Emiighom 18 - Ạḍinya Iigbia

Ẹnaan eguanaan Ebraham mọ aSera kạmar mọony

¹ Eniin aḍio kụ Ọmoogh-we phọ amite egaan esi Ebraham esi dị etuman igbogh ireeny phọ esiighi bọ ẹpe Mamre. Aḍio phọ rẹkologhol, Ebraham ạtol sịphe ọnhu-aḍibuo ogbogo phọ ọdi ogbo ootaany,

² kụ ạnmanaghian aphogh ạnyu kụ ạmiin ịraar awe dị ọmeregha elhor ọdi. Mem dị ọdi ạmiin bọ bịdi kụ aghiil ạghi azuan bịdi eten, kụ azuman akaram ghisigh ọdi ude,

³ kụ ọdi ạḅem mọ, “We phọ, iseseeny, kétenom otu phọ ạmi dị nyina ị́meera, mị odi ni sịen okumu ọngo anyina.

⁴ Mị kiruom inyina mụum eetola ruwol anyina. Ịtol ephooghian sịen eeḍian oreeny phọ ọphon.

⁵ Mị kaḍighi mọony eḍien dị kịngo inyina ịnyaam ọghimom erelhe phọ anyina. Nyina mighueni ịmi oḍigh kꞌạmi phọ, mị kakumu ni ịngo inyina.” Kụ bịdi ọphagharanaan mọ, “Maḍighi. Yoor omeeraam ni.”

⁶ Ebraham aagborion ạghi aḍigh ogbogo phọ ọdi ạḅeni Sera mọ, “Gboogborion ạghi ạto ịraar ạrukpa ịma aflaur ạzughuḍi aḅol ạphophoghi.”

⁷ Ebraham aghiil ạghi ẹpe ịnam-otu phọ ọdi ẹrol bọ kụ asiph onyugheel ạnam dị amoon kụ ạbugh kụ ạngo oniin onyugheel ọony mọ ạghi aagborion aselemi ịlo ạany.

⁸ Ọdi ạsighe mạmaam ạnam, rꞌạbota rꞌẹnam mọ ọsa bọ ạḅamaghinaan bịdi; kụ ạmeera atuman bịdi sịphe eeḍian oreeny phọ, kụ bịdi ole.

⁹ Pọ kụ amem dị bịdi opuru nyọdi mọ, “ASera ạnir phọ ạna ọdi ẹghen?” Kụ ọdi ạḅeni bịdi mọ, “Ọdi odi ologhi otu sịphe ogbogo phọ.”

¹⁰ Kụ oniin ọnyo ạbidi ạḅem mọ, “Emiigh nyịidipho kụ ẹghi ẹman esugha ụnwanyu, mị kạḅile ni aḅula sịen ạteeny nyịna. ASera ạnir phọ ạna kạmar ri mọony.” Kụ aSera ạrol ọman sịphe eghuugh ogbogo phọ kụ ạnaghan ịpe rọkaaph bọ.

¹¹ Ebraham rꞌaSera mọkpo oḍighi ikumoor awe, ḅịle aSera mạwile ọghi ẹmha ạnmariir.

¹² Kụ iḍighi kụ aSera ạmiloghom ologhi kụ ạḅem mọ, “Nyịidipho mịna mạkpo bọ, ḅịle olhom mọ ạmi ạkpo, ạḍidugh ọrolan esi olephiri ọony edi nịiniin esi ạmina?”

¹³ Kụ Ọmoogh-we phọ apuru Ebraham mọ, “ASera ạtu ika kụ ạmilogh bọ, kụ ạḅem ghan bọ mọ, ‘Okumor ạnir phọ ạmina kụ kạmar mọony?’

¹⁴ Ịyaar dị ẹkparanaan Ọmoogh-we phọ oḍighi edi ni ḍụghum? Ịdipho mị ạḅem bọ, emiigh nyịidipho kụ ẹteeny esugha ụnwanyu mị ạḅile ni raḅula sịen, kụ aSera kạmar ri olephiri.”

¹⁵ Loor esi oghiilaan aSera ạpharanaan ni kụ ạḅem mọ, “Mị ụ́milogh,” kụ ọdi ạphagharanaan nyọdi mọ, “Ii. Nạ ụmilogh ni.”

Ebraham akol Sọdom ạaḅereghian

¹⁶ Kụ awe phọ oḅerenu omite osi esi dị esoman Sọdom kụ Ebraham ạdaph ororori ạbidi.

¹⁷ Kụ Ọmoogh-we phọ mọ, “Mị kạ́booghinaan Ebraham ịyaar dị mị kaḍighi.

