Elegh ạMak 7 - Ạḍinya Iigbia

Ịtughemi awe aḍiodiidi

¹ Kụ aFarisi phọ rꞌabuniin ạbutughemia iilogh phọ, dị ọḍua ẹpe Jeruselem kụ oru, ukoom ni Jịzos.

² Bịdi ụmiin ni dị abuniin ạbumatuan phọ ọdi roliom ghan eḍien rꞌịipuan pụupuan ạraghaagh, ịduon phọ pọ ạraghaagh dị úutola ịpe aFarisi phọ ọḅem bọ mọ awe oḍighi ghan phọ.

³ Kụ ạri aFarisi rꞌoomo ạbueri aJu phọ ọtuan ni eḍighinom ịyaar aḍiodiidi phọ kụ róle ghan eḍien dị rạghaagh ụ́kuami uutola.

⁴ Ḅịle kẹn, ọḍua ḍighi origheel bịdi róle ghan eḍien dị ụ́pur uutol. Ẹnon ọdo eḍighinom ịyaar bịdi rooko ghan kẹn ni, ọkuami ootologh ạrogo rꞌịnyoki rꞌasuugh rꞌạrimina.

⁵ Kụ aFarisi phọ rꞌạbutughemia iilogh phọ opuru Jịzos mọ, “Uḍighi ika kụ ạbumatuan phọ ạna róoko aani ghan bọ eḍighinom ịyaar aḍiodiidi phọ kụ roliom ghan bọ eḍien rꞌịipuan pụupuan ạraghaagh phọ?”

⁶ Kụ ọdi ạphagharanaan bịdi mọ, “Azaya ọ́pioman ịmiin phọ dị ạmiin bọ ịlo anyina kụ ạge bọ, mọ nyina awe ịyal asinem, kụ ạḅem mọ, “‘Ẹnaan ẹḅem mọ awe phọ ạbuen ọsighe ịidoronhu ạbidi bịn kụ rughueniom ghan ịmi, iloghi ạbidi ịkelan ni ịmi iboom.

⁷ Ị́kpianaan dị bịdi ruuseeny ghan ịmi kụ kọtughemi ghan iilogh phọ awe mụdi ịpe Ẹnaan.’

⁸ “Nyina meghel iilogh phọ Ẹnaan reeko ghan eḍighinom ịyaar awe aḍiodiidi phọ.”

⁹ Kụ ạJizos ạḅile ạḅeni bịdi mọ, “Ị́kpianaan bọ ika esi anyina ọgumom ọman iilogh phọ Ẹnaan, kụ ooko ghan eḍighinom ịyaar phọ anyina.

¹⁰ AMozis ạḅem mọ, ‘Ọde rꞌonhiin lọgh eegu,’ kụ, ‘Oye lọ alomaan ọde mꞌonhiin, oghiigh ghan ni!’

¹¹ Kụ nyina ẹḅile rẹtughemi ghan mọ oye lọ ạmoogh ịyaar lọ kẹngo sụo ọde mꞌonhiin ọdi, kụ ạḅem mọ, ‘Ẹphen phọ ạKoban,’ ịduon phọ rẹḅem ghan mọ, ‘Nyẹen moogho oseenaan Ẹnaan,’

¹² pọ ọdi káḍighinaan mun ịyaar ọde mꞌonhiin ọdi.

¹³ Kụ loor eḍighinom ịyaar phọ ẹpe nyina rẹḅogh ghan bọ kẹngo bụnon, nyina reḍighi ghan ịdi ọghaaph phọ Ẹnaan ụ́man mun ịyaar. Kụ ịbadi ịnon ọdo ịphen phọ nyina reḍighi ghan kẹn ni.”

Ạraraar dị rẹpue ghan oye

¹⁴ Kụ ạJizos ạḅile kẹn ạmagh we phọ, kụ ạḅeni bịdi mọ, “Oomo phọ anyina, iler rụru ịnaghanam ịmi.

¹⁵ Ịyaar ílho ghan dị eḍigh sịphe aloor phọ oye kụ kẹpue oye phọ. Ịpe ẹḍua bọ sịphe ologhi oye phọ kụ emite kụ rẹpue ghan bọ oye phọ. [

¹⁶ Oye lọ ạmoogh rụru ọnaghanam, ạnaghan!]”

¹⁷ Kụ ọdi ạwile we phọ agheel ologhi otu, kụ ạbumatuan phọ opuru nyọdi ịlo aḍidogh phọ.

¹⁸ Kụ ọdi ạḅeni bịdi mọ, “Nyina phọ kẹn edi aani ni elegheri ịyaar ịdipho ạbueri phọ. Nyina ị́naghan mọ ịyaar dị eḍigh pạ ologhi aloor oye kẹ́kar etue ẹpue oye phọ,

¹⁹ ịdi eḍighi bọ réḍigh ghan pạ ologhi oye phọ, reḍigh ghan ọkuruḅaka bịn ọni oroph?” (Ịduon phọ, pọ ạJizos rạḅem ghan mọ eḍien dị oroph ogbeph ílho ghan.)

