Elegh ạMak 9 - Ạḍinya Iigbia

¹ Kụ ạJizos ạḅeni bịdi mọ, “Mị ạkar rịḅeni ghan inyina mọ buniin ạbuen ọmeregha bọ sịen kọmiin ni dị ọmar phọ kꞌẸnaan ratu rꞌịikpo kụ ogbi omugh.”

ẠJizos anmia

² Odiiny aḍughul-otu reten, kụ ạJizos ạtuugh Pita rꞌaJems rꞌạJon bịn ạmagh kụ aḍiemiom bịdi ọghi ọsiiny eegum dị ẹkel ạnyu. Kụ ọdi anmia pạ aghisigh phọ ạbidi,

³ kụ ibura phọ ọdi ekitonu ẹḅaal forororo kụ ẹraphan, ịdi sịen aḅirini phọ ootolom arukpe dị mutue ạḅaalami ịdipho ólho.

⁴ Kụ bịdi ọmiin Ilaija rꞌaMozis dị rọkaaphan rꞌạJizos.

⁵ Kụ aPita ạḅeni Jịzos mọ, “Ọtughemia, ịduon yira ọdi bọ sịen ẹnighe ni dị yoor kọlogh ịraar arophoghoghoony, oniin ọlo ạna, oniin ọlo aMozis, oniin ọlo Ilaija.”

⁶ Ọdi ạtu bọ kụ ạghaaph ịduon phọ, pọ ọdi ólhegheri ịlo ọghaaph loor akuboom aruugu dị rasiph bịdi.

⁷ Kụ ọotu asoor kụ aakpereghiom bịdi, kụ ẹḍogh ẹḍua pạ ọotu phọ, kụ ẹḅem mọ, “Ọphon kụ ogina Ọony ạmi dị mị ạphomoghian. Ịnaghanan nyọdi!”

⁸ Kụ egina amem bịdi ọḅile opogh okitonom, bịn ọnon oye ụ́miin mun, emuton Jịzos rꞌạbidi bịn.

⁹ Ịdipho bịdi ọḍua bọ ạnyu eegum mọ rosoor, kụ ạJizos ạto ạḅeni bịdi mọ, “Kẹ́kaaph ịphen nyina ẹmiin bọ ẹḅeni oye, tụtu Ọony phọ Oye aḅetenu esi aḍuugh phọ.”

¹⁰ Kụ bịdi ọsighe ọghaaph phọ ọphon ọlogh iloghi ạbidi, kụ oopuruan ghan mọ oḅetenu esi aḍuugh phọ, pọ eeghe.

¹¹ Kụ bịdi opuru nyọdi mọ, “Iḍighi ika kụ ạbutughemia iilogh phọ ọḅem bọ mọ Ilaija kụ kạpur atu phọ?”

¹² Kụ ọdi mọ, “Ilaija kụ kạpur atu ạasa oomo ạraraar phọ. Ika kụ ịdi ọge bọ pạ Ạḍinya Iigbia phọ ịlo Ọony phọ Oye? Ọge mọ ọdi kạmiinom ni ịminighan ịminimiin kụ oofolomi nyọdi.

¹³ Kụ mị rịḅeni ghan inyina mọ Ilaija maru ni, kụ bịdi uḍighi ni nyọdi oomo ịpe ẹḅeeraan bọ bịdi, ịdipho Ạḍinya Iigbia phọ ẹḅem bọ ịlo ọdi.”

ẠJizos aakonom mọony dị ọkaraph uwaloor ạrol ẹmhu

¹⁴ Kụ bịdi oḅula bọ ọteeny bụeri phọ ạbumatuan phọ ụmiin ni ḍiboom aḍita awe dị oko bịdi okitonom, kụ ạbutughemia iilogh phọ rꞌạbidi rọogbaghanaan ghan.

¹⁵ Kụ oomo aḍita awe phọ rọmiin bọ Jịzos, bịn eḍigh iikia esi ạbidi, kụ oghiil ọghi ọḅeni Jịzos mọ ratigheel.

¹⁶ Kụ ọdi apuru bịdi mọ, “Nyina rẹegbaghanaan ghan eeghe?”

¹⁷ Kụ oniin oye sịphe aḍita awe phọ ạphagharanaan mọ, “Ọtughemia, mị ụsighe mọony ạmi dị ọkaraph uwaloor odi ẹmhu dị maḍighi nyọdi ekpom ọka, kụ aruom nyịna.