¹⁸ Bụo ẹemara ẹemara phọ ọdi koḍighi ni eboom eelhe. Kọtuan nyọdi kụ ọseph oomo areelhe ịsien aḅirini phọ.

¹⁹ Mị mạsaḅar nyọdi. Ọdi kụ kạpur ri rụru ạnmuny ọdi rꞌọto kꞌọdi mọ bịdi ọdaph reten Ọmoogh-we phọ ọḅile ookuan oḍighi yogh ghan ịpe ẹnighe bọ, ọbo mị aḍighi Ebraham ịpe mị aguanaan bọ.”

²⁰ Kụ Ọmoogh-we phọ ạḅeni Ebraham mọ, “Ịpe mụḅeni bọ ịmi ịlo ạbuo ạSodom rꞌaGomora ebeeph ni iboom. Ạsipioghom mọ ạbidi mẹphughan.

²¹ Mị ạmoogh ọghi ọwaaghi ọmiin mụghumo ạsiagba phọ mị ạnaghan bọ ịduon phọ ni.”

²² Kụ ịyal phọ awe phọ onyeene osoman ẹpe Sọdom, kụ Ọmoogh-we phọ ạrol rꞌEbraham.

²³ Kụ Ebraham ạabeeph kụ apuru mọ, “Nạ kapiemi ni bụo aruukuan phọ rꞌạbuo ạsipioghom mọ?

²⁴ Eḍighi ịyaar dị oogh dị ạbuo aruukuan kụ odi ẹmha phọ, nạ kapiemi ni oomo ẹmha phọ? Nạ kạbilenaan ọphelom ooghdi awe phọ?

²⁵ Ọkar igey nạ kạze bụo aruukuan rꞌạbuo ạsipioghom mọ. Kétue emite! Nạ káḍighi ịdipho. Nạ aḍighi ịdipho, pọ mọḅar bụo aruukuan rꞌạbuo ạsipioghom mọ kụ ọliom. Ịpe kétue emite. Oogboom ịiruen oomo aḅirini phọ ạkpe ni oḍighi ạraraar dị eeleeny?”

²⁶ Ọmoogh-we phọ ạphagharanaan mọ, “Eru mạar dị mị ạmiin ooghdi ạbuo aruukuan sịphe ẹmha phọ ạSodom, pọ mị kạbile ni oomo phọ ẹmha phọ loor ẹmhu ạbidi.”

²⁷ Ebraham ạḅile ạghaaph mọ, “Seseeny sạr ụwilenaan ịmi oḅom ẹmhu ọghaaphan ghan rꞌạna Ọmoogh-we phọ, mị oopho oye kụ mị ụ́moogh riliom ọghaaph ịyaar.

²⁸ Eḍighi ịyaar dị inyadi rꞌoogh ạbuo aruukuan kụ kọtol dị ụ́man ooghdi, nạ kapiemi ni ẹmha phọ loor oogh phọ úlho bọ?” Kụ Ọmoogh-we phọ ạphagharanaan mọ, “Mị kápiemi ẹmha phọ eru mạar dị mị ạmiin inyadi rꞌoogh.”

²⁹ Ebraham ạḅile ni apuru mọ, “Iini inyadi ạbuo aruukuan kụ kọtol?” Ọdi ạphagharanaan mọ, “Mị kápiemi eḍighi ịyaar dị inyadi awe kụ ọdi.”

³⁰ Ebraham ạḅem mọ, “Seseeny, kípin ologhi ạna Ọmoogh-we, mị kạḅile ni ạkaaph ịphen. Keḍighi ika eḍigh ịyaar dị ịraardi awe kụ odi?” Kụ ọdi ạḅem mọ, “Mị kápiemi eru mạar dị mị ạmiin ịraardi.”

³¹ Ebraham ạḅem mọ, “Seseeny sạr ụwilenaan ịmi oḅom ẹmhu ọghaaphan ghan rꞌạna Ọmoogh-we phọ. Eḍighi ịyaar dị ịyaldi bịn kụ odi.” Kụ ọdi ạḅem mọ, “Mị kápiemi eru mạar dị mị ạmiin ịyaldi.”

³² Ebraham ạḅem mọ, “Seseeny, kípin ologhi ạna Ọmoogh-we, mị kạḅile ni ạḅa mem bịn. Keḍighi ika eḍighi ịyaar dị ọmiin ḍioph bịn?” Kụ ọdi ạḅem mọ, “Mị kápiemi eru mạar dị mị ạmiin ḍioph.”

³³ Rọghaaph bọ ọghaaph phọ rọmadan, bịn Ọmoogh-we phọ ạḍua, kụ Ebraham aḅula agheel kꞌọdi.