipho oye phọ mạghigh ọnyo ayira malhegheri igey rꞌịkaraph. Kúmeera bịdi ọsighe oreeny aghuḍum mọ olhe ọbo bịdi kọtol ghan bọ kꞌagee-pọ.”

²³ Kụ iḍighi kụ Ọmoogh-we Ẹnaan phọ aphorogh bịdi sịphe oghoony phọ Iden kụ aḍighi ịdi bịdi kobul ghan de phọ ạḍiphe ọsighe bọ kụ ọlhemom bịdi.

²⁴ Ẹnaan rephorogh bọ bịdi remitiom kụ esereghi sịphe oghoony phọ ạga phọ ẹpe erumuḍio phọ remite ghan bọ rụukpaany aghuḍuul dị edi eye, rꞌelhool ẹgham dị reda kụ rẹpiph ghan ọman rꞌarisigh mọ ekori ghan oreeny aghuḍum mọ ọbo oye katuman ghan bọ.