Emiighom 13 - Ạḍinya Iigbia

Ebram rꞌạLot ọgbaranaan

¹ Ebram anyeene ạga ephunom amite ẹpe Ijipt, kụ ạghi ạga esoorom ạpakiri aKenan, ạphamam ni ạnir ọdi rꞌoomo ạraraar phọ ịpe ọdi ạmoogh bọ, kụ ạLot ạdaph ni nyọdi.

² Ebram aḍighi ni oboom ọdaam, ạmoogh ni ịminighan ịnam rꞌasilva rꞌagol.

³ Kụ ọdi ạḍua kụ arelhe ghan ạgba esi kụ ạrol rapogh Bẹtel, sịphe arugbogo phọ ọdi ạrol ghan bọ, igbo ạBetel rꞌEai,

⁴ kụ ạḅile bọ ạghi ạteeny ạkan enmeny ạrikia phọ ọdi ạkan bọ ẹḅel amem mọ, kụ aaseeny ḍien Ọmoogh-we phọ sịphe.

⁵ Kụ ạLot phọ ạdaph ghan bọ nyọdi ạmoogh aani ni ịminighan iyool-ịga rꞌạsinam, ḅịle rꞌeghunotu rꞌabutelhedom mọ ọdi.

⁶ Ade phọ ị́manam dị oomo phọ ạbidi kọtol eniin esi loor aḍita ịnam bịdi ọmoogh bọ.

⁷ Kụ ịruonu emite ogbo awe phọ ạbuphe rokori ghan bọ ịnam mọ Ebram rꞌạbuphe ạLot. (Mem mọ ọpo phọ aKenanait rꞌạPerezait otugh ni sịphe ade phọ.)

⁸ Kụ Ebram ạḅeni Lọt mọ, “Yira abumor kụ awe phọ ạna rꞌạbuen ạmi kụ́tuanagh ghan.

⁹ Loor esi ịduon phọ, tue ọgbatanaan. Pin ạga ade phọ lọ nạ rạwa. Nạ kịa ḍiniin ạḍighaagh, mị kạki ḍịeri phọ.”

¹⁰ Kụ ạLot ạnmanaghian akoom kụ ạmiin mọ oomo ade phọ ạJodan kụ ẹdi ạmuum amuza, ẹkigh ịdipho oghoony phọ Iden rꞌịdipho eelhe phọ Ijipt, ẹpe esomanan aZoar. (Ịphen phọ memite kụ Ọmoogh-we phọ agbi bọ ophiemi ạramha phọ Sọdom rꞌaGomora.)

¹¹ Kụ iḍighi kụ ạLot aphin oomo ạḍiyaghaghaany ade phọ ạJodan aḅetenu ạghi ẹpe erumuḍio remite ghan bọ. Pọ kụ ịdi ịyal awe phọ ọgbaranaan bọ, uwo ạḍio ọdi ạghi ḍịo ọdi.

¹² Ebram ạrol sịphe ade phọ aKenan, kụ ạLot arugh igbo ạramha phọ etuman bọ Sọdom,

¹³ bụphe uḍighi bọ bụkaraph awe dị ạsipioghom mọ ạbidi eeph iboom risigh Ọmoogh-we phọ.

Ebram ạki ẹpe Hẹbron

¹⁴ Mem dị ạLot mạḍua, kụ Ọmoogh-we phọ ạḅeni Ebram mọ, “Emiigh sịen nạ odi bọ, mạar ạnmanaghian amiigha loor aphogh oomo ade phọ. Miigha loor aphogh oomo ạga phọ.

¹⁵ Oomo ade phọ ạḍien nạ rạmiin bọ mị kạngo nyịna rꞌẹemara ẹemara ạna kụ keḍighi ẹlo ạna kꞌagee-pọ.

¹⁶ Ạnmuny ạna kọtol ịdipho ịisaar ịsien ade phọ. Oye lọ arue kụ ạal ịisaar ịsien ade phọ amuneni, pọ katue ni ạbal nmụny ạna amuneni.

¹⁷ Nyịidipho ḅetenu arelhe yogh oomo ade phọ akitonom, ịdi eḍighi bọ mị kạngo nyịna oomo ade phọ ạḍien.”

¹⁸ Ebram azunyon rugbogo phọ ọdi, kụ ạḍua ạghi arugh ẹpe Hẹbron esi dị etuman ireeny ạḍiogh phọ esiighi bọ ẹpe aMamre, kụ ạkananaan enmeny ạrikia Ọmoogh-we phọ.