Elegh ạMak 2 - Ạḍinya Iigbia

ẠJizos aakonom oye dị ạḍighaagh rꞌaḍuwol emugh

¹ Kụ ạJizos ạḅile aḅula Kạpaniom mem dị ịyal-ikpo aḍughul-otu meten, kụ ọnaghan mọ ọdi marigheel.

² Kụ awe dị ookpomoghan bọ ụphughan ni, dị rꞌesi ọrol ị́tol, ghạlamo rꞌọnhu aḍibuo otu phọ ni. Kụ ọdi odi rạkaaph ghan ọghaaph phọ Ẹnaan kạḅeni bịdi,

³ bịn ọsighe oye dị ạḍighaagh rꞌaḍuwol emugh oruom nyọdi, dị inya awe kụ orool.

⁴ Bịdi ụ́moogh eepoogh oḍighom ọteeny ạJizos, loor esi aḍita awe phọ, kụ bịdi ọtuugh pạ ạJizos ạrol bọ kụ ogbonyon ạnyu-otu phọ, kụ ọkpaaghi ẹmina phọ rꞌoye phọ ạmina bọ oseere.

⁵ Mem dị ạJizos ạmiin bọ omeeraam mọ ạbidi, ạḅeni ni oye phọ aloor phọ ị́nighe bọ mọ, “Mọony ạmi, mọsar ịkaraph ạna ọwilenaan nyịna.”

⁶ Kụ buniin ạbutughemia iilogh phọ ụrol aani ni ude pạ phọ, dị rọotughian ghan pạ iloghi phọ ạbidi mọ,

⁷ “Oye phọ ọphon ạmaken rạkaaph ika? Ịphen phọ pọ ọopu Ẹnaan. Ạnhian kụ katue ạsar ịkaraph ạbilenaan, emuton Ẹnaan bịn?”

⁸ Egina amem bịn ạJizos aloghoma loor ọdi mọ ịduon kụ ịdi bịdi rọotughian, kụ apuru bịdi mọ, “Iḍighi bọ ika kụ ịitughian phọ ịphen kụ edi bọ iloghi phọ anyina?

⁹ Ịghen kụ idugh epu ịlo ọḅeni oye phọ aloor phọ ị́nighe bọ mọ, ‘Mọsar ịkaraph ạna ọwilenaan nyịna,’ rꞌọḅeni mọ, ‘Ḅetenu ạsighe ẹmina phọ ạna arelhe’?

¹⁰ “Ọbo nyina elegheri mọ Ọony phọ Oye ạmoogh ni ịikpo sịen aḅirini phọ ọsar ịkaraph ọwilenaan, kụ mị kạḅeni bọ oye phọ ạḍighaagh rꞌaḍuwol phọ emugh bọ mọ,

¹¹ ‘Mị rạḅeni ghan nyịna mọ ḅetenu ạsighe ẹmina phọ agheel kꞌạna.’”

¹² Egina amem bịn ọdi aḅetenu ạsighe ẹmina phọ ọdi, kụ oomo ạbidi ọmiin dị ọdi aten rakeel. Pọ kụ amem dị eḍigh iikia esi ạbidi, kụ oboom Ẹnaan ọḅem ghan mọ, “Kꞌekulha yira kọ̋miin ghan ọdo phọ ịphen.”

ẠJizos ạmagh Livai

¹³ ẠJizos ạḅile kẹn ạḍua ạghi ẹpe oogbom Ọphiiny aGalili, kụ oomo awe phọ ookpomoghan okoom nyọdi, kụ ọdi ạtughemi bịdi.

¹⁴ Ọdi atelhe raten, kụ ạmiin Livai ọony Ạlfios dị ạrol ude pạ otu phọ rọbonyi ghan bọ iisogh phọ, kụ ạḅeni nyọdi mọ, “Ụdaph ịmi.” Kụ ọdi aḅetenu ạdaph Jịzos.

¹⁵ Kụ ịphen reten, kụ ạJizos ạtol ude kꞌaLivai rale ghan eḍien rꞌịbadi ạbuphe rọbonyi ghan bọ iisogh phọ, rꞌabuḍighinom ịkaraph, rꞌạbumatuan phọ ọdi — awe phọ ọdaph bọ nyọdi ụbugh ni.

