Emiighom 26 - Ạḍinya Iigbia

Ạizik atugh ẹpe Gerar

¹ Ịgbakuro ịḅile ni esoor ẹpe ade phọ; ịphen kụ itum ịḅel ịgbakuro phọ ịpe esoor bọ mem mọ Ebraham, kụ Ạizik agheel kꞌẠbimelek ọdaam mọ aFilistia ạghi asi ẹpe Gerar.

² Kụ Ọmoogh-we phọ amite egaan kụ ạḅeni Ạizik mọ, “Úkeel ghan ẹpe Ijipt, tọl li sịen ade phọ ạḍien, sịen mị ạḅeni bọ nyịna mọ tọl.

³ Tugh ni sịen ade phọ ạḍien. Mị kạrolonaan ni nyịna kụ ạseph nyịna. Mị kạngo nyịna rꞌọto ạna oomo ade phọ ạḍien. Mị kamuneni ni ịyo phọ mị rꞌEbraham ọde phọ ạna rꞌạmi oghiran bọ.

⁴ Kụ mị aḍighi ịdi ạnmuny phọ ạna kọmar omuzeḍi ịdipho ạraanaan phọ edi bọ kꞌạke phọ, kụ mị ạsighe oomo ạramha phọ ịphen ạngo nmụny ạna. Kọtuan nmụny ạna kụ ọseph oomo areelhe ịsien aḅirini phọ,

⁵ ịdi eḍighi bọ Ebraham ụnaghanan ịmi, ạnaghanan ịpe mị ạḅeni bọ nyọdi, kụ aako iilogh phọ ạmi rꞌịtooghi phọ ạmi rꞌeḍighinom ịyaar phọ ạmi.”

⁶ Pọ kụ ẹdi Ạizik arugh bọ pạ Gerar.

⁷ Kụ awe ịpa ẹmha phọ opuru nyọdi ịlo ạnir phọ ọdi. Kụ ọdi ạḅeni mọ, “Ọdi umarani ạmi.” Loor oghiilaan ọbo awe ẹmha phọ kọtuan ghan bọ loor ẹnighe phọ ạRibeka okiigh nyọdi kụ ọ́ḅem bọ mọ ọdi ạnir ọno, ịdi eḍighi bọ ọdi kụ ạnir dị ạkaraghi bọ ni ạnighe.

⁸ Bịdi mọrol ẹpe phọ obia kụ Ọdaam Ạbimelek aFilistia phọ ạrol kꞌọdi aḅiila ẹbam eghuugh otu phọ kụ ạmiin Ạizik rꞌạRibeka ạnir phọ ọdi rọdo ịdi ropegh.

⁹ Kụ Ạbimelek ạmagh Ạizik kụ ạḅeni mọ, “Tọ, ọkar igeny ọdi phọ ạnir ạna ni. Uḍighi ika kụ nạ ạḅem bọ mọ ọdi umarani ạna?” Ạizik ạḅeni nyọdi mọ, “Mị ugbiom mọ, ịdipho oḍighom ịyaar, kọtuan ẹmhu ọdi bịn ughiigh ịmi.”

¹⁰ Kụ Ạbimelek ạḅeni mọ, “Ịphen nạ uḍighi bọ iyoor ịghen? Mụghumo oniin oye ạsighe ni ạnir phọ ạna ạrolan esi, tụ ọbo nạ mạsighe ịiḅaghami ạḅam ẹmhu ayoor.”

¹¹ Kụ Ạbimelek ạphur rụru we phọ ọdi mọ, “Tọrobo oye lọ ạḅogh oye phọ ọphon, mọ ạḅogh ạnir phọ ọdi, pọ kokiigh ni oye phọ ọpo.”

¹² Ạizik aḅeph ozo sịphe ade phọ kụ lhạ phọ ạḍiphe phọ ọdi abugha ni iboom ibugha dị esoor oniin okuron amem epu ịpe ọdi aḅeph bọ loor esi dị Ọmoogh-we phọ ạseph nyọdi.

¹³ Oye phọ aḍumaan rạki ghisigh, kụ ọdi ạmoogh ni eboom ẹelha.

¹⁴ Ọdi mạmoogh iyool-ịga, rụtu-ịga, sịnam rꞌaḍita ạnmuny-otu, kụ awe ạbuo aFilistia phọ ọlogh nyọdi ḍien.

¹⁵ Oomo asighuḍia phọ abutelhedom ọde phọ ọdi oguphogh bọ mem mọ Ebraham, awe ạbuo aFilistia phọ omirighan bịdi, orool ọogha oḍueghiom sughuḍia phọ.

¹⁶ Pọ kụ ẹdi Ạbimelek ạḅeni Ạizik mọ, “Kookoroghian ạḍua ẹphen, ịdi eḍighi bọ nạ maḍum upu iyoor.”

¹⁷ Sịphe kụ ẹdi Ạizik ạḍua ẹpe phọ, kụ agheel ẹpe Eḍiiny aGerar kụ ạlogh ogbogo kụ arugh ẹpe.