¹⁸ Esi lọ ạpham nyọdi, ranyu ghan kaler ude, kụ oopha kafugh ọnhu ọdi, kụ kạghirigha bịn aseleghan. Kụ mị ạḅeni bụmatuan phọ ạna mọ bịdi ophorogh ọkaraph uwaloor phọ, kụ útue.”

¹⁹ Kụ ạJizos ạphagharanaan mọ, “Sey, ọphon phọ ọghen ọdo oghiil dị omeeraam ụ́moogh? Mịna rꞌanyina kọḅile ọtolan ika? Mị kạḅile ạkparam ika esi anyina? Ịsighe mọony phọ iruom!”

²⁰ Kụ bịdi ọsighe mọony phọ ọghiom nyọdi. Ịdipho ọkaraph uwaloor phọ ạmiin bọ Jịzos, bịn aḍighi dị ọony phọ amiigh osiphi isughuna, bịn apekele ameel aakila rꞌoopha dị rafugh ọnhu.

²¹ Kụ ạJizos apuru ọde phọ mọ, “Igbi kꞌạpur amem?” Kụ ọdi ạphagharanaan mọ, “Kꞌẹghoroghor ri.

²² Rạ́gba ghan mem onyu ọdi osumeeny ologhi ạnian rꞌologhi ạmuum, ịlo oghiigh ọdi. Mọ nạ katue ni, pọ nmạ ighirigiir ụlhoghonaan iyoor ḍịghaagh!”

²³ Kụ ạJizos ạḅeni nyọdi mọ, “Esi ikpo ọnhu phọ ạna mọ, ‘nạ katue ni,’ oomo ạraraar edughanaan ni oye lọ ạmoogh omeeraam.”

²⁴ Kụ ọde ọony phọ rọnaghan bọ ịphen phọ kụ ạlho mọ, “Mị ameeraam ni. Eru dị omeeraam mọ ạmi magbem, pọ ụlhoghonaan ịmi ḍịghaagh.”

²⁵ Kụ ạJizos rọmiin we phọ dị moghughaan rotu, kụ ạḅaam ọkaraph uwaloor phọ kụ ạḅem mọ, “Nạ ọkaraph uwaloor ạḅaagh rꞌekpom ọka, mị rạḅeni ghan nyịna mọ mite loor ọdi ạḍua agheel ọkan!”

²⁶ Kụ ọkaraph uwaloor phọ aḍighi dị ọony phọ amophoghuan kụ ạḅile kẹn asiphi isughuna phọ iboom, kụ agbi omite ọḍua. Bịn ọony phọ ạghigh oḍim, dị oomo awe ọḅem ghan mọ mamugh.

²⁷ Kụ ạJizos ạpham ḍịghaagh ọony phọ aphoophe, kụ ọony phọ ạmeera.

²⁸ Kụ mem dị ạJizos ạghi aḍigh ologhi otu, esi dị bịdi bịn odi, ạbumatuan phọ ọdi upuru ni nyọdi mọ, “Iḍighi ika kụ yoor útue bọ uporogh?”

²⁹ Kụ ọdi ạphagharanaan mọ, “Ịnon ịikpo dị kọsighe kụ oporoghom ọdo uwaloor phọ ọphon ílho, emuton ịiḅereghi.”

ẠJizos ạḅile kẹn ạkaaph akol ḍuugh phọ ọdi

³⁰ Kụ bịdi ụḍua ni ẹpe phọ okiton Galili, kụ ạJizos ọ́wa mọ oye alegheri,

³¹ ịdi eḍighi bọ ọdi ạtughemi ghan bụmatuan phọ ọdi. Ọdi ạḅeni bịdi mọ, “Kọḅogh ni Mọony phọ Oye ọngo ịikpo awe, kụ bịdi okiigh nyọdi, kụ ḍughul otu dị kemuneniom ịraar kụ ọdi aḅetenu esi aḍuugh phọ.”

³² Kụ bịdi ụ́naghan ọghaaph phọ, kụ eepuph ímeera mọ bịdi opuru nyọdi ịyaar.

Ạnhian kụ ọkaraghi ogbogh phọ?

³³ Kụ bịdi roru rosi Kạpaniom kꞌạbidi, kụ ạJizos apuru bịdi mọ, “Nyina ịigbaghanaan ghan ịlo eeghe ẹpe eten phọ?”

³⁴ Kụ bịdi ụ́pagharanaan, ịdi eḍighi bọ ẹpe eten phọ bịdi ụugbaghanaan ghan ịlo oye lọ ạkaraghi aḍighi ogbogh sịphe ogbo phọ ạbidi.