¹⁶ Kụ ạbutughemia iilogh ạbuo aFarisi phọ rọmiin mọ ạJizos ạḅophoghan rꞌabuḍighinom ịkaraph rꞌạbuphe rọbonyi ghan bọ iisogh phọ ralian eḍien, kụ opuru bụmatuan phọ ọdi mọ, “Uḍighi ika kụ ọdi rꞌọdo phọ awe phọ ạbuen kụ rolian bọ eḍien?”

¹⁷ Kụ ạJizos ạnaghan ịpe bịdi rọkaaph bọ, kụ ạḅeni bịdi mọ, “Bụphe úmoon bọ kụ ropir ghan oyil, kạ́buphe omoon bọ. Mị ụ́tuan ọmagh abugey kụ aru bọ. Mị uru ghụn ni ọmagh abuḍighinom ịkaraph phọ.”

Aḍipuru ịlo ọtuan ịiḅereghi ọrol ạdol ọkoony

¹⁸ Ạbumatuan phọ ạJon rꞌaFarisi phọ rọtuan ghan ni ịiḅereghi kọrol dọl ọkoony. Kụ awe oru opuru Jịzos mọ, “Uḍighi ika kụ ạbumatuan ạJon rꞌạbumatuan aFarisi phọ rọtol ghan bọ ni dọl ọkoony, kụ ạbumatuan phọ ạna ọkoony rọ́tol aani ghan bọ?”

¹⁹ Kụ ạJizos ạsighe ḍidogh kụ apuruom bịdi mọ, “Awe dị odi kꞌọyogo kọtol li ọkoony ḍụghum, dị olhom ọnyani phọ odi ni sịphe? Ịdipho olhom mọ odi aani bọ ni rꞌạbidi, ọkoony kạ́tol.

²⁰ Kụ amem retu ni dị kọboor bịdi olhom mọ, kụ bịdi ogbi nụun ọrol aani ạdol ọkoony.

²¹ “Oye ólho dị kạsighe ọpherepe omoom ukpe kụ apuom ogbaany ạsuoma. Apuom, pọ omoom mọ kạpogha ni ạḍua, kụ ukpe phọ aaguronu.

²² Oye ólho dị kạsighe igbaany ạsikarama kụ aakoom mumoom amiim ịya. Aḅulughi, pọ ạsikarama phọ keḅomoghian ni, bịn amiim mọ rꞌạsikarama phọ epeeghu. Amumoom amiim rꞌimoom ạsikarama kụ ịḅophan.”

Aḍipuru ịlo aḍio ophooghian phọ

²³ Ḍiniin aḍio ophooghian dị ạJizos rꞌạbumatuan phọ ọdi otelhe roten ozo ịbiakpa, ạbumatuan phọ ọdi umiigh ni ọkuughi ịbiakpa phọ.

²⁴ Kụ aFarisi phọ ọḅeni nyọdi mọ, “Mịin aani, bịdi roḍighi ugbini ugbini ḍio ophooghian phọ.”

²⁵ Kụ ạJizos apuru mọ, “Nyina kạ̋al ghan ịpe aDevid aḍighi bọ, mem mọ ọkoony asiph bọ nyọdi rꞌạbuphe ọdaph bọ nyọdi, kụ bịdi ịyaar olhe phọ ụ́moogh bọ?

²⁶ Ịdi ọdi aḍigh otu Ẹnaan phọ, mem mọ Ạbayata kụ uwo ẹmhu oyil ạrikia phọ, kụ alhe eḍien phọ oseere bọ sịphe ạdol iigbia phọ, kụ ạngaani bụphe ọdaph bọ nyọdi, nyẹpe omuton bụpinyon rịkia phọ ị́kpe bọ dị ọnon oye kale.”

²⁷ Kụ ọdi ạḅeni bịdi mọ, “Ụ́tuan ḍio ophooghian kụ ọlhem bọ oye, ụtuan oye kụ ọngo bọ ḍio ophooghian.

²⁸ Ịduon kụ iḍighi kụ Ọony phọ Oye kụ ạmooghom ni ḍio ophooghian phọ.”