Emiighom 1 - Ạḍinya Iigbia

Ịdi Ẹnaan ẹlem aḅirini phọ

¹ Emiighom mọ, Ẹnaan ịlhem ni kẹ phọ rꞌade phọ.

² Ade phọ ịrol li bịn ịyaar ị́tol. Ọphiiny ạbazi phọ ratuḅuḍian ghan bọ kụ aakpereghiom bọ oomo ạraraar phọ, ạrol rꞌufiri kụ Uwaloor phọ Ẹnaan arelhe aaghironom sịphe ạnyu ạmuum mọ.

³ Kụ Ẹnaan ẹḅem mọ, “Mị ạto mọ ạḍiḅaal emite,” bịn ạḍiḅaal emite.

⁴ Kụ ẹḅeeraan Ẹnaan ịpe ọdi ạmiin bọ, kụ ọdi ạgbatan ḍịḅaal phọ esi ufiri phọ.

⁵ Ẹnaan ighol li ḍịḅaal phọ mọ Ootaany, kụ eghol ufiri phọ mọ Aḍughul. Adulhe phọ rꞌạḍiroor phọ kụ iḍighi ḍịḅel aḍio.

^6-7 Kụ Ẹnaan ẹḅem mọ, “Mị ạto mọ ọku ạrol adiemi rụmuum mọ ịyal ariisi.” Kụ ẹtuugh ịdipho eḍighi. Kụ Ẹnaan ẹgbarion rụmuum mọ, mụen ude phọ rꞌạmuphe ạnyu phọ.

⁸ Ẹnaan ighol li ọku phọ mọ Okuaḍio. Adulhe phọ rꞌạḍiroor phọ kụ iḍighi ḍio dị emuneniom ịyal.

⁹ Kụ Ẹnaan ẹḅem mọ, “Mị ạto mọ ạmuum mọ odi bọ ẹphen ude okuaḍio phọ aakpomoghan eniin esi pịdi ạḍigharaghar ade amite,” kụ ẹtuugh ịdipho eḍighi.

¹⁰ Ẹnaan eghol ọgharaghar ude phọ mọ Ade; ẹḅile eghol rụmuum mọ aakpomoghan bọ mọ Ọphiiny. Kụ ẹḅeeraan Ẹnaan ịpe ọdi ạmiin bọ.

¹¹ Kụ Ẹnaan ẹḅem mọ, “Mị ạto mọ ade phọ emiteghom ịdo kịrokiro ạroogho, rꞌịizupha dị kemuum rughuuny, rꞌireeny dị kemuum iimuma,” kụ ẹtuugh ịdipho phọ eḍighi.

¹² Kụ ade phọ imiteghom ni ịdo kịrokiro ạroogho rꞌịizupha rꞌarughuuny. Kụ ẹḅeeraan Ẹnaan ịpe ọdi ạmiin bọ.

¹³ Adulhe phọ rꞌạḍiroor phọ kụ iḍighi ḍio dị emuneniom ịraar.

¹⁴ Kụ Ẹnaan ẹḅem mọ, “Mị ạto mọ ịtozi emite ẹpe kꞌạke phọ ẹgbatan ootaany phọ esi aḍughul phọ ẹḅile eḍeenaan ghan mem lọ asiḍughul-otu, rꞌạsia rꞌạrayaal kemiigh ghan;

¹⁵ bịdi kẹmu ghan ẹpe okuaḍio phọ kụ ẹngo ghan ḍịḅaal ẹphen ade phọ.” Kụ ẹtuugh ịdipho phọ eḍighi.

¹⁶ Ẹnaan ẹlhem ịyal igbogh ịtozi, erumuḍio phọ ẹda ootaany ḅịle ụnwanyu phọ ạda ḍughul. Ọdi ạḅile kẹn ni ạlhem rạanaan.

¹⁷ Ọdi asereghi ḍịḅaal ẹpe okuaḍio phọ mọ ẹmu ghan esoorom de phọ;

¹⁸ ẹmu ghan ootaany phọ rꞌaḍughul phọ, ẹḅile ẹgbatan ḍịḅaal phọ esi ufiri phọ. Kụ ẹḅeeraan Ẹnaan ịpe ọdi ạmiin bọ.