¹⁸ Ạizik ạḅile aguphogh ẹpe phọ sighuḍia ạmuum, ịpe oguphogh bọ mem mọ Ebraham ọde phọ ọdi odi bọ; Ebraham romugh bịn bụo aFilistia phọ omirighan bịdi; kụ Ạizik ạtuugh siḍien phọ ịpe ọde phọ ọdi aaghologh bọ aaghologh.

¹⁹ Abutelhedom mọ Ạizik oguph ẹpe eḍiinyaan bọ bịn okputon okol ạmuum.

²⁰ Abupoghom ịnam aGerar rꞌabupoghom ịnam Ạizik ọtuan ghuḍia phọ ọruanagh, kụ ọḅem ghan mọ, “Mụen ạmuum ayoor,” kụ oghol ḍien aghuḍia phọ mọ Ọruonu, ịdi eḍighi bọ bịdi rotu esi ọdi ḍịaḅa.

²¹ Kụ bịdi ọḅile oguph ọnon aghuḍia, kụ bịdi ọḅile kẹn ọtuan ghuḍia phọ ọpo ọruanagh, kụ ọdi aghol ghuḍia phọ ọpo mọ Ạmulogh-ḍien.

²² Ọdi ạwile pạ phọ kụ ạghi ẹnon esi kụ aguph ọnon aghuḍia; kụ bịdi ụ́tuan mun ghuḍia nyọon ụ́tuanagh. Kụ ọdi aghol ḍien aghuḍia phọ mọ Ẹereegh; ịduon phọ rẹḅem ghan mọ, “Ọmoogh-we phọ mụngo iyira ẹereegh orugh ịsien ade phọ, kụ yira kọmoogh ẹeḍiom sịen ade phọ ạḍien.”

²³ Kụ Ạizik ạḍua ẹpe phọ agheel Beersheba.

²⁴ Kụ Ọmoogh-we phọ amite egaan esi ọdi ḍughul phọ ạḍiphe kụ ạḅeni nyọdi mọ, “Mị kụ Ẹnaan Ebraham mọ ọde phọ ạna, aruugu nyịna kúsiph. Mị odianaan ni rꞌạna. Mị kạseph ni nyịna, mị kạtuan ni ẹmhu Ebraham otelhedom mọ ạmi ạbughe oghiil ạna.”

²⁵ Kụ Ạizik ạkan enmeny ạrikia aghol ḍien Ọmoogh-we phọ kụ ạlogh ogbogo sịphe phọ. Kụ abutelhedom mọ Ạizik oguph ọnon aghuḍia sịphe phọ.

Ịyo phọ Ạizik rꞌẠbimelek oghiran bọ

²⁶ Ạbimelek, Ahuzat ọyaghiri ọdi rꞌaFikol uwo ẹmhu ạbuo ẹgham mọ ọdi, ọḍua Gerar ọghi kꞌẠizik.

²⁷ Sịphe kụ ẹdi Ạizik apuru bịdi mọ, “Nyina ịtuan eeghe kụ eru kꞌạmi? Nyina ịlogh ịmi ḍien, iphorogh ịmi ẹmha anyina.”

²⁸ Kụ bịdi ọḅeni nyọdi mọ, “Yoor ọmiin mọ Ọmoogh-we phọ odianaan rꞌạna, kụ yoor uru mọ nạ rꞌayoor oghiran ịyo; oghiran ịyo aghuḍuul.

²⁹ Nạ iyoor ịkaraph kúgbiom; yoor nyịna ịkaraph kúgbiom. Ịdipho yoor nyịna ịkaraph úḍighi bọ, yoor ọwile bọ nyịna mọ ḍụa rꞌẹwoor, nyịidipho nạ oye dị Ọmoogh-we phọ ạseph.”

³⁰ Kụ Ạizik ạko bịdi igoni kụ bịdi olhe ọphughol.

³¹ Kụ bịdi oḅetenu eḅon ạḍiroor kụ oghiran ịyo. Ạizik arorori bịdi asiemi eten, kụ bịdi ogheel rꞌẹepho.

³² Ḍio phọ ạḍiphe abutelhedom mọ Ạizik oru ọḅeni nyọdi ịlo aghuḍia phọ bịdi oguph bọ, mọ bụno mọteeny mụum.

³³ Kụ ọdi aghol ghuḍia phọ mọ Ịyo. Ịpe kụ ẹdi oghol bọ ẹmha phọ ẹpe phọ mọ aBeersheba kꞌarodon.

Aruuruen ạnmariir phọ Ịso aphinogh bọ

³⁴ Mem dị Ịso mạman inyadi ạsia kụ aphinogh ịyal ạnmanyaan ạHitait: Judit ọnyani phọ aBeeri, ḅịle rꞌaBasemat ọnyani phọ Elon.

³⁵ Bụen phọ ụngo Ạizik rꞌạRibeka mukum ologhi.