Emiighom 21 - Ạḍinya Iigbia

Ịdi ọmar bọ Ạizik

¹ Ọmoogh-we phọ ạseph ni Sera, ịdipho ọdi ạḅem bọ; Ọmoogh-we phọ ạtuugh ịpe ọdi aguanaan bọ Sera aḍighi.

² ASera aamor kụ ạmaranaan Ebraham olephiri ọony mem dị Ebraham mạkpo, mem mọ ạmuphe Ẹnaan ẹḅem bọ mọ kọmar nyọdi.

³ Ebraham aghol ḍien ọony phọ ọpo aSera ạmaranaan bọ nyọdi mọ Ạizik.

⁴ Kụ mem dị Ạizik ạman ọphaanya aḍughul-otu, Ebraham aḍun nyọdi, ịdipho Ẹnaan ẹto bọ ẹḅeni nyọdi.

⁵ Ebraham mạman oniin okuron ạsia kụ ọmaranaan bọ nyọdi Ạizik.

⁶ Kụ aSera ạḅem mọ, “Ẹnaan mịngo ịmi iboh rꞌạreer; kụ oomo ạbuphe kọnaghan bọ kụdaph ni ịmi ọmilogh aani.”

⁷ Kụ ạloghom mọ, “Ạnhian kụ mụḅeni Ebraham mọ aSera kạngo ni mọony mạmaam? Kụ ịduon phọ mị mạmaranaan nyọdi mọony, sịen ạḍikpo phọ ọdi.”

⁸ Ọony phọ aphoph kụ ḍio phọ oghine bọ nyọdi mạmaam mọ Ebraham alhe ni eboom ẹyaal.

Ophorogh Hegar rꞌỊsmael omitiom

⁹ Eniin aḍio Ịsmael ọpo aHegar ọlo Ijipt phọ ạmaranaan bọ Ebraham apheghan ghan Ạizik ọony phọ aSera.

¹⁰ ASera ạḅeni Ebraham mọ, “Porogh ẹbene-ạnir phọ ọphon rꞌọony phọ ọdi amitiom sịen otu phọ ọphon, ịdi eḍighi bọ ọony ẹbene-ạnir phọ ọphon rꞌẠizik ọony phọ ạmi kụ́ḅaran úle erua.”

¹¹ Ịphen phọ ịiḅaghami ni Ebraham iboom, loor ẹmhu ọony phọ ọdi.

¹² Ẹnaan ẹḅeni Ebraham mọ, “Kạ́aḅaghamian loor esi ẹmhu ọony phọ rꞌẹbene phọ ạna aHegar. Tụugh ịpe aSera ạḅeni bọ nyịna aḍighi. Nạ kạtuan Ạizik kụ ạmar ẹemara etum ẹemara.

¹³ Mị kạngaani kẹn ni ịbadi ạnmuny ọony phọ ọpo ẹbene-ạnir phọ, ịdi bịdi koḍighi ni eelhe. Ọdi kẹn ọony ạna ni.”

¹⁴ Ebraham aḅetenu eḅon ạḍiroor kụ ạsighe ạbred rꞌokuru ozu ẹnam amuzeḍi mụum ạleti ọpha aHegar rꞌọony phọ kụ arorori amitiom. Kụ ọdi ạḍua kụ aghiraan ghan ẹpe Ẹdala aBeersheba.

¹⁵ Ạmuum mọ romuneen, kụ aHegar ạsighe mọony phọ aseere zin oreeny uba.

¹⁶ AHegar ạḍua arelhe ạkel ạrol ạgumom ọman, esi dị epel ẹdi ọraph ẹkpina kẹ́teeny, kụ ạḅem mọ, “Mị kátue ạkparam ọmiin ịdi ọony phọ ạmi kamugh.” Kụ ạrol ạgumom ọman kụ amiigh omoghi.