²⁰ Kụ ọdi ạḅem mọ, “Ịpe ẹḍua bọ sịphe ologhi oye phọ kụ emite kụ rẹpue ghan bọ oye phọ.

²¹ Ịsiphe ologhi oye phọ kụ ẹdi ịkaraph ịitughian ẹḍua ghan bọ remite. Olhe ẹmha ạregelenya, imi, ọko enu, olhe ẹmha,

²² ophoghogha ạraraar, ipesi, iigbegheḍiom, ọphuenaan aloor, ologhi ẹḍim, ọgba ịkaraph ạsiagba, iḅo-igbogh, rꞌiipheeny —

²³ oomo ịkaraph phọ ịphen ẹḍua bọ sịphe ologhi oye phọ kụ emite kụ rẹpue ghan bọ oye.”

Ịlo omeeraam dị oniin ạnir ạmoogh

²⁴ Kụ ạJizos ạḍua ni sịphe phọ ạghi eelhe dị etuman ẹmha aTaya. Kụ aḍigh oniin otu, kụ ọ́wa mọ oye alegheri mọ ọno odi sịphe, kụ ítue iḍighi dị ọdi ạaghian.

²⁵ Kụ oniin ạnir, dị ọkaraph uwaloor ạrol ẹmhu ọnyani ọdi, ạnaghan ni ịlo ạJizos kụ aru ạteeny nyọdi mem mem mọ, kụ akpuḍian sịphe ruwol ọdi.

²⁶ Ạnir phọ ọphon phọ aḍighi ooruen ọlo aGris. Ụmar nyọdi ẹphen Finisia eelhe ạSiria. Kụ ọdi ạaḅereghian Jịzos mọ aphorogh ọkaraph uwaloor phọ loor ọnyani phọ ọno.

²⁷ Kụ ạJizos ạḅeni ạnir phọ mọ, “Eḍien dị nmụny íleeny, ụ́ngo ghan suogh, ịdi eḍighi bọ ị́kpianaan ọsighe ghan eḍien ịbam ạnmuny kụ ọngo asuogh.”

²⁸ Kụ ạnir phọ ạḅem mọ, “Oye phọ, ọkaraghi asuogh phọ ịpe edi bọ eeḍian ịdaabili phọ rẹson ghan ịpherepe eḍien ịbam ạnmuny lọ emeleghu kụ kele.”

²⁹ Pọ kụ amem dị ạJizos ạḅeni ạnir phọ mọ, “Loor ịphen nạ ạḅem bọ, keel. Ọkaraph uwaloor ọnyani phọ ạna mạḍua.”

³⁰ Kụ ạnir phọ agheel ologhi otu, kụ ạmiin dị ọnyani phọ ọdi ạmina ẹmina, dị ọkaraph uwaloor phọ mạkar bịn ạḍua.

ẠJizos aakonom ekpom ọka

³¹ Kụ ạJizos ạḍua ni eelhe phọ aTaya akiton Saidon rꞌeelhe phọ ạDekapolis, kụ agheel ẹpe Ọphiiny aGalili.

³² Kụ ọsighe oniin oye dị ạḅaaghaph, rꞌeema kẹn, oruom nyọdi kụ ọoḅereghian mọ ọdi ạḅogh aani oye phọ.

³³ Kụ ạJizos ạpham nyọdi atenom ọgbal, kụ ạsighe sụnugh ọdi ạlogh ologhi areḅeri oye phọ, kụ ạsin ịghor ạḅoghom nem oye phọ.

³⁴ Kụ ọdi aphogh ạnyu ạke kụ ạḅiphaan, kụ ạḅeni oye phọ mọ, “Ẹfata,” ịduon phọ pọ “Iiphoghonu yogh.”

³⁵ Pọ kụ amem dị areḅeri oye phọ eephoghonu, bịn anem mọ eḅeleghu, kụ ọdi amiigh ọḅa agey.

³⁶ Kụ ạJizos ạphur bịdi rụru mọ kụ́kaaph ịphen phọ ụḅeni oye, kụ ịdipho ọdi ạphur bọ bịdi rụru phọ, pọ ạphue ghụn ni bịn ọkuami oleenyemi.

³⁷ Ịphughanam ni kụ eḍigh ḍiigu esi ạbidi, kụ ọḅem mọ, “Ọdi maḍighi ni oomo ạraraar igey. Aḍighi dị ạbuḅaaghaph ḅạaghaph kụ ọnaghan ḍụghum, ḅịle kẹn dị arokpom ọka kụ ọḅa.”