³⁵ Kụ ọdi ạrol ude, kụ ạmagh ḍioph rꞌịyal phọ, kụ ạḅeni bịdi mọ, “Oye lọ rạwa oḍighi oḍiemiom, asooromi loor ọdi, kụ asugha ọman, kụ aḍighi otelhedom ạbueri phọ!”

³⁶ Kụ ạJizos ạsighe ọbumoony ạmeremi pạ ogbo phọ ạbidi, kụ roḅeton rogbororian kụ ạḅeni bịdi mọ,

³⁷ “Oye lọ ạloghoma ọdo ọbumoony phọ ọphon loor ẹmhu ạmi, pọ mụloghoma aani ịmi, kụ ọlo ụloghoma ịmi, pọ ạloghomaam nyọpo urom bọ ịmi.”

Ọlo rꞌayira róbeeghi, pọ uḍighan ni iyira

³⁸ ẠJon ạḅeni mọ, “Ọtughemia, yoor ụmiin ni oniin oye dị aghol ḍien phọ ạna kụ raporogh ruru, kụ yoor ọḅeni mọ ịdipho kúḍighi, ịdi eḍighi bọ ọdi rꞌayira ụ́ḅoph oghuugh.”

³⁹ Kụ ạJizos ạḅem mọ, “Kékikima nyọdi. Oye lọ aghol ḍien phọ ạmi kụ raḍighi ịiḍaany kạ́ḅile mun atue ạnuun ạkaaph ịkaraph ịlo ạmi.

⁴⁰ Ọpo rꞌayira róbeeghi bọ, pọ uḍighan ni iyira.

⁴¹ Mị ạkar rịḅeni ghan inyina mọ oye lọ ịngo inyina mụum mọ ịpughol, loor esi dị nyina ạbuo aKraist, Ẹnaan kẹ́bile dị oye phọ ọpo kẹ́kpiom iiḅi.”

Kámeel aḍighanaan ọdegh ophogh

⁴² “Ịlo ịphurukpu ịbam ạnmuny phọ ạbuen umeeraam bọ ịmi — oye lọ aakeleghi oniin ọnyo ạbuen phọ mọ akiton ạḍua esi ạmi, mịnighenaan ghụn nyọdi dị mụsighe ịluma kụ ọghoroghiom orum odi oḍinyighi nyọdi oghiigh.

⁴³ Mọ ạḍighaagh ạna kụ rẹphue nyịna, pọ soph aroph. Kẹnighe epu ọpham ẹgha kụ oḍighom esi aghuḍum kpạripe rꞌomunughan ạraghaagh kụ osumeeny nyịna ooni ạnian phọ réḍim ghan bọ, [

⁴⁴ ẹpe ‘ịbam ikpo phọ ịpe rémugh ghan bọ edi bọ rẹba ghan bụdi Ẹnaan ụ́naghanan, ḅịle rꞌạnian dị réḍim ghan edi bọ.’]

⁴⁵ Kụ mọ owol ạna kụ rạphue nyịna, pọ soph aroph. Kẹnighe oḍighi ẹkugha kụ oḍighom esi aghuḍum epu omunughan aruwol kụ osumeeny nyịna ooni ạnian phọ, [

⁴⁶ ẹpe ‘ịbam ikpo phọ ịpe rémugh ghan bọ edi bọ rẹba ghan bụdi Ẹnaan ụ́naghanan, ḅịle rꞌạnian dị réḍim ghan edi bọ.’]

⁴⁷ Kụ mọ ekpeḍien ạna kụ rẹphue nyịna, pọ pọghoronaan. Kẹnighe epu ọpham eniin ekpeḍien kụ oḍighom ọmar phọ kꞌẸnaan kpạripe rꞌomunughan ariḍien kụ osumeeny nyịna ooni ạnian phọ,

⁴⁸ ẹpe ‘ịbam ikpo phọ ịpe rémugh ghan bọ edi bọ rẹba ghan bụdi Ẹnaan ụ́naghanan, ḅịle rꞌạnian dị réḍim ghan edi bọ.’

⁴⁹ “Ịdipho rooduḍiom ghan bọ boph eḍien kụ ịdi kọsighe nịan ooduḍiom oomo awe.

⁵⁰ Aboph ạnighe ni. Kụ eḍighi ịyaar dị eroph phọ ọdi mephe, nyina keḍighi bọ ika nụun kụ ọdi ạḅile ạmoogh eroph? “Ịkigh boph dị ạmoogh eroph kụ ẹrolan rꞌẹepho esi oomo.”