¹⁷ Ẹnaan ẹnaghan ẹḍogh ọbumoony phọ, kụ Ọokpaany Ẹnaan dị ạrol ẹpe kꞌạke ạmagh Hegar kụ apuru nyọdi mọ, “Nạ ramoghi ghan eeghe? Aruugu nyịna kúsiph. Ẹnaan mẹnaghan ni ẹḍogh ọony phọ sịphe odi bọ.

¹⁸ Ḅetenu ạghi aḅeton ọbumoony phọ ạphaara. Mị kạbughe ni ẹmaria phọ ọdi kụ bịdi ọda ghan eboom eelhe.”

¹⁹ Kụ Ẹnaan ẹḅarion riḍien aHegar kụ ọdi ạmiin ghuḍia. Ọdi ạghi aḍu amuzeḍi okuru ozu ẹnam mọ mụum, kụ ạngo ọbumoony phọ mọ ạphughol.

²⁰ Ẹnaan ẹrolan rꞌọony phọ, kụ aphoph, arugh ẹpe ẹdala phọ. Kụ ọdi ạmaar ịtaya.

²¹ Ọdi arugh ẹpe Ẹdala ạParan; kụ onhiin phọ ọdi aphinanaan nyọdi ạnir ọlo Ijipt.

Ịyo phọ Ebraham rꞌẠbimelek oghiran bọ

²² Mem mọ ạmuphe phọ, Ạbimelek rꞌaFikol uwo ẹmhu ạbuo ẹgham mọ ọdi uru ni ọḅeni Ebraham mọ, “Ẹnaan edianaan rꞌạna esi oomo ịpe nạ raḍighi bọ.

²³ Ịduon kụ iḍighi kol ḍien phọ Ẹnaan akunyanam mọ nạ kúukeleghi ghan ịmi rꞌạnmuny ạmi rꞌạnmuny ạnmuny ạmi, loor ọnma ighirigiir phọ mị ạnma bọ nyịna. Tụugh ịdipho ạnma ighirigiir sịen ade phọ ạḍien nạ arugh bọ.”

²⁴ Ebraham ạphagharanaan ni mọ ọno kakunya ni.

²⁵ Iru ni ẹteeny mem dị abutelhedom mọ Ạbimelek omirighan Ebraham ghuḍia ạmuum, kụ Ebraham ạghaaph ịpe emiteghu bọ ạḅeni Ạbimelek.

²⁶ Kụ Ạbimelek ạphagharanaan mọ, “Mị úlegheri oye phọ aḍighi bọ ịphen phọ. Nạ ịmi kụ̋ḅeni ghan. Mị ụ́naghan ịphen phọ tụtu arodon nạ rạkaaph bọ.”

²⁷ Kụ Ebraham ạsighe iyool-ịga rꞌạsinam ạngo Ạbimelek, kụ ịyal phọ ạbidi oghiran ịyo.

²⁸ Ebraham ạsighe oḍual ịya ạnmuny iyool-ịga amitiom aseere gem.

²⁹ Kụ Ạbimelek apuru Ebraham mọ, “Nạ ụtuan ika kụ ạsighe bọ oḍual ịya ạnmuny iyool-ịga phọ ịphen amitiom mọ aseere gem?”

³⁰ Kụ Ebraham ạphagharanaan mọ, “Sịghe aani iyool-ịga phọ ịphen, eḍighi eḍeenaan mọ mị kụ uguph ghuḍia phọ ọphon.”

³¹ Kụ ạtuan ịduon phọ kụ aghol esi phọ aBeersheba, loor ịdi ịyal phọ ạbidi ughiran ịyo phọ sịphe phọ.

³² Ọḅophan ọnhu ạbidi ọphon pạ Beersheba reten bịn Ạbimelek rꞌaFikol uwo ẹmhu ạbuo ẹgham mọ ọdi oḅula ẹpe eelhe phọ aFilistia.

³³ Ebraham ạzuph oreeny dị oghol mọ ạtamarisik sịphe Beersheba; kụ agholom ḍien Ọmoogh-we Ẹnaan phọ edi ghan bọ kꞌagee-pọ.

³⁴ Ebraham ạrol li iiruen ebia iboom ẹpe eelhe phọ aFilistia.