¹⁹ Adulhe phọ rꞌạḍiroor phọ kụ iḍighi ḍio dị emuneniom inya.

²⁰ Kụ Ẹnaan ẹḅem mọ, “Mị ạto mọ ịdo kịrokiro ạraraar dị ẹmoogh ḍiphooghu emuza erugh sịen ạmuum mọ, ḅịle mọ ịnun emuza ẹphepheghuan ghan ẹpe okuaḍio phọ.”

²¹ Kụ Ẹnaan ẹlhem igbogh ina phọ edi bọ ọphiiny, rꞌoomo ịdo kịrokiro ạraraar phọ ịpe erugh bọ emuza ụmuum; rꞌịdo kịrokiro ịnun. Kụ ẹḅeeraan Ẹnaan ịpe ọdi ạmiin bọ.

²² Ẹnaan ịseph ni oomo phọ ạbidi kụ ẹḅeni ịpe erugh bọ ụmuum mọ mꞌịmaraghian emuzeḍi ọphiiny phọ; ẹḅile ẹḅeni ịnun phọ mọ ịmaraghian emuzeḍi aḅirini phọ.

²³ Adulhe phọ rꞌạḍiroor phọ kụ iḍighi ḍio dị emuneniom oogh.

²⁴ Kụ Ẹnaan ẹḅem mọ, “Mị ạto mọ ade phọ emiteghom ịdo kịrokiro ạraraar dị ẹmoogh ghuḍum: ịnam kịrokiro, ịlo elegheḍum rꞌologhi otu, rꞌịlo rekuura, ịbam rꞌigbogh.” Kụ ẹtuugh ịdipho phọ eḍighi.

²⁵ Kụ Ẹnaan ẹlhem oomo phọ ạbidi kụ ẹḅeeraan nyọdi ịpe ọdi ạmiin bọ.

²⁶ Kụ Ẹnaan ẹḅem mọ, “Nyịidipho yira kọlem weye ọkighima loor ayira. Bịdi kọtooghi ghan rạraar ọto ọngo ina phọ rꞌịnun phọ rꞌịnam mọ, ịlo elegheḍum rꞌologhi otu, rꞌịlo ẹmoogh ḍiphooghu, ịbam rꞌigbogh.”

²⁷ Kụ Ẹnaan ẹlhem weye ẹghighima loor phọ ọdi. Ịdipho Ẹnaan edi bọ kụ ịdi ẹtuugh bọ ẹlhem oye. Ẹnaan ịlhem bịdi elephiri rꞌẹya.

²⁸ Ẹnaan ịseph ni bịdi ẹḅeni mọ, “Ịmaraghian emuzeḍi pịdi ẹemara ẹemara anyina orugh oleeny oomo ade phọ kụ ọmoogh ịto. Mị rịngo inyina ịnyaam ọto ọngo ina ọphiiny phọ rꞌịnun okuaḍio phọ rꞌoomo ịnam mọ edi bọ sịen aḅirini phọ.”

²⁹ Kụ Ẹnaan ẹḅem mọ, “Mị mạsighe ịizupha ịpe ẹmoogh bọ ikpo phọ rꞌoomo ireeny phọ ịpe remuum bọ rughuuny ịngo inyina mọ eḍighi eḍien olhe,

³⁰ ạḅile kẹn ạsighe rọogho rꞌạrinya ireeny ạngo oomo ịnam rꞌịnun rꞌịpe ẹmoogh bọ ḍiphooghu sịen aḅirini phọ mọ eḍighi eḍien olhe ạbidi.” Kụ ẹtuugh ịdipho phọ eḍighi.

³¹ Ẹnaan iphogh ni oomo ạraraar phọ ịpe ọdi ạlhem bọ kụ ẹḅeeraan nyọdi iboom. Adulhe phọ rꞌạḍiroor phọ kụ iḍighi ḍio dị emuneniom odiiny.