Elegh ạMak 16 - Ạḍinya Iigbia

Oḅetenu esi aḍuugh phọ

¹ Aḍio ophooghian phọ reten bọ kụ aMeri ọpo ạMagdala phọ rꞌaSalomi, rꞌaMeri onhiin phọ aJems, ụghi ni ogho rolho eḍu kịrokiro, ịlo bịdi kọki ogbul ḍizu phọ ạJizos.

² Kụ ḍịroor ạḍiḅel aḍio awiki phọ, mem dị erumuḍio memite, bịdi ụghi ni ẹpe oḍi phọ.

³ Kụ oniin apuru ghan nyoniin mọ, “Ạnhian kụ kuukiileminaan bọ iyira ḍighiigh phọ opukiom bọ ọnhu oḍi phọ?”

⁴ Kụ bịdi okiton opogh, kụ ọmiin dị mookilemi ḍighiigh phọ ọsighe. Aḍighiigh phọ ịbugh ni iboom.

⁵ Kụ bịdi oḍiku ologhi oḍi phọ kụ ọmiin dị onyugheel ọony dị ạkpologhian ọmur ạrol ude ḍịghaagh elhiom mọ, kụ aruugu asiph ni bịdi.

⁶ Kụ ọdi mọ, “Aruugu inyina kísiph. Nyina rẹwa ghan Jịzos ọpo ạNazeret, ọpo ọkan bọ oghiigh. Ọdi maḅetenu, ọdi sịen ólho. Ịmiin esi phọ ọmuneen bọ nyọdi.

⁷ Ikeel ẹḅeni bụmatuan phọ ọdi rꞌaPita, mọ ọdi raḍiemi ghan ẹpe Galili kụ okori anyina. Ẹpe kụ ẹdi nyina kẹmiin nyọdi, ịdipho ọdi ịḅeni bọ ni inyina.”

⁸ Kụ bịdi omiteghu pạ oḍi phọ kụ osumughu ọḍua, ịdi eḍighi bọ bịdi ụmoogh ni okpereghaan rꞌaruugu. Kụ bịdi ụ́kaaph ịyaar ụḅeni oye loor oghiilaan. Ịdi ạbuo ageedi okureri eelegh phọ. [

ẠJizos amite egaan aḍeenaan loor Meri ọpo ạMagdala phọ

⁹ Kụ eḅon ạḍiroor ạḍiḅel aḍio awiki phọ ạJizos aḅetenu bọ sịphe aḍuugh phọ, ọdi ạphur amite egaan aḍeenaan loor Meri ọpo ạMagdala phọ ọpo ọdi aphorogh bọ oḍual aruru phọ.

¹⁰ Kụ ọdi ạghi ạghaaph ạḅeni bụphe rꞌạJizos ọrolan ghan bọ, dị odi ọto rꞌemoghi,

¹¹ kụ mem dị bịdi ọnaghan bọ mọ ọdi odi ni phọ, ḅịle mọ aMeri mạmiin ni nyọdi phọ, bịdi úmeeraam.

ẠJizos amite egaan aḍeenaan loor ịyal ạbumatuan

¹² Ịphen reten, kụ ạJizos anmia amitenaan ịyal ạbunon ạbidi dị ọḍua ẹmha phọ rokeel.

¹³ Kụ bụen phọ oḅula kụ ọghaaph ọḅeni bụeri phọ, kụ bịdi úmeeraam.

ẠJizos amite egaan aḍeenaan loor ḍioph rꞌoniin phọ

¹⁴ Kụ ịphen reten, kụ ạJizos amite egaan aḍeenaan loor ḍioph rꞌoniin ạbumatuan phọ, dị odi rolhe ghan eḍien, kụ ạḅaam bịdi loor emeera rꞌịikpara iloghi phọ ạbidi, ịdi eḍighi bọ bịdi úmeeraam bụphe ọmiin bọ nyịno, mem mọ ọno maḅetenu bọ.

¹⁵ Kụ ọdi ạḅeni bịdi mọ, “Ịki oomo aḅirini phọ ẹghaaph ooḅi ọghaaph phọ ẹḅeni yogh oomo awe.

¹⁶ Kụ ọlo ameeraam kụ owur mụum, kạmoogh ni pẹleeny, kụ ọlo úmeeraam, kạmoogh ni apum.

¹⁷ Kụ areḍeenaan phọ ịphen kemitenaan ni bụphe omeeraam bọ: koporogh yogh ni ruru esi aḍien phọ ạmi, kọḅa ghan ni ọnhu kịrokiro,

¹⁸ kopoophe yogh ghan ni iḍigh-eḍum, kụ ọphughol ịyaar lọ ọloghom ọogho, kéḍighi mạar. Bịdi kọzuughi ghan ni bụo ạreezegh oḍume yogh.”

Ọsighe Jịzos okeelom kꞌạke

¹⁹ Kụ ạJizos Ọmoogh-we phọ rọghaaph bọ rọḅeni bịdi, bịn ọsighe nyọdi ogheelom kꞌạke, kụ ạrol ude ḍịghaagh elhiom Ẹnaan.

²⁰ Kụ bịdi ọghi kụ ọghaaph ọghaaph oleenye oomo arikpisi, kụ Ọmoogh-we phọ ạrolonaan ni rꞌạbidi, kụ ạsighe yogh ghan reḍeenaan dị emiteghu ghan ạkparamiom ghan ọghaaph phọ.]