Emiighom 12 - Ạḍinya Iigbia

Ịdi Ẹnaan ẹmagh Ebram

¹ Ọmoogh-we phọ ạḅeni Ebram mọ, “Ḍụa sịen eelhe phọ ạna rꞌopolo phọ ạna rꞌẹmha ọde phọ ạna agheel de dị mị kaḍeenaan nyịna.

² Mị kạngo ni eboom ẹemara etum ẹemara, bịdi koḍighi ni egbogh eelhe. Mị kạseph ni nyịna, aḍighi ịdi aḍien ạna keeleghaan kụ nạ aḍighi ḍịseph.

³ Mị kạseph ni bụlo ọseph nyịna kụ ọlo mị kagurughu ni bụlo ogurughi nyịna. Esi ạna kụ ẹdi mị kạseph oomo arughunughun ịsien aḅirini phọ.”

⁴ Mem dị Ebram mạman oḍualdi rꞌoogh ạsia ọdi amiigh ni ọḍua sịphe ẹmha phọ ạHaran, ịdipho Ọmoogh-we phọ ạḅeni bọ nyọdi, kụ ạLot ạdaph aani ni nyọdi.

⁵ Ebram ạpham Serai ạnir phọ ọdi, rꞌạLot ọony umor phọ ọdi, kụ ookoroghian oomo aruphua phọ ạbidi rꞌạrebene phọ bịdi ọmoogh bọ ẹpe Hạran; kụ oḅetenu ọghi osi Kenan.

⁶ Rosi Kenan kụ Ebram arelhe yogh oomo ade phọ tụtu ọdi asi ạteeny oreeny iigbia phọ aMore esi iigbia ẹmha phọ ạSekem. (Mem mọ ọpo phọ awe aKenan otugh ni sịphe ade phọ.)

⁷ Ọmoogh-we phọ amite ni egaan esi Ebram kụ ạḅeni nyọdi mọ, “Ḍịen kụ ade phọ mị kạngo bọ ẹemara ẹemara phọ ạna.” Kụ ọdi ạkan enmeny ạrikia ọloghom eghuan Ọmoogh-we phọ amitenaan bọ nyọdi sịphe phọ.

⁸ Ịpe reten, kụ ọdi aḍuraan ẹpe ạga esoorom mọ kụ ạghi ẹpe eegbolom mọ, ạga emitenom erumuḍio phọ ẹpe ẹmha phọ ạBetel, kụ ạlogh ogbogo igbo ạBetel emeelom erumuḍio phọ rꞌEai emitenom mọ. Sịphe kẹn ọdi ạkan ni enmeny ạrikia kụ aaseeny Ọmoogh-we phọ, kụ akpuḍian aaseeny nyọdi.

⁹ Kụ Ebram aḍuraan ni ạḍua esi ạgba esi arelhe ghan rạki ẹpe ạga esoorom mọ rẹki bọ pạkiri aKenan.

Ebram ẹpe eelhe phọ Ijipt

¹⁰ Ịgbakuro ịrol li de phọ aKenan dị ẹbugh iboom, kụ Ebram aḅetenu arelhe ạghi ghisigh ẹpe ạga esoorom mọ kụ asi Ijipt, ọrol ịpa mọony amem.

¹¹ Mem dị ọdi rạwa ọḅeeny ọku phọ oḍigh Ijipt, Ebram ạmagh ni Serai ạnir phọ ọdi kụ ạḅeni mọ, “Mị alegheri ni mọ nạ ooḅi ạnir.

¹² Kụ iḍighi kụ mem dị yira osi Ijipt kụ ạbuo Ijipt phọ ọmiin nyịna bịdi kọsighenom mọ nạ ạnir ạmi, kụ bịdi ughiigh ịmi kụ nạ ạtol.

¹³ Ḅẹni bịdi, mị rạaḅereghi ni nyịna, mọ nạ umarani ạmi, kụ loor ẹmhu ạna, bịdi kụwile ni ịmi kụ ụpham ịmi igey.”

¹⁴ Mem dị Ebram ạḅeeny bọ aḍigh Ijipt, awe Ijipt ụmiin ni ịdi ạnir phọ ọdi ạnighe.

¹⁵ Abuniin iiḍighi awe kꞌọdaam eelhe phọ Ijipt ụmiin ni ạnir phọ kụ ọghi ọḅeni nyọdi ịlo ẹnighe ạnir phọ, kụ iḍighi kụ ọsighe ạnir phọ ọghi ẹpe kꞌọdi.

¹⁶ Loor ẹmhu ạnir phọ, ọdaam eelhe phọ ạmaar ri ạpham Ebram, kụ ạngo nyọdi iyool-ịga, sịnam, ịnam adool ịya rꞌilephiri, butelhedom alephiri ạnmuny, rꞌabutelhedom ạnmariir, rꞌạsikamel.

¹⁷ Kụ loor esi dị ọdaam eelhe phọ Ijipt mạsighe bọ Serai ạnir phọ Ebram, Ọmoogh-we phọ ạngo ni ịkaraph ạreezegh ọdaam mọ rꞌawe iiḍighi ogiga phọ ọdi.

¹⁸ Kụ ọdaam eelhe phọ arom mọ ọmagh Ebram kụ apuru nyọdi mọ, “Ịphen phọ nạ uḍighi bọ ịmi ịghen? Uḍighi ika kụ nạ ịmi ụ́ḅeni bọ mọ ọdi ạnir ạna?

¹⁹ Uḍighi ika kụ nạ ạḅem bọ mọ ọdi umarani ạna kụ ạngo bọ ọgel dị mị kạsighe nyọdi apin? Pọrono ạnir ạna. Pạm nyọdi ạḍuanam.”

²⁰ Kụ ọdaam eelhe phọ ạto ạḅeni we ọdi mọ ọsighe Ebram rꞌạnir phọ ọdi, rꞌaruphua lọ ọdi ạmoogh omitenom eelhe phọ.