Emiighom 22 - Ạḍinya Iigbia

Ẹnaan ẹto ẹḅeni Ebraham oghiigh Ạizik oḍighinom ịyaar aghuḍum

¹ Ịphen phọ reru eten, kụ Ẹnaan ẹdegh Ebraham kụ ẹmagh, “Ebraham,” kụ ọdi ameera kụ ạḅem mọ, “Pọrono, ạmi sịen.”

² Kụ Ẹnaan ẹḅeni nyọdi mọ, “Sịghe mọony phọ ạna, ogina phọ ọony phọ ạna Ạizik, ọpo nạ ạphomoghian bọ iboom, sịghe nyọdi ạghimom ẹpe ade phọ aMoraya, eegum dị mị kạma aḍeenaan nyịna, ạsighe nyọdi ạphighironom ẹkia oguom ạnian.”

³ Eḅon ạḍieri phọ ạḍiroor phọ bịn Ebraham aḅetenu apol ịnum ịpe oḍighinom ẹkia phọ, ạsaany ẹnam adool ọdi, kụ ạsighe ịyal abutelhedom mọ ọdi rꞌẠizik ọony phọ ọdi. Bịdi ọḍua onyeene ekpisi phọ Ẹnaan ẹmha bọ eḍeenaan nyọdi.

⁴ Esi ịraar aḍughul-otu kụ Ebraham aphoophe riḍien aphogh kụ ạmiin esi phọ kꞌẹpe egher.

⁵ Ebraham ạḅeni we phọ ọdi mọ, “Nyina rꞌẹnam adool phọ ịtol sịen, kụ mị rꞌọbumoony phọ kọki ẹpe risigh ọoḅereghi, kụ yoor oḅula ịteeny inyina.”

⁶ Kụ Ebraham ạsighe ịpe oḍighinom ẹkia phọ ạleti Ạizik ọony phọ ọdi; kụ ọdi rꞌaloor ạpham elhool rꞌiiḅu ạnian dị kọkpooniom nịan. Ịdipho bịdi orelhian bọ rọki,

⁷ Ạizik apuru Ebraham ọde phọ ọdi mọ, “Ọde ạmi?” Kụ ọdi ameera kụ ạḅem mọ, “Ii, mọony ạmi?” Kụ Ạizik apuru nyọdi mọ, “Ḍịen phọ ạnian, ịphen phọ ịpe, kụ ọony oyool-ọga phọ koḍighinom bọ ịyaar aghuḍum mọ, odi ẹghen?”

⁸ Ebraham ạphagharanaan mọ, “Mọony ạmi, Ẹnaan kẹngo ni ọony oyool-ọga dị koḍighinom ịyaar aghuḍum mọ.” Kụ ịyal phọ ạbidi orelhian onyeene.

⁹ Mem dị bịdi oru osi esi phọ ẹpe Ẹnaan mẹma bọ eḍeenaan nyọdi, Ebraham ạkan enmeny ạrikia phọ, ạde ịpe phọ pạ ạnyu enmeny phọ, kụ ạphaḍi Ạizik ọony phọ ọdi, ạsighe nyọdi ạḅam ạnyu enmeny phọ sịphe ạnyu ịpe phọ.

¹⁰ Pạ kụ ẹdi Ebraham asele ḍịghaagh ọdi akoph elhool phọ ịlo oghiigh ọony phọ ọdi.

¹¹ Kụ ọokpaany Ọmoogh-we phọ ạrol li ẹpe kꞌạke ạmagh nyọdi mọ, “Ebraham, Ebraham!” Kụ ọdi ameera mọ, “Ii. Pọrono ạmi sịen.”

¹² Kụ ạḅeni nyọdi mọ, “Káben mọony phọ, ḅịle kẹn káḍighi nyọdi ịyaar: nyịidipho mị malhegheri mọ nạ rakueni ghan ni ḅịle raḍighi ni ịto Ẹnaan esi dị nạ ọ́lhogh ạaku ọony phọ ạna, ogina phọ ọony phọ ạna, oghine ạmi.”

¹³ Ebraham aphoophe riḍien ọdi aphogh, kụ ạmiin ẹphen ịigaany phọ ọdi odughuna dị iroghoḍigh eghinighi rạphaal phọ. Ebraham ạghi ạsighe odughuna phọ ạphighironom ẹkia oguom ạnian phọ, ẹsighe esi ọony phọ ọdi.

¹⁴ Kụ Ebraham aghol esi phọ ịpa phọ mọ “Ẹnaan kẹngo ghan ni.” Rọḅem ghan ni ịduon phọ kꞌarodon mọ, “Ọmoogh-we phọ kạngo ghan ni ẹpe eegum mọ ọdi.”

¹⁵ Ọokpaany phọ Ọmoogh-we phọ ạrol bọ ẹpe kꞌạke phọ ạḅile ạmagh Ebraham amuneni ịyal amem.

¹⁶ Kụ Ọmoogh-we phọ ạḅem mọ, “Mị maghunyan esi aḍien phọ ạmi mọ mị kạbughe ni ạḅile ạseph nyịna. Loor esi dị nạ aḍighi bọ ịduon kụ ạaku ụ́logh bọ ogina ọony phọ ạna ughine ạmi,

¹⁷ mị maguanaan mọ mị kạngo nyịna ịbadi ẹemara dị kẹtol ịdipho ạraanaan phọ edi bọ kꞌạke phọ rꞌikpo ịisaar phọ edi bọ sịphe ọphiiny phọ. Ẹemara ẹemara ạna kọkpar ri opu ghan bụmulogh-ḍien ạbidi.

¹⁸ Kọtuan nmụny ạna kụ ọseph oomo areelhe ịsien aḅirini phọ, ịdi eḍighi bọ nạ mụnaghanan ịmi.”

¹⁹ Ebraham aḅula ạghi ạteeny butelhedom mọ ọdi, kụ bịdi oḅetenu orelhian osi Beersheba, kụ Ebraham arugh ẹpe Beersheba.

Bụo ẹemara aNahor

²⁰ Ịphen phọ reru reten, kụ ọḅeni Ebraham mọ, “AMilka mạmaraghinaan Nahor umor phọ ạna nmụny:

²¹ Ụz ọkpana ọdi, Buz umor ọdi rꞌạKemuel ọde phọ Aram,

²² Kesed, Hazo, Pildas, Jidlaf rꞌạBetuel.”

²³ ẠBetuel ạmar Rịbeka. Ọphaanya phọ ạbuen kụ ạbudi aMilka ạmaranaan bọ Nahor umor phọ Ebraham.

²⁴ Ạnir dị odi ạgaany dị oghol mọ aRiuma ạmaranaan nyọdi Teba, Gaham, Tahas rꞌaMaaka.